¹ Шунен акана, туме о барвале, ровен тай ридайнен ашал о бедствия, колато авен упрал туменде. ² Тумаро барвалипе кернило, тай тумаре шехя си хале таро молци. ³ Тумаро златос тай среброс ръждависало; тай ленгири ръжда ка свидетелствинел против туменде тай ка хал тумаре маса сар яг. Туме кидингиен съкровища ко последна диеса. ⁴ Аке, и заплата е работникиенгири, колато жънинде тумари нива, колатар лишингиен лен, пищинел; тай о пищес е жетвариенгере дине андо кана е Девлеске е силенгоро. ⁵ Туме живингиен ки пув разкошно тай разпуснато, угоингиен тумаре сърца дори андо диес на клане. ⁶ Осъдингиен, мударгиен е праведнонес; тай ов нана противисало туменге. ⁷ Тай чука, пралален, ачовен зорале жи ко пришествие е Девлескоро. Аке, о земеделцос очаквинел о скъпоцено плоди тари пув тай търпинел за леске, жи кай задел о ранно, тай о късно бришим. ⁸ Ачовен тумеда зорале, укрепинен тумаре сърца; соскето е Девлескоро пришествие наближингяс. ⁹ Ма роптайнен иек против иекесте, пралален, за тена овен осъдиме; аке, о Съдияс бешел англал о вудара. ¹⁰ Пралален, лен примериеске за злостраданиеске тай зоралипнаске е пророкиен, колато хоратиненас анде Девлескоро алав. ¹¹ Аке, облажинас колкен, колато ачиле зорале. Шунгиен за о търпение на Йов тай диклен и сетнина, въздиме леске таро Дел, кай о Дел си бут жалостиво тай милостиво. ¹² А англал о всичко, пралален мере, ма хан совеля нито андо небес, нито анди пув, нито десаве авере совеляса; но нека тумаре хоратес те овен: ,, Ва, ва", тай ,, Нака, нака", за тена перен телал о осъждение. ¹³ Зле ли страдинел декой тумендар Нека гилябел хваления. ¹⁴ Насвало ли си декой тумендар Нека викинел е кангерякере презвитериен тай нека молинен пес упрал лесте тай те помажинен лес маслоса анде е Девлескере алавесте; ¹⁵ тай и молитва, която си вяраса, ка избавинел е страдалециес, о Дел капривдигнинел лес тай ако кергяс грехове, ка простинел пес леске. ¹⁶ Тай чука, изповединен иек авереске тумаре грехове тай молинен тумен иек авереске, за те оздравинен. Бари сила иси ки усърдно молитва е праведнонеске. ¹⁷ О Илия сине мануш е същоне естествоса сар аменде; тай молисало усърдно тена дел бришим, тай на диняс бришим ки пув трин бреш тай шов масек; ¹⁸ тай пак молисало, тай о небес диняс бришим, тай и пув произведингяс по плоди. ¹⁹ Пралален мере, ако декой тумендар отклонинел пес тари истина тай иек иринел лес, ²⁰ нека жанел, кай който ирингяс е грешнонес таро заблудиме дром леске, ка спасинел душа таро мериба тай ка покринел множество безеха.