¹ David ipito njiteo jalraafen Adulam ricó. Njite David ipjeenai njite pjiomi njaji jlinirri iipaneta ianjíi cádanaco nishecani, naorroco lriicjaolre. ² Pjiomi njaji inonaaperrim, pjiomi njaji ishocapem ideewecape njite pjiomi njaji corriperritsa imaodacantja iofaacao naa nacapa lricjaolre. Niini nacadaa David carro nacapitaman. cuatrociento atsianai njaji iwacaacalri lriinai. ³ Njitedalri David iawa Mizpa Moab ricó. Lriaco lrisho jliaji talricanaati Moab dalri: ''Notatja pinai matsiacalri, picadaa carro njonirri njodoa tsacja iá picjaolre, akjerrecatsa Dio icadaa noanjíi coanca noapiya. ⁴ Niini lrimaca jlinirri jlidoa tsacja Moab italricanaa iinaina a cadaana toa David lridawaacalri toa nisheo. ⁵ Njite jliaji profeta Gad iaco David isho: ''Maofatsawa pidawacalritsa niiniwa. pimoto njiteo piá carro Judá jipaite ricojle.'' Niini David iá njiteo awacada Haret dalri ricó. ⁶ Njite David jími oopica Saul ianjíi lrinaco, njite nanaco njaji atsianai ianjiirri lriinai. Njite Saul iofaawa Guibeá ricó, apana jaico tamarisco iapjite Ramá lricó, njite lrimolrocontsa lricaapi ricó njite pjiomi njaji lrishoperri neema lriwaida naco. ⁷ Njite Saul iaco nasho nja lrishoperri iemalri lriwaida nacó: ''¡Panaya jimi matsia, jia inaiki Benjamín inacjoité perri! ¿Capja Isaí irrí iacaotsa icoanam ipaniapjiwa? ¿Capjaotsa lricadaa nacapitamá carro jia mil tsolrodaonai nacó o cien nacó cadaa, ⁸ iá carrotsantja nocjoete? Corri pada inacjoite icaite njomi coan caojli piaca nirri inaitja pia iacoti lriapiya jliaji isaí irrí. Corri pada inacjoite capaimantja ianjiacacao lricjaote noinai. Corri pada inacjoite icaite njomi nirri catsa jliaji icadaa iacoti lriema carro nocjoete jliaji noshodalri David. Panaya jliaji lridawaacawa lriwapá carro lriinó carro njoa.'' ⁹ Njite Doeg edomita tairri, jliaji iemalri Saul ishoperri iinai, iaco lrisho: ''Nocapjen lrinoca jliaji Isaí irri Nob ricojle, Ahimelec ideshe Ahitob irrí. ¹⁰ Lritatja Dio lrinacó lrikitsindatá carron, lriá lrisho lrinjao njite Goliat filisteo tairri imatsetanim.'' ¹¹ Niini Saul inaa naa carro naoma jliaji sacerdote Ahimelec, Ahitob irrí njite pjiomi njaji jlinirri iipaneta, njaji sacerdotenai Nob ricope, pjiomi naaca talricanaati icjaolre. ¹² Njite Saul iaco: Pjia Ahitob irrí, panaya pjimi natsia.'' Njite jliepani: ''No minalri, alrina njoaji, picaite njomi.'' ¹³ Niini Saul iaco lrisho: ''¿Cuadao piwaopia piemaca nocjoete, pjia njite jliaji Isaí irrí, pia cádanaco lrirrawa, lrimatsetaniwa njite pitatja Dio lrinaco Lrikitsindatá carron, lriemá carro nocjoete, lridawaacá carro corricawatsa noanjíi cayoji lridawaaca capisho panaya?'' ¹⁴ Njite Ahimelec jiepa jliaji talricanaati, lriaco: ''¿Coandalri nanacjoite njaji pishoperri corridalritsa imatada pisho cayoji David icayosho, cocao jliaji talricanaati itsimarre, jliaji naapiyawalre njaji iwapacape pjia, jliaji nafionda nacapaca piipana lrico?'' ¹⁵ Corri icamicatoantja notatjaca Dio iinai lrikitsindatá carro Dvid. Caidalritsa nonaitjaca picapjentsa. Macadatsa nomatsicanao lricjaote njite corri tsacja nanaco njaji njonirri iipaneta. Ima njoa pishodalri corri noanjíi lrinaco jliaji posholri lriinai.'' ¹⁶ Njite Saul jiepani: ''Ajadalri mayamicaotsa pjia, Ahimelec, njite pjiomi njaji pjinirri iipaneta.'' ¹⁷ Niini Saul iaco nasho njaji iwapacapeni njaji iemalri lriwaida naco: ''Icabocoa iinó carro njaji wa Minalri isacerdotenai. Ima nja tsacja ikitsindata David nocjoete. nannjíi capoa tsacja lripito piaca nooya njite corrim nacaite njomi.'' Mitsa njaji lrishoperri corri naino njaji Dio isacerdotenai. ¹⁸ Njite Saul iaco Doeg isho: ''Picabocoa piinó carro njaji Dio isacerdotenai.'' Niini jliaji Doeg edomita tairri icabocoa lriinó carró nja sacerdotenai; Lriino ochenta cinco atsianai jietaaca capewa sacerdotenai itsayan sho jliada jecoapica. ¹⁹ Njite lriino matseeta sho njaji iofaacape Nob ricó, nayacalre nja sacerdotenai; lriino inaitjepe, iempetipe njite pjiomi njaji iempetiapape tsacja; navacan nadenjishopa tsacja, naburron njite naovejan tsacja. lriinio pjiomina matseeta sho. ²⁰ Mitsa pada nanacjoite njaji Ahimelec ienipe, Ahitob irrí, lriipitana Abiatar, lripitoa njite lria lrioma David. ²¹ Niini Abiatar iaco David isho oopica Saul iino pjiomi njaji Dio isacerdotenai. ²² Njite David iaco Abiatar isho: ''Nioanjin piatsa cayocaotsa nocapa cádanaco niinica jiaji Doeg edomita tairri, jliacaotsa icaite noaconao Saul isho. ¡Njoa isho maatsicalri caicarro nainoca nja pjinirri iipaneta! ²³ Piofa noinai, mafiotsa noiwana. Ima jliaji iomalri iinó carro pjia lriomjen tsacja njoa. Corriotsa coan carrocaotsa pjia noinai''