¹ Njitenacja mayami Samuél. Niini nawacaacao pjiomi njaji Iraelitanai naiyá carro lrinaco, njite nadawani lriipana lricotsa Ramá ricó. Njite dalri David jinico iawa jalrapocolri Parán lricojle. ² Ninipia pada atsia Maón rico, ishocada inaani Carmel ricó. Lrisopia tre mil oveja, mil cabra. lriofa lriyoa lriovejan iiyo Carmel ricó. ³ Nabal pia lriipitana, njite lriino iipitana Abigai. Iinarro kjeya darro ianjiica, matsiadarro icapacana. Mitsa jliaji roinirri mapondalritsa maatsidalritsa inaikíca. Caleb inacjoite dalri. ⁴ David jimi Nabal iyoaca neeyo nja lriipirra cabra jalrapocolri ricó. ⁵ Niini David imeenaca die atsianai iempetipe toa lrinaiperri, "Jirra Carmel ricojle, iawa Nabal she, njite itatjani noipitana naco. ⁶ Icaite watsa lrisho cayoji, 'Noma piofaca matsia caficadanaco toa pjia. Noma matsiadalri iocaca piso njite pipana isho tsacja, njite nasho pjiomi njaji piyarro. ⁷ Njomi pishoca iyoacape neeyo njaji piipirra. Njaji iwapacape piipirra wainei pia na, njite corrim wanaitja maatsi nasho, corrim tsaca coca iñaa naoya a cadanaco naji Carmel rico. ⁸ Pitatja pjimio njaji idejicape pisho njite nacaite watsa pisho. Panaya matsia picapaca njaji ideeji cape nosho, ima waocacao lrirricoda jalredaocaca jliaji catima cawana. Pinaitja matsiacalre pia nasho njaji pishoperri njite pienipe David isho pishonda pineiwa." ⁹ Naoca cadanacoa njaji atsianai iempetipe toa David ishoperri,Njite Nabal nacaite pjiomi Nabal isho jliaji David inalri nacaiteeca njite nawapa. ¹⁰ Nabal iaco jiepaca njaji David ishoperri, "¿Cjaiterrio jliaji David? ¿Njite cjaiterri jliaji Isai irri? Jorreca njaji idejicape ipitocape naminanai ioya panaya. ¹¹ ¿Capjantja njopaca noyatje njite noonite njite jliaji lriipe noinonda nasho njaji iyoacape naiyo njaji noopirra, noacarrontja nashon njaji atsianai cjaitepe capayaji?" ¹² Caicarro nadiacao njaji atsianai iempetipetoa David ishoperri, njite nacaite lrisho coanca Nabal jiepacana. ¹³ David iaco nasho njaji atsianai, "Ipapi imatsetjan icoamitsa." Caicarro napapica namatsetan nacuamitsa. David ipapitsacja lrimatsetan. Cuatrociento paya namaimaca njaji ialri David jiapodam, njite dosciento njaji iofalri iwapa nayarroaji. ¹⁴ Mitsa ape nanacjoite njaji atsianai iempetipetoa lricaite Abigail isho, shoaji Nabal iino; cayoji, "David imenaca paana ideecape iacoti jalrapocolri ricojle naa carro natatja jliaji waminalri, njite lricoitana. ¹⁵ Matsia cadana wainei na. Corri nanaitja washo maatsi corrim tsacja maanalre waoya maaficalre waofaa cadanaco nainei malritsita lrico. ¹⁶ Nawapa mana faa jalre werrico njite deepi werrico tsacja, waofaa cadanaco wawapa njaji oveja nainei. ¹⁷ Panaya piajinina njite piwaopiena coancaotsa pinaitjaca, ima nawaopiaca nanaitjaca maatsi wa minalri isho, njite pjiomi lripana isho. Lrima jliaji matsitecan corri dalri pataita cacopeca pja iapiya." ¹⁹ Njite Abigail ikjeyapita njite shopa dosciento peetje, yamada botella jaicotjeda iana, cincoda oveja namatsietajitsa, cincona oveja romitejina, coarenta kilo komana namerritaji, cienita petje nanaitjaji uva-sho, njite docientoita petjeetape nanaitjai higo sho namerritaji matsia; njite nacadaana pjiomina apana burro-nakó. ¹⁸ Njite Abigail iako narso njaji rorsoperri: ‘’Warsena iawa nopjeya, icaaminaotsa noaca jiapodam.’’ Mitsa Korrin rocaite roinirri Nabal irso lrinako ²⁰ Shorra cadanaco burro naco njite rorroco jliaji awacada, naorroco roicaojle njaji David njite njaji lri atsiate, caicarro roketacacao napiya. ²¹ David icaite cayoji, "Mashadalritsa micjapan catsa nowapaca pjiomi lrishodalri jliaji atsia jarapocolri rico, corri carro coca iña lrioya nanacjoite njaji lrishoperri, njite maatsi lricawiña ca njoa matsiacadana nonaitjaca lrisho. ²² Dio watsa inaitja nosho njoa, David, jorrepja, cafi cadaotsa tjewa piyompinaco ape nanacjoite njaji lrishoperri." ²³ Abigail icao cadanaco David, rokjeyapita njite rorroco burro nacjoite njite royamjafa David ipjeyalre njite rotoda showida jipai naco. ²⁴ Ronota naji jlipa njite roaco, "Nonacoatsa, nominalri, lrirroa jliaji imatsicanati. Pinaitja matsiacalre picadaa caco jliaji pishodalri, njite pjimi roaco shuaji pishodarro. ²⁵ Macadatsa kjenaa nominalri icapaca jliaji atsia matsidalrim, Nabal, ima lripitana icaite capisho, cayo ni. Nabal jliaji lripitana, njite lrineica jliaji jlimajican. Mitsa njoa, pishodarro corrim nocapaca njaji atsianai iempetipetoa no minalri iyape, njaji pimenacaji. ²⁶ Panaya, no minalri, caafidalrica jliaji wa Minalri, njite caafidalri pjia, wa Minalri idanata pjia wadee piinoca, njite pioma cantja picoadao pjiida shotsantja, panaya picadena njaji picoema, njite njaji iomacape inaitjaca maatsi piso no minalri, cayo carroatsa naji Nabal sho. ²⁷ Njaji nodenji macoadatsa nominalri isho nashowalrepe njaji idenjicaperri, iajicape nominalri iinai. ²⁸ Pinaitja matsiacalri romatsicana iofaa ronaco shoaji pishodarro, ima ajádalri wa Minalri icadaa talricanaatinai tsacjaotsa nja pienipenai pjiapodamperri, ima nominalri inaitjaca oowi wa Minalri icjaote; corriotsa maatsídalri inotacaotsa caafi cádanacotoa pjia. ²⁹ Njenico cadantja naoma pjia nja atsianai nainó carro pjia, ima aaca jliaji picafica nainai njaji papocoperri caafiperri wa Minalri Dio naco; Jliatsaotsa ipeeco teeco pioya njaji jipondatacape pjia cayoji papeeco capisho jiipadada yecakja sho. ³⁰ No Minalri inaitja cádanacoenaotsa pjiomi naja matsiaperri Lricaiterri pisho, njite talricanaati cádanacoena pjia Irael ricó, ³¹ jliaji pinaitjalri corriotsa inonaa carroca pjia lriicjaote, corriotsa lrimá carroca piwaopiaca, ima corricatsa pima napeecoca irranati micjapantsantja pjiwaca carrotsantja ioma icoadawa piicjaotetsa. Matsia cádanacoena Dio inaitja pisho, piwaada tsaotsa njoa pishodarro.'' ³² David iaco Abigail isho, ''Matsia njaji iacoti picaiterri no Minalri, Irael iDiote nacó, Jliatsa imeenaca pjia noicjaolre wacapaacá carro. ³³ Dio ibendicianda jliaji piajikje, njite Lri bendicianda tsacja pjia, ima corrim picadaa noinoca inaiki micjapantsa, corrim tsacja noomaca nocoadao njoida sho. ³⁴ Ajadalri cafica jliaji wa MINALRI, Israel Diote, idanatalri nonaitjaca matsi, corri cadantja pikjeyapita pioketaca njoa, ajadalrintja corrica pada atsia o iempetida iofa Nabal isho tjewa piyompinaco." ³⁵ Caicarro David jipaca ropeja njaji rodelri lrisho; njite jliaco rosho, " Pjirrena pimaodacatsao pipanaricojle; Njomi niina piaco njite njoepa jliaji picaiterri." ³⁶ Abigail idia Nabal ideshe; njite jlia lrinaitja cadana jorre iñjaodati lripana rico lricatimataaca carroa, cayoji naiñja capisho mana njaji talricanati nai; Njite catiima jliaji Nabal lrinei wacatsa, ima lridewana ketsa. Caicarro corrica rocaite coca lrisho ate tjewaijle piyompinaco. ³⁷ Piyompinacoena, jliyapa cayamina lrioya jliaji lridewanakje jaicotjeda iana sho, rocaitena jlimi shoaji lrino jliaji jiyapalriwa; mayami lricaolre lrinaco, njite cayocaniji jipada sho. ³⁸ Die jalredaoca jiapodamina jliaji Dio jirrapjiteta Nabal caicarro mayamicani. ³⁹ David jimi cadanaco mayamica Nabal, lriaco, "Matsiadalri jliaji no Minalri, iomalri nocoadao lrima jliaji Nabal inaitjalri nosho, njite lriwapa jliaji lrishodalri matsidalri ioya. Njite lridieta Nabal inaco wacatsa jliaji matsilri lrinaitjaca." Jliapodamina David imenaca nacaite carro Abigail isho, jliomaca jlitaca lrinoano. ⁴⁰ Naoca cadanacoa njaji David ishoperri Abigail ideshe aji Carmel rico, caaco nja rosho njite nacaite cayoji, "David imenaca faa pideshe wadee carro pjia lrinoa." ⁴¹ Shonicoa, njite rotoda roecoa jipai nacojle, njite roaco, " picaokje, shoaji pishodarro apama ideji cadaotsa rocotsocja njaipa njaji lrishoperri jliaji no minalri." ⁴² Abigail ikjeyapita njite shonicoa, shorrao burro naco njite cincoma roshoperri ia roinei; njite roa njapodam njaji ideecape iacoti David ishoperri njite caitseca lrino cano. ⁴³ David jita tsacja lrinoa shoaji Ahinoam adarroji Jezreel rico; njite yamamape lrinoo cana. ⁴⁴ Njite, jliaji Saúl lria shoaji lriito Mical, David inoom, Palti isho Lais irri, adalri piaji Galim rico.