¹ Около далке времесте о тагар о Ирод тогяс васта десавенге тари кангери, зате керел ленге зло. ² Мударгяс мечиеса е Йоанескере пралес е Яковиес; ³ тай като диклас, кай си угодно е юдеиенге, уловингяс е Петрес да. Давка сине презал о диеса е безквасноне маренгере. ⁴ Тай като долгяс лес, чивгяс лес анди тъмница тай прединяс лес на четири четворки войникия те пазинен лес, намерениеса те извединен лес англал о народос палал и Пасха. ⁵ Тай чука, он пазиненас е Петрес анди тъмница; а и кангери принесинелас англал о Дел усърдно молитва за леске. ⁶ Тай презал и също рат, като о Ирод ка извединелас лес, о Петрес совелас машкар дуие войникиенде, оковиме дуие веригенца; тай стражаря англал о вудар пазиненас и тъмница. ⁷ Тай аке, иек ангели таро Дел зачило жи лесте тай светлина осияингяс и килия; тай ов като бутингяс е Петрес ко ребра, жангавгяс лес тай пенгяс леске: Ухти бързо! Тай о веригес пеле таро васта леске. ⁸ Тай о ангели пенгяс леске: Опашине тут тай ури те сандала. Тай ов кергяс чука. Тогава пенгяс леске: Ури те шехя тай ела палал манде. ⁹ Тай о Петрес иклило тай пирелас палал лесте, без те жанел, кай о кердо таро ангели си действителност, но мислинелас песке, кай дикел видение. ¹⁰ А като пренакле и първо тай и второ стража, але жи ки железно порта, която ингалел андо градос, тай ой путердили ленге коркори; тай като иклиле презал лате, накле иек улица, тай о ангели веднага оттеглисало лестар. ¹¹ Тай о Петрес, като ало песте, пенгяс: Акана наистина жанав, кай о Дел бичалгяс Пе ангелес тай избавингяс ман таро вас е Иродеске, тай всичконастар, ковато о юдейска люде очаквиненас. ¹² Тай като поразмислингяс, ало ко кер е Марияке, и дай е Йоанескири, колес наречиненас Марк, кате уле кидиме мнозина те молинен пес. ¹³ Тай като похлопингяс ки порта, иек слугиня ко алав Рода иклили те шунел кой си. ¹⁴ Тай щом пенджаргяс е Петрескоро гласос, лошалатар нана путергяс и порта, а прастанили тай известингяс, кай о Петрес бешел англал и порта. ¹⁵ А он пенде лаке: Ту синян денили. Но ой настоявинелас, кай давка, ковато пенел, си верно.Тогава он пенде: Кавка си лескоро ангели*. ¹⁶ А о Петрес продължинелас те хлопинел; тай като путерде, дикле лес тай смаисале. ¹⁷ А ов махингяс ленге вастеса те траниен тай разкажингяс ленге сар о Дел икалгяс лес тари тъмница. Тай като пенгяс ленге: Обадинен далкеске е Яковеске тай е праленге, иклило тай гело авере танесте. ¹⁸ А като дислило, ачило машкар о войникия смути - со ли ачило е Петрес. ¹⁹ Тай о Ирод, като родингяс лес тай нана араклас лес, рразпитвингяс е стражариен тай заповедингяс те погубинен лен. Тай ухлило тари Юдея анди Кесария, тай оте живинелас. ²⁰ А о Ирод сине бут разгневиме таро тирция тай таро сидонция; тай он але заедно паш лесте, тай като спечелинде и пере ригате е о Власт, ковато грижинелас пес за е цариескере покоенге, молиненас помирение,соскето ленгири област парварелас пес таре тагарескири. ²¹ Тай иеке определиме диесесте о Ирод, урявдо анди царско одежда, бешло ко престоли тай икергяс англал ленде реч. ²² А о народос пищингяс: Гласос е Девлескоро, а ма манушескоро! ²³ Тай понеже нана въздиняс слава е Девлеске, ко сахати иек ангели таро Дел поразингяс лес, тай уло хало таро керме тай муло. ²⁴ А е Девлескоро слово бариолас тай умножингиолас. ²⁵ А о Варнава тай о Савел, като свършинде пи служба, ирисале таро Ерусалим анди Антиохия тай лиле песа е Йоанес, колес наричиненас Марк.