¹ Исине андо Цезарея иек мануш ко алав Корнилий, стотники таро чука наречиме Италийско полки. ² Ов сине благочестиво тай даралас таро Дел пе целоне кереса, разделас бут милостиниес е народоске тай непрестанно молинелас пес е Девлеске. ³ Около о еня сахати презал о диес ов диклас ясно андо видение иек ангели таро Дел, ковато диняс паш лесте тай пенгяс леске: Корнилий! ⁴ А ов, като задиклас пес анде лесте, даравно пенгяс: Со си, Девла? Тай о ангели пенгяс леске: Тере молитвес тай тере милостиниес ваздинде пес англал о Дел спомениеске. ⁵ Тай акана бичалгяс манушен андо Йопия те викинен е Симонес, колес наречинен още Петър. ⁶ Ов гостувинел десаве кожариесте ко алав Симон, колескоро кер си край о морес, ов ка пенел туке со требе те керес. ⁷ Тай като гело песке о ангели, ковато хоратинелас леске, ов викингяс дуиен пе слугендар тай иеке благочестивоне войникиес калкендар, колато редовно служиненас леске; ⁸ тай като разкажингяс ленге всичко, бичалгяс лен андо Йопия. ⁹ А ко следващо диес, като он пътувиненас тай приближиненас о градос, около о шесто сахати о Петър качисало ко покриви е кереске те молинел пес. ¹⁰ Тай като бокалило, мангляс те хал; ама жи кай приготвиненас, ов отнесисало духом ¹¹ тай диклас о небес путердо тай десаво съдос те ухлел сар баро платнище, мукло е штаре крайовиенге карик и пув. ¹² Анде лесте исине секаква четиринога, зверовя тай небесна птицес. ¹³ Тай ало гласос карик лесте: Ухти, Петре, заколине тай ха! ¹⁴ А о Петър пенгяс: Нисар, Девла, соскето нисар нана халом нищо мръсно тай нечисто. ¹⁵ Тай пак ало карик лесте второ дром гласос: Ковато о Дел очистингяс, ту за мръсно ма считине лес. ¹⁶ Тай давка ачило трин дром, палал далкесте о съдос ваздисало веднага ко небес. ¹⁷ А жи кай о Петрес сине андо недоумение со значинелас о видение, ковато дикласас, аке, о бичалде таро Корнилий мануша, като разпучлесас е Симоновоне кереске, зачиле англал о вудар, ¹⁸ тай като повикинде аврял, пучле: Ате ли гостувинел о Симон, колес наречинен Петър? ¹⁹ Тай жи кай о Петрес още размишлинелас е видениеске, лескоро Духос пенгяс леске: Аке, трин мануша роден тут. ²⁰ Ухти, ухли, тай жа ленца; тай нисар ма съмнявине тут, соскето Ме бичалгиом лен. ²¹ Тай чука, о Петър ухлило ко мануша тай пенгяс: Аке, ме синиом кавка, колес роден. Соске ален? ²² А он пенде: О стотники о Корнилий, мануш праведно тай ковато дарал таро Дел тай си лаче алавеса машкар о цело юдейско народос, сине уведомиме таро Дел чрез иеке святоне ангелесте те викинел тут пе кересте тай те шунел думес тутар. ²³ Тогава ов поканингяс лен андре тай нагостингяс лен. Тай ки андиавин ов ухтинило тай иклило ленца; а десаве таро прала таро Йопия придружиненас лес. ²⁴ Тай ко следващо диес дине андо Цезарея; а о Корнилий жарелас лен, като свикингясас пе енданиен тай пе близконе амален. ²⁵ Тай като делас о Петрес, о Корнилий посрещнингяс лес, пело англал лесте тай поклонисало. ²⁶ А о Петрес ваздингяс лес, тай пенгяс: Ухти; меда синиом мануш. ²⁷ Тай като хоратинелас леса, ов диняс тай араклас мнозина кидиме. ²⁸ Тай пенгяс ленге: Туме жанен кити незаконно си юдеиеске те общувинел или те дружинел с другоплеменник; о Дел обаче покажингяс манге, кай нетребе те наречинав никас мръсно или нечисто. ²⁹ Далкеске, щом викингиен ман, алом, без те възразинав; тай чука, пучав тумен, соске викингиен ман? ³⁰ Тай о Корнилий пенгяс: Преди штар диеса прекарвинавас о девето сахати в молитва кере; тай аке, англал манде зачило мануш светлоне облеклоса, ковато пенгяс: ³¹ Корнилий, тери молитва си шунди, тай тере милостиниес помнинен пес англал о Дел. ³² А акана, бичал анди Йопия те викинен е Симонес, колес наречинен Петър; ов гостувинел ко кер иеке кожариеске Симон край о морес, ов,с като ка авел, ка хоратинел туке. ³³ Тай чука, ко сахати бичалгиом жи туте тай ту кергян лачиес, кай алан. Тай чука, аме саворе присъствинас ате англал о Дел, за те шунас всичко, ковато си туке заповедиме таро Дел. ³⁴ А о Петър путергяс муи тай пенгяс: Наистина, дикав, кай о Дел нана дикел ко муи; ³⁵ но андо секо народос ковка, ковато дарал Лестар так керел о право, угодно си Леске. ³⁶ О словос, ковато Ов бичалгяс е израиленге тай благовестинелас ленге мири чрез о Исус Христос ( Ковато си Господари саворенге), ³⁷ кавка словос туме жанен, ковато палал о кръщение, проповедиме таро Йоан, разпространисало ки цело Юдея, като почнингяс тари Галилея, ³⁸ Сар о Дел помажингяс Святоне Духоса тай силаса е Исусес таро Назарет; Ковато обикаланелас те керел благодеяния тай те изцелинел саворе угнетонен таро бенг; соскето о Дел сине Леса. ³⁹ Тай аме синям свидетеля всичконаске, ковато кергяс Ов тай анди Юдейско пув, тай андо Ерусалим; Колес мудардесас, като повесинде Лес каштесте. ⁴⁰ Лес о Дел възкресингяс андо трето диес тай диняс Лес те явинел пес, ⁴¹ ма саворе народоске, а аменге- о предварително избириме таро Дел свидетеля, колато халам тай пилам Леса, след като възкръснингяс таро муле. ⁴² Тай заповедингяс аменге те проповединас е народоске тай те свидетелствинас, кай Ов си определиме таро Дел Съдия е живденге тай е муленге. ⁴³ За Леске свидетелствинен саворе пророкия, кай секой, който повервинел анде Лесте, ка получинел чрез Лескере алавесте опрощение пе безехенге. ⁴⁴ Жи кай о Петрес още хоратинелас калка думес, о Свято Духос ухлило саворенде, колато шуненас о словос. ⁴⁵ Тай о обрежиме вярваща, колато але е Петреса, смаинде пес, кай о дари, Свято Духос, излеингяс пес ко езичникия да; ⁴⁶ соскето шуненас лен те хоратинен чужда чиба тай те величаинен е Девлес. Тогава о Петрес захоратингяс: ⁴⁷ Ащи ли декой те забранинел о пани, тена кръстинен пес калка, колато приеминде о Свято Духос, сарто амеда? ⁴⁸ Тай заповедингяс те овен кръстиме андо алав на Исуса Христа. Тогава примолинде пес леске те бешел неколко диеса ленде.