¹ Njaji Zifeos nai nano Saúl ideshe aji Guibeá ricojle njite naaco lrisho cayoji:"¿Capja corrica a lridawacao jliaji David aji jipana naco Haquila rico, lripjeyajle jliaji Jesimon?" ² Njite Saúl jinicoa lriorroco carroa jalrapocolri ricojle aji Zif rico, nite lrisho tres mil atsianai lriniwanaji Israel lricjoite lrinei, naomaji carro David jalrapocolri rico aji Zif rico. ³ Saúl ioca ima jipana naco aji Haquila rico, adalriji Jesimón ipjeyajle, inipolrico. Njite jliaji David a lriofaoji jalrapocolri rico, njite lricapa Saúl ipinietacani nishe. ⁴ Njite David imenaca pana iacape icapa lricao caicarro jliajica ajadalrica saúl inoca. ⁵ David jinicoa lriacarroa aji Saúl imaalri nishe; njite lricapa namaalri niini njaji Saúl njite Abner jliaji Ner irri, na minalri njaji lri tsolrodaote; Saúl yoshoawa aji namaalri niini, njite njaji lrinaikite naama lridanam, pjiomi namaaca. ⁶ Njite David icaite nasho njaji Ahimelec ape hitita, njite Abisai isho Sarvia irri, Joab ipjerri cayoji: "¿Cjaiterri watsa iorroco noinei Saúl icjaolre aji namaalri nishe?" Abisai iaco jiepacani: "¡Njoa! Njoa watsa iorroco piinei." ⁷ Caicarro David iacao Abisai iapiya naicjaolre njaji tsolrodaonai deepi rico. Niini cadana Saúl imaa aji namaa cawa rico, njite jliaji lrimolrocon lritoda jipai riconi tsomi jliwida ioya. Njite jliaji Abner lritsolrodaote iapiya naoshoa lridanao. ⁸ Njite Abisai iaco David isho: "panaya Dio icadaca picaapi rico njaji picoema. Pinaitja matsiacalre picada notoda papiamtsa jipai nacojlen lri molrocon sho. Corrim watsa notodaca yamapia." ⁹ Njite David jiepa Abisai cayoji: "Mainotsani; ima ¿cjaiterri itaita inaitjaca maatsi lrisho jliaji Dio iniwananda njite corrintja camatsicanani?" ¹⁰ David iaco tsenacja: "Cafidalri jliaji wa Minalri,wa Minalri tsaotsa iinoni, o jlinana tsaotsa iocao, o lriia caotsa lriniocao njite mayamiotsani." ¹¹ Dio watsa iwapa njoa wadee nonaitjaca maatsi lrisho jliaji Lriniwananda; mitsa panaya, notatja piinei, pjipa jliaji molroco jliwida icodapida njite jliaji ooni, washa wao." ¹² Njite David tsa jipaca jliaji molroco njite jliaji ooni jliwida icodapida jliaji Saúl, njite napitoecao. Corrim cjaiterrica icapa na njite corrim najica, corrim tsacja pada icafiaba, ima namaaca pjiomi, mitsa Dio catsa icada talricai jiwa nanaco. ¹³ Jliapodamina David ia pemjeteo njite lriemao awacada ipolrico teecotsa; ima teeco naoyawaca na. ¹⁴ David jiematja nasho njaji inaiki njite Abner isho Ner irri; lriaco jliematjaca: "¿Abner, coada corri pjiepa?" Njite Abner iaco jiepacani: "¿Cjaiterrio pjia jiematjalri talricanati isho?" ¹⁵ David jiepa Abner cayoji: "¿Corri datsao mamafioca dalrica atsia pjia? ¿Cjaiterri pja caidalri picaisho Israel rico? ¿Cuada tsacjao corri piwapa deepi rico jliaji pi minalri talricanati? ¹⁶ Corritsa matsialrica jliaji pinaitjalri. Cayoji caafi capisho jliaji wa Minalri, cayo pishotsa mayamica pjia ima corri piwapa deepi rico jliaji pi minalri, Dio iniwananda. panaya picapena kjerreca jliaji lri molrocon jliaji talricanati, njite jliaji ooni jliwida icodapi perri." ¹⁷ Saúl jimi David iacoca njite lriaco: "¿Capja piacoca jliarra, David noenipe?" David iaco jiepaca: "Noaco jliaji, no minalri, talricanati." ¹⁸ Njite lriacopa: "¿Coada pipinieta jliaji pishodalri no minalri? ¿Cocao jliaji nonaitjalri? ¿Cuan dalrio jliaji matsidalri nonaitjalri? ¹⁹ Mitsa panaya, notatja piinei, pjimi carro noaco njoa pisodalri pjia no minalri talricanati. Dio cadaatsa jliaji icada pjipondata njoa, Jlipaotsa nopjeya ofrenda; mitsa atsia ima cadaa, matsiperrim caotsa na wa Minalri ipjeyajle, ima napeecoca njoa, corri carro nosho jliaji wa Minalri iaa lriotsa washo; ima cayocaji nacaite capisho nosho: 'washa pia matsiadalri pana dio isho.' ²⁰ Mitsa panaya, macadaatsa noirrana iarrocao jipai naco teeco wa Minalri ioya; ima pjia talricanati israel ricoda pimotoca piomji pada cawanjerro cayontjaji pamoto capjio pawinita corrowa awacada naco." ²¹ Njite Saúl iaco jiepaca: "Nonaitjen matsi. Pidiao, David, noenipe; ima corriotsa nonaitja carro maatsi pisho jaite dalriji, picañjata capoa nocao cacoada dalrica jliaji nocafica pipjeyajle. Picapa, cayoeca nonaitjacaji maajica dalrisho njite njite nonaitjeca no matsicanao jorre." ²² David iaco jiepacani: "¡A jlia pi molroconji, talricanati! Pimenaca ape nanacjoite njaji atsianai iempetipe toa lrino carro lriomani njite lridee carro pishoni. ²³ Dio watsa icawiña nacuanatsa njaji atsianai lrima jliaji nanaitjanda matsia njite njepa capo matsia; ima wa Minalri icada pjia nocapi rrico oopica, mitsa corritsa nonaitja carro matsi lrisho jliaji Lriniwananda. ²⁴ Njite picapa, coanca cacoadaca jliaji picafica nopjeyajle oopica, cayo tsaotsa nooma cacoadaca jliaji no cafica wa Minalri ipjeyajle, njite jliatsaotsa iyomjeta njoa maatsi dalri ioya." ²⁵ Njite Saúl iaco David isho: "Matsia watsa pjia, David noenipe, pinaitjaotsa jorre, njite matsiawatsa lrimotoca pisho pjiomi." Caicarro david idiacawa, njite Saúl idiawa lriofaa carroda lrico.