¹ Njite njajĩ atsianai naninaida lrico caacona cjaida narso njajĩ nakitsiñape judionai. ² Padapena nanacjoite naaco cayojĩ: ''Aimadanca fa naapiya njaji weenipe atsianai njite waitonaipe tsacja. Icadaa faa waa carro waoma wainja comaana wataita caaficatsa fa.'' ³ Nin tsacja nja paana icaite caperri cayoji: ''Wacadaa cato fepaite, wa kiníkerre, waapana wataitá carro waoketaca comana wainjawa aima cádanaco mawitacai.'' ⁴ Paana icaite cayoji: ''Feta catoa palraata wa kitsinda iinai wacaoña carro inpoesto talricanaati irso warso capoa fepaite, njite wa kiníkerre tsacja. ⁵ Judionai tsacja njaji wa kitsiñape pacoacatsa judionai capisho nja, njite cacoadaperri tsacja warso njaji weenipe cacoada capisho narso neenipe. Nanaa jiidati lrico wawendee carro nja weenipe atsianai, inaitjepe tsacja narsoperri carro na apjetsida irso. Apamape waitonaipe nacjoite oopina narsoperricana, njite corrin koca warso wataita shopa wacaoña wadietá carrona, ima paanaca njaji irsolri njaji fepaite njite njaji wa kiníkerre.'' ⁶ Njomi cádanaco narso, njaji nacaiterri kerroaca njoa pekirritsa. ⁷ Icamina nowaopiaca nanaco njaji iacoti njomirri inaco niini no caiteca narso njaji caconadalripe njite njaji talricanaati irsoperri njaaca irso maatsicalri. Noaco narso: ''Jitaca impoesto nainai njaji ikitsiñapetsa.''Niini nowacaacawa napiya njaji aimadan ⁸ njite noaco narso: ''Vanaitja aima jidaati wawentá carro njaji wakitsiñape judionai naoya njaji apaana inaiki corri carroetsa narsoperri cana. Wawentana nanjiacá carro nanacowaacatsa, mitsa shaa idiá tsenacja iwendena narsoperri carrona, njite wadiá carro tsenacja wawentana.''Njite njaji iwendeji maacotsana njite corrin napeeko pada iacoti.'' ⁹ Noaco pjaa narso: ''Kotsa matsiaca irso cayoji inaitja capisho. Matsia pjantja iwioca Dio iiwana wadentja necaaca waicao njaji apana inaiki njaji jipondatacape fa. ¹⁰ Ima njoa, njaji noinaiperri njite njaji njonirri ikitsiñape wacadaaca wa palratan inakjoite, wainjaoda inackjoite tsacja narso njaji inaiki, mitsa korrin watatjaca nainai nadietá carro warso aima pja lrioya jliaji waalri narso. Ajena fa caica wanaitjaca njaji wakitsiñape lrinaco jliaji waalri toa narso. ¹¹ Idietena narso jliadaa nacotsa jalredaoca cajliaji napaniapji uva, olivoapji, naapana, njaji palraata inacodalri jitanda naoya, na comanan, jaico tjeda ianaa walriajai njite nja aceite itatjalri naoya jidaati ricó.'' ¹² Niini naaco norso: ''Wadietaotsa narso pjiomi njaji fetaji naoya njite korrinatsa fetá carroca naoya kocacan. Wanaitjaotsa cayoji picaite capisho warso. Niini nonaa nawanaca norso njaji sacerdotenai njite nocadaa nacaite carro yacoti ajádalri sho naicjaote njaji yacoti nacaiterri norso nanaitja caotsa. ¹³ Njité dalri notalraca notsayani, noaco narso: ''Cayoatsa Dio italraca caotsa jliaji korridalriotsa inaitja cayoji lricaite capisho. Njite korrinatsaotsa kocá carrocaotsa lrirsolri.'' Njite pjiomi njaji iwacaacalrio naaco: ''Ajaca, cayoatsa picaite capisho.'' Ikeena naaca matsiadalri wa Minalri irso. Njite nanaitja cayoji nacaite capisho. ¹⁴ Njite jliadaa nacjoitetsa njaji inaiki nacaite njoa carro jimao iwapacana natalricanaa sho Judá lrico; vente walria oonia nacjoite trena y do walria oonia nacojle lri talricanaaca naco jliaji talricanaati Artajerjes. Doce walria oonia nowapacana talricanaati sho, mitsa korrin koan cádanakoca noinjaca nainjaope talricanaati icadaji nainjao njaji inaiki naapiya njaji nokitsiñape. ¹⁵ Mitsa njaji talricanaatinai iwapacapepiana nopjeya, nacadaa aima nadenjicalreo njaji inaiki njite nanaa pja nacaoña cana coerentaita palraata na taitá carro nainjaca nairrá tsacja, caidalritsa nanaitjacana jalredaoca icoam. Mitsa njoa, korri nonaitja cayona ima nofioca Dio iwana. ¹⁶ Njite nodenji catsa nainai fereetá carro jliaji yacaalre iwai, njite korrin wawenta jliipai. Nawacaacawa nirse pjiomi njaji noinai perri nadenjí carro. ¹⁷ Nainja noinai naji judionai njite njaji caconaadalripe, ciento cincuenta namaimaca pj atsianai, naoya tsacja njaji inocaperri waderse nanakjoite njaji yacaalre wacodapi perri iofaacawa. ¹⁸ Wa matsieta mana wainjao jalrdaoca icoam apana buy, seina oveja njenitajiotsa njite coama shoperri tsacja. Njite die jalredaoca naco mana wairra aima jaico tjedaa ianaa teecojle perri naoyawaaca. Njite korrin koancadanakoca notatja injaodati talricanaati iinai noyaadape, ima aima catoa njaji canacairri narso njaji inaiki. ¹⁹ Picadaa nowaopiaca nanaco njaji matsiaperri, no Diote, ima aimaca njaji nonaitjalri matsia narso njaji inaiki aimadan.