¹ Saul iaco lrirri Jonatan isho njite nasho njaji lrishoperri pjiomi nainó carro David. Jonatan ipeyonda cadana David. ² Niini Jonatan iaco David isho: ''Njonirri Saúl ioma iinoca pjia. Niini piawa awacada lricojle piwapaaca carro nirse, njite pidawaacawa corri cawatsa coca ianjíi. ³ Nomotoatsa noema pemajle noemá carro tsoomi njonirri icodapi pidawaacalri niinio, njite caacocaotsa njonirri iinai pinaco. Njite coca cadaotsa noanjíi, nocaiteotsa pjimi . ⁴ Niini caacoca matsia Jonatan, David naco jlinirri Saul isho, lriaco lrisho: ''Macadatsa talricanaati inaitja imatsicanao lrishodalri David nacó. Ima corricatsa coca lrimatsicana pisho, njite pjiomi njaji lrinaitjalri matsia lrinaitjaca pisho. ⁵ Lriino jliaji filisteo kjaidete. Njite Dio icadaa jiama kjeti pjiomi Irael isho, picapanda njite jorre catiimaca pjia lriicjaote. ¿Njite coadantja wanaitja wamatsicanao wama capoa David mamatsicanaadalritsa ipeecoca lriirrana micjapantsa?'' ⁶ Saul jimi Jonatan isho. Niini Saul icaite iacoti ajádalri sho lriaco; ''Caafidalrica no Minalri, corriotsa mayamícarroca David.'' ⁷ Niini Jonatan iwana David, njite lricaite lrisho pjiomi nja iacoti lrianjíi carro coanca. Njite lridee David, Saul icjaolre. Saul icadaa tsenacja lridenje lriinai lriofacawa lrico caitsa oopisho. ⁸ Njite apapia nacojle nanaitja tsenacja oowi, niini David iá tsenacja inoaca filisteonai icjoete, njite jliametana jorre capoa lriinocana. ⁹ Saul iofa cádanaco lriipana lrico njite lrimolrocontsa lricaapi ricó, pada icaolriti maatsidalri Dio imenacanda ino Saul naco, David ikjemata cadana toa lri arpan. ¹⁰ Saul ioca tsenacja lrimolrocon David icjaolre panti iwai nacojle, mitsa David jiena Saul ioya, mitsa jliaji molroco jliewa taimi panti iwai naco. Cayotsa iomjica David njite lridepitenatsa lripito Saul ioya. ¹¹ Saul imeenaca inaiki naacarro nawapa nacapa David lriipana lricojle lriacarro lriinoni piyompinacotoa, tjewaile. Njite David iino, Mical iaco lrisho, ''corricadaa pimanacotaacacao jliadatsa deepica jliaji, tjewaotsa naino pjia.'' ¹² Niini Mical icadaa David iorrocowa ventana lricjoite. Lrimoto niinio, njite cayotsa lripitocawa. ¹³ Njite Mical jipa apana topana panti ricoda roshoetá carron naoshoa carroda ricó. Njite rocada jliwidarroa cabra iyami, njite shoeta tsacja lritayaniwa. ¹⁴ Njite lrimeenaca cádanacoena njaji iacapena iomani jipa David, roaco rosho: ''Lriyaamica.'' ¹⁵ Njite Saul imeenaca tsenacjana nacapá carro David; lriaco nasho: ''Ideotsa noicjaolren lrioshoacarroita fiée, noinó carroatsan'' ¹⁶ Njeewa cádanaco, njite nacapa topana catsa jliaji ioshoalriwa naoshoacarroita ricó, njite cabra iyam catsa jliwidarroa. ¹⁷ Njite Saul iaco Mical isho: ''¿Coadao picatsata njoa njite pima nocoema ipitocao?'' Njite Mical jiepani, roaco: Lriaco nosho, corricadaa picadaa noawa, noinocaotsa pjia.'' ¹⁸ David jieco idawaaca teecoa, lriawa Samuel icjaolre Ramá ricojle, njite lricaite pjiomi Samuel coanca Saul inaitjacan. Ikeena Samuel, David iapiya naa naofáa Naiot ricojle. ¹⁹ Njite nacaite Saul jimi aaca David Naiot Ramá ricojle. ²⁰ Niini Saul imeenaca iacape jipa David nirse. Njite nacapa cádanaco njaji profeta papoco perri iemao nanoparrotaca, njite Samuel-ca njewidaapo, niini Dio Icaolrini iorroco nanaco njaji Saul imeenacaji, niini nja tsacja inoparrota nainai. ²¹ Nacaite cádanaco Saul jimi coanca nja lrimenacaji, lrimeenaca papocoenacja inaiki, mitsa njaa tsacja inoparrota nainai. Saul imeenaca tsenacja madalripia shopena, mitsa nja tsacja inoparrota nainai. ²² Cayocapoa, Saul iá tsacja Ramá ricojle njite lriocawa njecaniapji rico njetacaawa ooni Secú ricó. Njite lritatja nainai kjerreca Samuel njite David tsacja, niini pada icaite jlimi acana Naiot ricó Ramá dalri. ²³ Niini Saul iawa Naiot, Ramá ricojle. Mitsa Dio Icaolrini iorroco tsacja lrinacó, niini lrinoparrotaca nainai, atee lriocawa Naiot, Ramá lricó. ²⁴ Nirshe, lritojloeta lrioya lritsayani, lrinoparrota tsacja nainai Samuel ipeyajle, matsayanitsa lritoda lriecoa jiipai naco padaa jecoapi njite padaa deepi. Lriicjaote capeena nacaite nja inaiki: ''Saul tsacja napecolrico nja profetana.''