¹ Njaji Filisteos nai nawaketa pjiomi njaji natsolrodaote aji Afec rico; njaji Israelita nai nama lricodapi jliaji ooni yamarra cadao adalriji Jezreel rico. ² Njaji talricanati nai ienipe Filisteos nai iyape njenitacao naoyawaca cien icua njite mil icua; David njite njaji lriatsiate a njayapao njapodam she Aquis iinei. ³ Njite jliaji talricanati ienipe Filisteos nai iyada lriaco, "¿Cuampe cao njaji hebreos nai aji?" Aquis iaco nasho njaji paana talricanati nai ienipe Filisteos nai iyape cayoji: "¿Capja corri David ca jliaji, Saúl ishodalri, talricanati Israel ricoda, noinei dalri nanaco pjiomi jalredaoca ca njaji, o matsia pja nanaco oonia ca, njite corrim nokeeta lrimatsicana lrioca kjete noicjaolre ate panashete?" ⁴ Mitsa njaji talricanati nai ienipe Filisteos nai iyape kerroa lrisho na; naco lriso: "Pinaa lriaca waoya liaji atsia, pinaa lridiaca picadalri lriofaa niishe; macadaatsa lria wainei wainoaca cawa she, corri carro jli pondata faa wainoaca cadanacoenao. Ima ¿coajintja lridia carro lri maodaca lri minalri iapiya? ¿Capja lriino capoa cantja njaji wa atsiate? ⁵ ¿Capja corri David ca jliaji, nacantanda mana pia inaco naapiya waca narrapakje, cayoji: 'Saúl iino mil jlipondape, njite David iino diez mil jlipondape?" ⁶ Yami cayamina caacopeca na Aquis iwana david njite lriaco lrisho: "Cayoji caafi capisho jliaji wa Minalri, matsiadalrica pjia, njite jliaji pimotojicao njite pjiewajícao noinei naapiya njaji no tsolrodaote aimadan matsia nocapacan; ima corri nokjeta pimatsicana pioca kjete noicjaolre ate panashete. Mitsa njaji talricanati nai ienipe corri matsia nacapaca pisho. ⁷ Caicarro panaya pidiao njite pimaodaca tsa, corri carro píma nacaoca njaji talricanati nai ienipe filisteos nai. ⁸ David iaco Aquis isho cayoji, "¿Cocao jliaji nonaitjalri? ¿Cocao jliaji picaolri nonaco njoa pishodalri nooca cayam picjaolre ate panashete, corri carro noa noinoaca nacjoete njaji pjiponda pjia no minalri talricanati?" ⁹ Aquis iaco jiepaca David cayoji: "Noajintsa corrica pisho pimatsicana nopjeyajle, cayoji Dio iangelni sho; mitsa, njaji talricanai nai ienipe filisteos nai nacaite cayoji: "Corritsa lritaita jlirraca wainei aji wainoaca cawajle." ¹⁰ Caicarro panaya picafia tjeewa piyompinaco toa naapiya njaji pi minalri ishoperri inocape piinei; kjeya catsaotsa icafiaca tjewao piyompinaco njite jalrecua catsaotsani, iawatsao." ¹¹ Caicarro David icafiacao deepi toa, jlia njite njaji lriatsiate, nacarroa piyompinaco toa, nadia carroa njapaite ricojle njaji Filisteos nai. Njite cadana njaji Filisteos nai njerra Jezreel she.