¹ Тай о апостола тай о прала, колато сине анди Юдея, шунде, кай о езичникя да приеминде о Божие словос. ² Тай като о Петрес диняс андо Ерусалим, колка, колато сине таро обрежиме, укориненас лес, като пененас: ³ Паш необрежиме манушенде динян тай халан ленца. ⁴ А о Петрес долгяс тай изложингяс ленге наред со ачило, като пенгяс: ⁵ Ме улом на молитва андо градос Йопия тай отнесиме духом, диклом видение: иек съдос сар баро платнище ухлелас, мукло е штаре крайовиенге таро небес, тай ресло дори жи манде. ⁶ Анде лесте, като задикломан тай разсъждинавас, диклом е пувякере четиринога, зверовя тай влечугес, тай небесна птицес. ⁷ Шунгиом още гласос, ковато пенгяс манге: Ухти, Петре, заколине тай ха! ⁸ Но ме пенгиом: Нисар, Господи, соскето никога нана диняс ан ме мосте варесо мръсно или нечисто. ⁹ Обаче пак гласос таро небес отговорингяс: Ковато о Дел очистингяс, ту за мръсно ма считине лес. ¹⁰ Давка ачило трин дром, палал далкесте всичко цидисало пак ко небес. ¹¹ Тай аке, ко също сахати трин мануша, бичалде таро Цезарея жи манде, пристигнинде англал о кер,анде колесте улам. ¹² Тай о Духос пенгяс манге те жав ленца тай нисар тена керав разлика машкар о мануша, а манца але калка шов прала, тай диням андо кер е манушеске. ¹³ Тай ов разкажингяс аменге сар диклас ангелес те бешел андо кер леске тай те пенел: Бичал манушен андо Йопия те викинен е Симонес, колес наречинен Петър; ¹⁴ ов ка пенел туке думес, чрез коленде ка спасинес тут ту тай то цело кер. ¹⁵ Тай като почнингиом те хоратинав, о Свято Духос ухлило ленде, сарто аменге да отначало. ¹⁶ Тогава диниоман годи о хоратес е Девлескере сар пенел: " О Йоан кръстинелас паниеса; а туме ка овен кръстиме е Святоне Духоса." ¹⁷ Тай чука, ако о Дел диняс о също дари ленгеда, като повервинде андо Господа Исуса Христа, сарто аменгеда, кова улом ме, тай те попречинав е Девлеске? ¹⁸ Като шунде давка, он престанинде те възразинен тай славиненас е Девлес, като пененас: Е езичникиенгеда о Дел диняс о покаяние е животоскоро. ¹⁹ А андо колка диеса о разпръсниме таро гонение, ковато ачило ко мудариба е Стефанеске, пътувиненас чак жи ко Финикия, Кипър тай Антиохия, като никаске авереске нана известиненас о словос, освен е юдеиенге. ²⁰ Обаче машкар ленде исине десаве кипряния тай киринейция, колато, като пристигнинде анди Антиохия, хоратиненас е гърциенгеда, тай благовестиненас Господа Исуса. ²¹ Е Девлескоро вас сине ленца тай баро брой мануша повервинде тай ирисале карик о Дел. ²² Тай ресло известие за ленге андо кана е кангеряке андо Ерусалим; тай он бичалде Варнава анди Антиохия, ²³ ковато, като ало тай диклас о делос е Девлескири благодат, лошангяс тай увещинелас саворен те постоянствинен андо Дел непоколебимоне сърцеса. ²⁴ Понеже ов сине лачо мануш, пердо Святоне Духоса тай вяраса; тай значително множествос прибависало карик о Дел. ²⁵ Тогава ов гело андо Тарс те родел е Савелес; ²⁶ тай като араклас лес, ангяс лес анди Антиохия; тай като киденас пес е кангеряса цело бреш, поучиненас значителноне множествос. Тай първо анди Антиохия о ученикия наречисале християния. ²⁷ Тай презал калке диесенде ухлиле пророкия таро Ерусалим анди Антиохия, ²⁸ иек колендар, ко алав Агав, ухтинило тай обявингяс чрез о Духос, кай ка ачол бари бок ки цело пув; ковато ачилода ко диеса е Клавдийске. ²⁹ Далкеске о ученикия нарединде те бичален, секой според пе състояниесте, помощ е праленге, колато живиненас анди Юдея; ³⁰ ковато кердеда, тай бичалде ла жи ко презвитеря чрез о вас на Варнава тай Савел.