¹ Njite naaco David isho: ''Picapa njaji filisteonai nainoacacao Keila icjoete njite nañaitoca nja trigo namatsietaji.'' ² Niini David itatja Dio iinai lrikitsindatá carron, lriaco: ''¿Capja matsiatsa noaca noinoacawa na cjoete nja filisteonai? Niini wa Minalri iaco David isho: ''Washa pia piino nja filisteonai, piyomjeta Keila naoya.'' ³ Njite njaji David itsolrodaonai naaco lrisho: ''Anji Judá ricó, wa fió manacatsa waofacawa. ¿Omaminantja waa cada wainoacawa nacjoete nja filisteonai aimadan?'' ⁴ Niini David itatja tsenacja Dio iinaí, lriaco: Njite wa Minalri jiepa David, lriaco lrisho: ''Pjinicoa, piorroco Keila ricojle. ima nocadaotsa pjiametá carro nja filisteonai.'' ⁵ David iawa Keila ricojle naapiya nja lritsolrodaonai njite nainoacawa filisteonai icjoete. Lrita naoya na vacan njite lriino jorre filisteonai. Cayotsa David imanacota nja inaiki Keila ricope. ⁶ Jiaji Abiatar, Ahimelec irrí, lripito cádanaco David icjaolre, jlipa lridee lriinaiwa pada sacerdotenai itsayanpe. ⁷ Njite nacaite Saul jimi David iacao Keila ricojle. Saul iaco: ''Oopi Dio icadacan nocaapi ricón. Ima jliewacawa lri ricoda jliaji yacaalre ishocada ipananoma ishocada pataimita shopan.'' ⁸ Niini Saul iwakeeta pjiomi njaji lri tsolrodaonai naacarro oowi ricó, naa carro Keila ricojle nadanatá carro David njite nja lrinaiperri. ⁹ Mitsa David ianjintsa Saul iwaopiaca coanca lrinaitjaca maatsi lisho. Niini lriaco sacerdote Abiatar isho: ''Pidee sacerdotenai itsayampe ajerreji.'' ¹⁰ Njite David iaco: ''No Minalri, Irael iDiote, njoa pishodalri, njomi Saul inocaotsa ioma njoa Keila ricojle, lrinó carro lriino nja Keila ricoperri noicjaote. ¹¹ ¿Capjaotsa njaji Keila ricope nacadaotsa njoa Saul icaapi ricó? ¿Capjaotsa Saul inocaotsa cayoji, njoa pishodalri jimi capisho? Pjia no Minalri, Iraelnai iDiote, notatja piinai caiwi ricotsa, picaite njomi coanca.'' Njite Dio jiepan: ''Lrinoeniotsa.'' ¹² Njite David iaco pja: ''¿Capjaotsa njaji Keila ricope nacadaotsa nja noinaiperri, njite njoa tsacja Saul icaapi ricó?'' Njite Dio jiepan, lriaco: ''Aja. nacadaotsa pjia nacaapi ricó.'' ¹³ Niini David naapiya njaji lriinaiperri, seiciento namaimaca, njenico naawa Keila ioya, njitedalri nanjicatsa apafe ricojle manao. Njite nacaite Saul isho oopica David iawa Keila ricjoite, njite corritsa lripineta David. ¹⁴ Njite David iofawa idawaacao jalrapocolri ricó, jiipana lrima caawa, tsoomi lrioya jliaji jalrapocolri Zif dalri. Saul ianjíi mana iomani caidalritsa, mitsa corri Dio icada Saúl icapi riconi. ¹⁵ David icapeena Saúl imotoca iomajini lríino carroni; Panaya a jliaji David jalrapocolri rico aji Zif rico Hores ricoda. ¹⁶ Njite jliaji Jonatan, Saúl irri, jlinicua lriacarro David ideshe Hores ricojle, lri cjaidata carroni lricada lricaolreo Dio naco. ¹⁷ Jonatan iaco david isho: " Mafiotsao. Ima jliaji Saul, njonirri, corri watsa lrioketa carro pjia. Talricanati watsa pjia Israel naco, njite pinai catsaotsa njua. Jliaji Saúl, njonirri, lriajintsa cayoca." ¹⁸ Nanaitja pada iacoti nainaiwaca Dio ipeyajle. Njite David iofátoa Hores rico, njite Jonatan idia lripana lricojle. ¹⁹ Njite njaji Zifeo ricope íno Saul iderse Guibeá ricojle, naaco lrishó:''Icatsa David idawaacacawa wapecolrico nadawaaca carrojitsa Hores ricó, yeenondalri naco jiipai Haquila dalri, atsiajliemajle Jesimón isho. ²⁰ Piorroco pioman, pjia talricanaati. Pinaitjá carro cayoji pioma capisho, piorro pioman. Njiteotsa fáa, icaamitsaotsa wacadaa caotsani picaapi ricó, pjia talricanaati.'' ²¹ Njite Saul iaco nasho: ''Caacoatsa matsia wa Minalri inaco. Kjenaa capoa icapaca nosho. ²² Washena idiawa, icapa carrocatsa matsia. Iomaotsan matsia kjerreca lridawaacawa njite cocacá jliaji icapa kjerrecanji. Ima nacaiteca nosho lrianjíika coanca. ²³ Niini icapa matsia, ioma matsia pjiomi kjerre carroji lridawaacawa mana. Idiawatsa noicjaolre ianjíi carromina coanca lrinaco, nindecjaotsa noá iinai. Niini cadani lri ricoda jiipaica, noomaotsani napecolrico nja atsianai Judá ricope.'' ²⁴ Icaamitsa njenicoa Saul ioya nadiá carro Zif ricojle. Mitsa David naapiya nja lriinaiperri naawa jalrapocolri Maón dalri ricojle, Arabá ricó, atsiajliemajle Jesimón isho. ²⁵ Niini Saul iawa ioman naapiya nja lri tsolrodaoperre. Mitsa nacaite David jimi nanaco, niini lriorrocowa jiipadalrima ricojle, lriofaa carrotoa niinio jalrapocolri Maón dalri ricó. Saul jimi cádanaco kjerreca David, lripinieta David lriofalri poiatoa niinio, jalrapocolri Maón ricojle. ²⁶ Saul iawa awacada pemajle, njite David naapiya njaji trolrodaonai lriinaiperri naawa awacada pemajle lricoemjete tsa. David ikjeyapita iacawa lriá carro pja teeco Saul ioya. Saul, njite nja lriinaiperri nadaanatá cadaana toa David njite nja lriinaiperri njepá carrona, ²⁷ pada ideecada iacoti iocao Saul ideshe njite lriaco lrisho: ''Pidia kjeeyao, ima njaji filisteonai, nainoca nja piyacalre ricipe.'' ²⁸ Niini Saul ikjeyapita idiacawa lri´noacá carro nacjoete nja filisteonai, yaamitoa lrianjica lrioma David. Niini jliaji jiipadalrima nacadaa lriipitanawa Jiipada Papitocaawao. ²⁹ Njite David iá njiteo lria carro lriofawa nadawaaca carrodao ricojle En Gadi ricó.