¹ Катар иклон мариба тай катар крамола машкар туменде? Ма отар ли, тумаре сластиендар, колато воювинен анде тумаре телесноне частиенде? ² Туме пожелавинен, но нанай тумен; ревнувинен тай завиждинен, но нанащи получинен; ден тумен тай марен тумен; но нанай тумен, соскето нана манген. ³ Манген, но нана получинен, соскето зле манген, за те разпилинен лес андо сластя тумаре. ⁴ Прелюбодейция! Нана жанен ли, кай о амалипе е светоса си вражда против о Дел? Тай чука, който мангел те овел амал е светоске, ачол врагос е Девлеске. ⁵ Или мислинен, кай би нуждакоро пенел о Писание, кай о "Дел тай жи ки завист ревнувинел за е Духоске", Ковато вложингяс те живинел анде аменде? ⁶ Но Ов дел иек по-бари благодат; далкеске пенел: ,, О Дел е горделивоненге противинел пес, а е смиреноненге дел благодат". ⁷ Тай чука, покоринен тумен е Девлеске, но противинен тумен е бенгеске, тай ов ка нашел тумендар. ⁸ Приближинен тумен жи ко Дел, тай ка приближинел пес Ов жи туменде. Товен тумаре васта,туме о грешна, тай очистинен тумаре сърца, туме о колеблива. ⁹ Тъжинен, ридайнен тай ровен; тумаро асаиба нека иринел пес роибнасте тай тумаро лошаиба - тъгате. ¹⁰ Смиринен тумен англал о Дел тай Ов ка възвишинел тумен. ¹¹ Ма одумвинен тумен иек авересте, пралален; ковато одумвинел е пралес или съдинел пе пралес; одумвинел о закони тай съдинел о закони; а ако съдинес о закони, на синян изпълнители е закониеске, но съдияс. ¹² Само йек си Законодатели тай Съдияс, Ковато ащи спасинел тай те погубинел; а ту кова синян, кай съдинес те ближнонес? ¹³ Шунен акана туме, колато пенен: Авдиес или тася ка жас андо еди-кова си градос, ка бешас оте иек бреш, ка търгувинас тай ка печелинас - ¹⁴ като туме нана жанен со ка овел тася. Со си тумаро животос? Соскето туме синиен пара, която за хари явинел пес тай после изчезнинел. ¹⁵ Вместо давка туме требе те пенен: Ако мангел о Дел, аме ка живинас тай ка керас кавка или ковка. ¹⁶ Но акана славно си туменге те хвалинен тумен. Всеко савка хвалене си зло. ¹⁷ Тай чука, ако декой жанел те керел лачипе тай нана керел лес, лескоро грехос си.