¹ А десаво си мануш ко алав Анания, пе ромняса и Сапфира, бикингяс имоти ² тай задържингяс варесо тари цена пе ромнякере знаниеса; тай ангяс иек част, тай товгяс ла англал о пире е апостоленге. ³ А о Петрес пенгяс: Анание, соске изпълнингяс о Сатана то сърцес, тай те хохавес е Святоне Духос тай те задържинес тари цена е нивакири? ⁴ Жи кай бешелас небикинди, нана сине ли тери? Тай след като бикиндили, нана сине ли о парес анде тере властияте? Соске намислингян давка варесо ан те сърцесте? Нана хохагян манушен, но е Девлес. ⁵ Тай о Анания, като шунелас далка думес, пело тай издъхнингяс; тай бари дар долгяс саворен, колато шунде давка. ⁶ Тай о младежия ухтиниле, пакярде лес тай икалде лес, тай паронде лес. ⁷ Так като накле около трин сахакя, диняс лескири ромни да, без те жанел со ачило. ⁸ Тай о Петрес захоратингяс лаке: Пен манге, за зомкар ли бикингиен и нива? Тай ой пенгяс: За зомкар. ⁹ А о Петрес пенгяс лаке: Соске съгласисален те изпитвинен е Девлескоро Духос? Аке,о пире калкенгере, колато паронде те ромес, си ко вудар, тай ка изнесинен тут да. ¹⁰ Тай ой ко сахати пели ко пире леске тай мули; а о младежия, като дине, аракле ла мули, изнесинде ла тай паронде ла жи лакере роместе. ¹¹ Тай бари дар обземингяс целоне кангеря тай саворен, колато шунде давка. ¹² Тай чрез о васта е апостоленгере ачонас бут знамения тай чудеса машкар о люде ( тай он саворе уле единодушно андо Соломоново треми; ¹³ а околендар никой на смейнелас те присъедининел пес карик ленде; о люде обаче величаиненас лен; ¹⁴ тай още по-баро множество повярвала андо Дел мруша тай жувля прибависале), ¹⁵ чука че даже изнесиненас е насвален таро улицес тай товенас лен ко постелкес тай то тана, тай, като накелас о Петрес, поне лескири сянка те засегнинел декас лендар. ¹⁶ Киделас пес още множество таро градовя около о Йерусалим тай пиравенас насвален тай измъчвименен таро нечиста духовя; тай саворе изцелиненас пес. ¹⁷ Тогава ухтиниле о първосвещеники тай саворе, колато уле леса, съставляваща и садукеиско секта, тай, изпълниме със завист, ¹⁸ товде васта упрал о апостола тай положинде лен ки общо тъмница. ¹⁹ Ама ангели таро Дел машкар и рат путергяс о вудар е тъмницакоро, икалгяс лен тай пенгяс: ²⁰ Жан, зачон андо храми тай хоратинен е люденге саворе думес калке животоскере. ²¹ Он, като шунде давка, ки андиавин дине андо храми тай поучиненас. А о първосвещеники ало колкенца, колато уле леса, тай като свикинде о синедриони тай цело старейшинство е израиленгоро, бичалде анди тъмница те анен е апостолен. ²² Но о служителя, като геле, нана аракле лен анди тъмница; тай ирисале, тай известинде, тай пенде: ²³ И тъмница араклам заключиме твърде здраво тай о стражаря, кате бешенас ко вудар; ама като путергям, нана араклам никас андре. ²⁴ А о началники е храмовингере стражакере тай о главна свещеникя, като шунде далка думес, уле в недоумение тай чудиненас пес со ка следвинел далкестар. ²⁵ Ама але декой си тай известингяс ленге: Аке, о мануша, колен чикям анди тъмница, бешен андо храми тай поучинен е люден. ²⁶ Тогава гело о началники е служителенца тай ангяс лен, обаче без насилие; соскето даранас таро люде, тена замервинен лен баренца. ²⁷ Тай като анде лен, поставинде лен англал о синедриони; тай о първосвещеники пучлас лен: ²⁸ Строго забранингям туменге те поучинен анде далке алавесте; но аке, пергиен о Йерусалим тумаре учениеса тай възнамеринен те анен упрал аменде о рат Калке Манушескоро. ²⁹ А о Петрес тай о апостола в отговор пенде: Подобинел те покоринас амен е Девлеске, а ма е манушенге. ³⁰ О Дел амаре даденгоро възкресингяс е Исусес, Колес туме мударгиен, като повесингиен Лес ко каш. ³¹ Лес о Дел възвисингяс жи Пе десницате Началникиеске тай Спасителеске, те дел покаяние е Израилес о опрощение таро безеха. ³² Тай аме синям Лескере свидетеля далке букиенге, сарто си о Свято Духос, Колес о Дел диняс колкенге, колато покоринен пес Леске. ³³ А он, като шунде давка, чинионас холатар, тай възнамериненас те мударен лен. ³⁴ Ама иек фарисей ко алав Гамалиил, законоучители, почитиме саворе людендар, изправисало андо синедриони тай заповедингяс те икален аври е апостолен за хари време; ³⁵ тай пенгяс е събориеске: Израиляния, внимавйнен лачес со ка керен калке манушенге. ³⁶ Соскето ко предишна диеса въстанингяс о Тевда тай представинелас пес баре манушеске, карик колесте присъединисале около штаршел мруша на брой; ковато сине мудардо, тай саворе, колато покориненас пес леске, разпилисале тай изчезнинде. ³⁷ Палал лесте въстанингяс о галилеяни о Юда, презал о време е запишимнаске, тай отвлечингяс палал песте десавен таро люде; ов да загинингяс, тай саворе, колато покориненас пес леске, разпръснисале. ³⁸ Тай акана пенав туменге, циден тумен далке манушендар тай мукен лен; соскето, ако давка намерение или давка делос си манушендар, ка повалинел пес; ³⁹ но ако си таро Дел, нанай те ащи те повалинен лес. Пазинен тумен тена аракен тумен богопротивникя. ⁴⁰ Тай он шунде лес; тай като викинде е апостолен, марде лен тай заръчинде ленге тена хоратинен андо Исусево алав, тай мукле лен. ⁴¹ А он геле песке таро синедриони възрадвиме, за далкеске кай удостоинде пес те претърпинен опозоряване за е Исусескоро алав. ⁴² Тай нито иек диес нана престаниненас те учинен тай те благовестинен, тай андо храми, тай пе керенде, кай о Исусес си о Христос.