¹ Saul idia cádanaco iocao, jliaji iá cadam inoacawa filisteonai icjoete, naaco lrisho: ''A David iá iofawa jalrapocolri En Gadi lricodalri.'' ² Niini Saul iniwana tre mil atsianai nanacjoiteperri pjiomi njaji Iraelitanai naacarro naoma David njite njaji lriinaiperri jiipana lrima ricojle, naapirra cabra iajii carroji mana. ³ Naa cádanacoa inipolrico, Saul iocawa pafe ricojle, nincawa corraarra nawakeeta carroda lrico oveja, niincawa tsacja pafe jalrapeco. Niini Saul jiewa lri ricoda lri matsikeetá carro nishe. Njite cadana David naapiya nja lriinaiperri njeewa naofaa lri ricoda tsa pikeetem she cawa. ⁴ Niini njaji David iinaiperri naaco lrisho: ''Icatsa lriocacao jliaji jalredaoca wa Minalri icaiterri pia, lricaite cádanaco pisho cayoji: ''Nocadaotsa picoema picaapi ricó, pinaitjá carro lriapiya coancatsa pioma pinaitjaca.'' Njite David, jinico tamjiatsa maacotsa litsoetaacawa lriá carro Saul icjaolre, niini David lriyoáca Saul itsayan inomapicja. ⁵ David iyoá cayami Saul itsayan inomapicja, iinonaa icaolre lriicjaote. ⁶ Niini lriaco nasho njaji atsianai lriinaiperri: ''Corriotsa no Minalri icadaa carrontja nopieta nonaitja caidalriji no talricanaa Saul isho, jliaji no Minalri iniwananda lrishowao, nonaitja cantja maatsi lrisho, nocapa cadaana tsantja wa Minalri iniwanandacan lrishowao.'' ⁷ Niini David icoita nja lriinaiperri nasho nja iacoti lricaiterri, njite corri lricadaa nainoca Saul. Njite Saul jinico iemao, lrimoto lrioya jliaji jalraapeco lria carro pjawa. ⁸ Njite jliapodamtsa, David imoto tsacja njiteo, njite jlinoco lriemao lriwaná carro Saul, lriaco: ''Nominalri, no talricanaati.''Saul icaboco cádanaco icapa jliapodamshe, David icoanja jiipai nacojle Saul ipeyajle, lri cadaacarro lricapa lriminalrican ajádalri. ⁹ Nini David iaco Saul iso: ''Cuada pjimi nasho njaji atsianai icaitecape pisho, noajeca nooma noinó carro pjia? ¹⁰ Jliadaa jalredaoca-ca jliaji njaji pitji nacapa coanca wa Minalri icadaaca pjia nocaapi rico a cádanaco fáa jalraapeco ricó. Padapena icaite noino carro pjia, mitsa nocaite corrí carrotsa noino pjia. ima nocaite: Corriotsa nonaitjá carroca maatsi noi talricanaa isho; ima icacatsa no Minalri iniwanandaca lrishowao. ¹¹ Pjia njonirri shodalri nocapaca, picapa nocaapi rico pitsayan inomapikja noyoanda pioya. Lrishotsa pitaita pianjica corrica nooma noinoca pjia, njite pitaita pianjica corri catsa nosho maatsidalri picjoete o nonaitjá carrontja matsídalri pishó dawacaitsa, njite corritsa coca no matsicana pisho, piaji cadaana pioma piino carro njoa ¹² Dio tsaotsa ianjíi pinaco njite nonaco tsacja coanca, pinaitja cadaa nosho maatsi Dio watsa ioma nocoadao piinai, mitsa njoa corriotsa nonaitjá carroca pisho maatsi. ¹³ Cayoji lricaite capisho jliaji pacja iacoti opicjaitsa: Maatsiperri nacjoite lrino jli maatsídalri. Mitsa njoá, corriotsa nonaitjá carroca pisho maatsi. ¹⁴ ¿Cocao jiapodamio lrimotoa jliaji Irael italricanaa? a¿Kjaiterrio jliaji lriajirri lrioma? ¡Capja apana tsiino mayamdalrimcan! o ¡Pada cawanjerrocan! ¹⁵ Matsia pja wa Minalri catsa wacadaa iajii wanaco, lriwapá carro nja noopaneta njite lricadaotsa nopitó carro pioya.'' ¹⁶ Yaami cádanaco caacoca David, Saul isho, Saul iaco David isho: ''¿Capja nirrí David iacoamca jliaji njomirri, pjiatsa jliarra?'' Cjema pja caacoca Saul njite lriiya lrisho. ¹⁷ Njite lriaco David isho: ''Matsiadalri pjatoa pjia noya. Pidieta capoa nocoadao matsiadalri sho, nonaitja cadaana maatsi pisho. ¹⁸ Opi picadaa nocapa coanca pinaitjaca matsia noso, corricapoa piino njoa, wa Minalri icadaa cádanaco tja njoa picaapi ricó. ¹⁹ Ima pada atsia iokeeta cadaa lricoema, lriinocan. Wa Minalri watsa icaoña pjia pinaitja capoa nosho matsia opica. ²⁰ Noanjintsa talricanaati caotsa pjia, njite pjiacaotsa ianjíi nanaco pjimi njaji Iraelitanai. ²¹ Picaite nosho iacoti ajádalri sho wa Minalri iipitana naco corricaotsa piinó carroca njaji noopaneta, njite njaji nonacjoitepe njonirri naco.'' ²² Niini David icaite Saul isho iacoti ajádalri sho cayoji lritatja capiso lriinai. Jliapodamjite Saul idiawa lriipana lricojle, njite David naapiya nja lriinaiperri njerrawa nadawaaca carroji ricojle.