¹ Yaami cádanaco caacocan Saúl David iapiya, Jonatan iwawaita irroacawa David iwawaita iinai, niini Jonatan ipeyocani lripeyoaca capisho jliwaacatsa. ² Saúl idee David lrishodalri carron jliadaa jecoapi; corrinatsa lricadaa lridiawa jlinirri iipana ricojle. ³ Njite Jonatan David iapiya nanaitja pada yaacoti nainaiwaca nakitsindajiacá carroa, ima Jonatan ipeyoni lripeyo capisho lriwawaita waacatsa. ⁴ Jonatan jita lritsayan jlietanda lritsayan naco lriá carroni David ishó, lriá tsacja lrisho nja lrinoaca shopa oowi rico, lri matsetan, lriyawitjiapo njite lricintoron tsacja. ⁵ David iawa akjerrecawa catsa Saúl imeenaca lriawa, njite matsia mana lriacawa. Saúl icadaa David carro ianjíi nanaco njaji tsolrodaonai inoaca cápe oowí rico. Njite matsia nacapaca lrisho nja inaiki aimadan, matsia tsacja nacapaca lrisho njaji Saúl ishoperrí. ⁶ Nadia cádanaco naapana lricojle nainoaca cayami nacjoete nja filisteonai, nano pjiomi njaji inaitjepe Iraelnai iyacalre ricope nano nacapá carró natalricanaa Saúl, nacanta caayao narrapacje tsacja, cathiima nánoca niini nadeeca njakjematajle nacanta carro tambor sho njite pjiomi nja paana nacantashopa. ⁷ Njite nja inaitjepe nacanta nainaiwaca, naaco nacantanialre ricó cayoji: ''Saúl iino mil jlipondape, mitsa david iino diemil jlipondape.'' ⁸ Corripia Saúl ipeyo jimica coanca nacantaca nja inaitjepe, niini kerroacan. Lriaco: ''Nacadaa diemil David isho, mitsa nosho nacada mil tsa. Icaamitsantja canacaica nacaiteca jliaca talricanaati.'' ⁹ Jliadaa nacjoite Saúl ikerria David. ¹⁰ Tewaijle, pada icaojleti maatsidalritsa Dio imeenacanda jiwa tsenacja lrinaco. Njite mayamijica Saúl lriipana lrico. Ikeena David ikjemata lritocanda mana, cayotsa lrinaitja capisho mana jalredaoca icoam lrisho. Saúl jipa cadanatsa lricaapi ricó lrimolrocon. ¹¹ Niini Saúl iocatja lrimolrocon sho David icjaolre, ima lriaco lriwaopiaca: ''Notodaotsani nomolrocon sho panti iwai nacojle.'' Yamapia lrinaitja cayon, mitsa David ipito Saúl ioya. ¹² Ikena Saúl ifiocawa David iiwana ima wa Minalri catsa lriinai, njite corrinatsa wa Minalri lriofa Saúl iinai. ¹³ Cayotsa Saúl jita David lriemacawa pia lripeyajle: lricadeenacjan David carró natalricanaa nja mil tsolrodaonai. Cayopiatsa David iawa njite lridia tsenacja napeyajle nja lritsolrodaonai aimadan. ¹⁴ Njite matsia mana David iacawa coca nacocatsa lrinaitja ima lriinai catsa wa Minalri. ¹⁵ Saúl icapa cádanaco matsiacatsa David iacawa nanaco njaji lrinaitjalri, corri lrianji coanca lricapa cádanacon. ¹⁶ Mitsa pjiomi njaji Iraelitanai njite nja Judánai napeyo nacapaca David, ima jlia mana iawa napeyajle nja tsolrodaonai naacádanco njite nadiá cádanaco tsacja. ¹⁷ Niini Saúl iaco David isho: ''Arroatsa noito pjerroti , Merab. Noaotsa piinoano. Icaamitsa nooma mafiocaca pjia nosho pinaitjá carró oowi wa Minalri iipitana nacó.'' Ima Saúl iaco iwaopiaca: ''Corritsa njoá carro iinon, njaotsa iinon nja filisteonai'' ¹⁸ Njite David iaco Saúl isho: ''¿Cocao njoá, Cocao nocafica, o coandalrica njonirri iipaneeta Irael ricó, njoá carrontja lritsimarre jliaji talricanaati? ¹⁹ Mitsa lrioca cádanaco jlinaana Saúl iacantja lriito Merab David isho, lrienacjano Adriel meholatita inoano. ²⁰ Mitsa Mical, Saúl iito iwedoati, ropeyo David. Nacaite Saúl jimi, njite matsia Saúl jimican. ²¹ Njite lriwaopia lricjoete: ''Nocadaotsa lrishono, romá carroatsa lriofawa, njaa carroatsa inon nja filisteonai. Njite David iaco yamapiashopa David isho: ''Notsimarreotsa pjia.'' ²² Saúl inaa caacoca nja lrishoperri cayoji: ''Caacoatsa jia david iapiya dawacaitsa, njite icaiteotsa lrisho cayoji: Jliaji wa talricanaa matsia lricapaca pishó, caitsacja nja lrishoperri. Panaya, washa pjita sho lriito, talricanaati itsimarré carro pjia.'' ²³ Niini njaji Saúl ishoperri nacaite jlimi njaji iacoti inaalri nacaiteca David isho. Niini David jiepana: ''¿Capja iwada mjerrapitinaa catsa pasho talricanaati itsimarreca pja, atsia cjenaadalrica njoa, cocantja matsia icjaote nacapaca nosho?'' ²⁴ Njite njaji Saúl ishoperri nacaite jlimi coanca David icaiteca. ²⁵ Njite Saúl iaco nasho: ''Cayoatsa iaco David isho: Jliaji talricanaati cotsa coca lrioma piinai, icaamitsa lriomalrica piinai cien idakiti iyam atsianai filisteonai iyaapem, cayotsa lriomaca lricoadao naoya nja lricoema. ²⁶ Saúl ishoperri icaite cádanaco David jími njaji iacoti, matsiatsa David jimica nja iacoti talricanaati itsimarré carron. ²⁷ Niini David iawa naapiya njaji lritsolrodaonai, njite lriino dociento atsianai filisteonai. Niini lriyoaca naki iyam nja atsianai filisteonai, njite lriá pjiomina Saúl isho, ima cayotsa lrisoca lrinaitjaca Saúl itsimarré carron. ²⁸ Niini Saúl iá lriito Mical David iinowa. Saúl icapa cádanaco, njite lrianjíi tsacja David iinai catsa wa Minalri, njite lriito Mical iomani, ²⁹ Saúl ifió pjaawa David iiwana. Njite corrí yaami Saúl jipondataca David. ³⁰ Njite njaji caaconaperri filisteonai naa nainoacawa, ima namotoca icoam oowi ricó matsia pja David iacawa naoya njaji Saúl ishoperri, niini catjinaaca David iipitana nasho.