¹ А о Савел, като още дишинелас заплахес тай мудариба против о Господна ученикия, гело ко първосвещеники ² тай манглас лестар писма жи ко синагогес андо Дамаск, чука кай ако аракел декас те следвинел давка учение, мруша или жувла, те анел лен панле андо Ерусалим. ³ Тай ко жаиба, като приближинелас о Дамаск, внезапно блеснингяс около лесте светлина таро небес. ⁴ Тай като пело ки пув, шунгяс гласос, ковато пенгяс леске: Савле, Савле, соске гонинес Ман? ⁵ А ов пучлас: ,,Кова синян ту, Господине?" Тай о Дел пенгяс: ,,Ме синиом о Исус, Колес ту гонинес. Мъчно си за туке те ритинес мамуял ръжена. ⁶ Но ухти, де андо градос тай ка пенелпес туке со требе те керес. ⁷ А о мруша, колато придружиненас лес, бешенас сар вцепениме, понеже шунде о гласос, а на дикле никас. ⁸ Тай о Савел ухтинило тари пув, тай като путергяс пе яка, нана дикелас нищо; тай ингаленас лес вастестар, тай ингалде лес андо Дамаск. ⁹ Тай трин диес нана дикелас, тай нито халас, нито пиляс. ¹⁰ А андо Дамаск исине иек ученики ко алав Анания; тай о Дел пенгяс леске андо видение: Анание! А ов пенгяс: Акеталом, Девла. ¹¹ Тай о Дел пенгяс леске: Ухти, тай жа ки улица, която пенел пес Права, тай пуч ко кер е Юдаске иеке тарсаниеске ко алав Савел; соскето, аке, ов молинел пес; ¹² тай диклас иеке манушес ко алав Анания, те дел тай те полагинел васта упрал лесте, за те задикел. ¹³ Но о Анания отговорингяс: Девла, шунгиом таро мнозина калке манушеске кити злини кергяс Тере светииенге андо Ерусалим. ¹⁴ Тай ате исине лес власт таро главна свещеникия те пандел саворен, колато призовинен Торо алав. ¹⁵ А о Дел пенгяс леске: Жа, соскето ов си Манге съдос, избириме те разгласинел Моро алав англал о народос тай тагара, тай англал о израилания; ¹⁶ соскето Ме ка покажинав леске кити бут ов требе те страдинел Ме алавеске. ¹⁷ Тай чука, о Анания гело тай диняс андо кер; тай като положингяс васта упрал лесте, пенгяс: Прала Савле, о Дел бичалгяс ман - о също Исус, Ковато явисало туке ко дром, колесте ту авесас, - за те задикес тай те изпълнинес тут е Святоне Духоса. ¹⁸ Тай ко сахати пеле таро яка леске сар люспес, тай ов задиклас; тай ухтинило тай кръстисало. ¹⁹ А като халяс, добингяс сила тай бешло неколко диеса е ученикиенца андо Дамаск. ²⁰ Тай веднага почнингяс те проповединел ко синагогес, кай о Исус си о Божие Чаво. ²¹ Тай саворе, колато шуненас лес, удивиненас пес тай пененас: Нанай ли кавка, ковато андо Ерусалим съсипинелас калкен, колато призовинен кавка алав, тай ало ате, за те ингалел салке панлен ко главна свещеникия? ²² А о Савел изпълнинелас пес все по буте силаса тай чивелас андо смути е юдеиен, колато живиненас андо Дамаск, като докажинелас, кай Кавка Исус си о Христос. ²³ Тай като накле доста диеса, о юдея наговоринде пес те мударен лес; ²⁴ но ленгоро заговори ачило известно е Савелеске. Тай он даже дебниненас о портес о диес тай ират, за те мударен лес, ²⁵ но лескере ученикия лиле лес ират тай ухлавде лес презал и стена, като мукле лес кошоса. ²⁶ Тай като ало андо Ерусалим, ов стараинелас пес те дружинел е ученикиенца; ама саворе даранас лестар, понеже нана верувиненас, кай си ученики. ²⁷ Но о Варнава лилас лес тай ангяс лес ко апостола, тай разкажингяс ленге сар диклас е Девлес ко дром, тай кай хоратингяс леске, тай сар андо Дамаск дързостно проповединелас андо Исусово алав. ²⁸ Тай ов иклолас тай делас ленца андо Ерусалим, като дързостно проповединелас андо Господно алав. ²⁹ Тай хоратинелас тай препиринелас пес е гръцконе юдеиенца; а он роденас случай те мударен лес. ³⁰ Ама о прала, като ахалиле давка, ингалде лес анди Цезария тай бичалде лес андо Тарс. ³¹ Тай чука ки цело Юдея, Галилея тай Самария ки кангери исине мири тай назидинелас пес, тай като пирелас анди дар таро Дел тай анди утеха е Святоне Духоске, умножинелас пес. ³² Тай о Петър, като обикаланелас саворе вярващонен, ухлило жи ко светииес, колато живиненас андо Лида. ³³ Тай оте араклас иеке манушес, ко алав Еней, ковато сине анде танесте охто бреш, понеже сине парализириме. ³⁴ Тай о Петър пенгяс леске: Еней, о Исус Христос изцелинел тут; ухти, оприне то тан. Тай ов ухтинило веднага. ³⁵ Тай саворе, колато живиненас андо Лида тай андо Саронско полес, дикле лес тай ирисале карик о Дел. ³⁶ А андо Йопия исине иек ученичка, ко алав Тавита (ковато значинел Сърна). Кайка жувли керелас бут лаче дела тай благодеяния. ³⁷ Тай презал калке диесенде ой насвалили тай мули; тай като нанярде ла, положинде ла иеке упруне стаяте. ³⁸ Тай понеже Лида сине паше жи ко Йопия, о ученикия, като шунде, кай о Петър сине оте, бичалде жи лесте дуие манушен те помолинен лес: Ма бавине тут те авес паш аменде. ³⁹ Тай о Петър ухтинило тай гело паш ленде. Тай като ало, ингалде лес ки упруни стая; тай саворе вдовицес бешенас около лесте тай ровенас, тай покажиненас леске о бут гада тай шехя, колато керелас и Сърна, като сине ленца. ⁴⁰ А о Петър икалгяс саворен наври, коленичингяс тай молисало, ирисало карик о телос тай пенгяс: Тавито, ухти. Тай ой путергяс пе яка тай като диклас е Петрес, бешли. ⁴¹ Тай ов подиняс вас тай изправингяс ла; после викингяс е светииен тай е вдовицен тай представингяс ла ленге живди. ⁴² Тай давка ачило известно ки цело Йопия; тай мнозина повервинде андо Дел. ⁴³ А о Петър бешло дълго време андо Йопия десаве кожариесте Симон.