¹ Тай като сине решиме те отплавинас за Италия, прединиом е Павелес тай десаве авере панлен иеке стотникиеске, ко алав Юлий, таро Августово полки. ² Тай като качисалам иеке адрамитсконе корабиесте, ковато ка отплавинелас за ко тана покрай о азийско брегос, тръгнингям; тай аменца сине о Аристарх, македонцос таро Солун. ³ Околе диесесте реслам андо Сидон; тай о Юлий икерелас пес човеколюбиво карик о Павел, тай позволингяс леске те жал пе амаленде, за те погрижинен пес леске. ⁴ Тай отар, като тръгнингям, плавинасас на завет телал о Кипър, соскето о балваля сине противна. ⁵ Тай като преплавингям о Киликийско тай о Памфилийско морес, реслам андо ликийско гради Мира. ⁶ Оте о стотники араклас иек александрийско кораби, ковато плавинелас за Италия, тай качингяс амен лесте. ⁷ Тай след като плавинасас бавно бут диеса, едвам реслам мамуял о Книд, понеже и балвал нана позволинелас аменге те дас оте, тай плавинасас на завет телал о Крит мамуял о нак Салмон. ⁸ Тай като пренаклам лес мъкаса, реслам иеке танесте, ковато пенел пес Лаче Пристанища, паше жи колесте сине о градос Ласей ⁹ Но като наклосас пес бут време тай о плавиба сине вече опасно, соскето о пости* вече наклосас, о Павел съветвинелас лен, тай пенелас ленге: ¹⁰ Чавален, дикав, кай о плаване ка овел придружиме повреденца тай бари загуба ма само е товариеске тай е корабиеске, но тай амаре животоске. ¹¹ Но о стотники доверинелас пес по бут е кормчиеске тай е стопаниеске е корабиескоро, отколкото е Павелескере думенде. ¹² Тай понеже о пристанище нана сине сгодно за презимуване, по бут изкажинде по мнение те вазден пес отар, за те ресен, ако сине възможно, жи ко Феникс, критско пристанище, ковато дикел карик о югозапад тай северозапад, тай оте те презимувинен. ¹³ Тай като пудингяс южно балвал, мислиненас, кай сполучинде пи цел, он ваздинде котва тай плавиненас паше жи ко Крит. ¹⁴ Но след хари муклас пес таро острови бурно балвал, наречиме евроквилон, ¹⁵ тай като о кораби сине настигниме тари балвал, тай мамуял лесте нанащине устоинел, муклам амен ко вълни те пиравен амен. ¹⁶ Тай като наклам на завет телал иеке островчвсте, наречиме Клавда, сполучингям мъкаса те запазинас и ладия; ¹⁷ тай като икалде ла, употребиненас всекаква средства, тай препасвиненас о кораби телал; тай даранас тена овен тласниме упрал о Сиртис, свиинде о платна тай ингаленас пес чука. ¹⁸ Тай понеже улам анди бари беда тари бурия, ко следно диес долде те чивен о товари. ¹⁹ Тай ко трето диес амаре вастенца чивкям о букя е корабиескере. ²⁰ Тай понеже бут диеса нана дикиолас ни кам, ни звезди, тай и силно бурия напиринелас, ов изчезнингяс всеко надежда те овас спасиме. ²¹ А палал о дълго гладуване о Павел зачило машкар ленде тай пенгяс: Чавален, пралален, требеше те шунен ман тена тръгнинен тари Крит, за тена постигнинел амен кайка повреда тай загуба. ²² Но акана да съветвинав тумен те овен бодра, соскето ни иек душа тумендар нанай те нашалгиол, но само о кораби; ²³ соскето ангели таро Дел, Колескоро синиом ме тай Колеске служинав, зачило жи манде кайка рат тай пенгяс: ²⁴ Ма дара, Павле, ту требва те зачос англал о цезари; тай аке, о Дел подарингяс туке саворен, колато плавинен туса. ²⁵ Далкеске, пралален, овен бодра; соскето верувинав е Девлес, кай ка овел чука, саро уло манге пендо. ²⁶ Обаче аме требва те овас чивте десаве островиесте. ²⁷ А като ачили и читринайсто рат тай аме тласкинасас амен нате-ноте ко Адриатическо морес, около машкар и рат о морякия усетинде, кай приближинен пес жи ки десави суша. ²⁸ Тай като меринде и дълбочина, аракле кай си биш разтегя: тай геле по ноте, тай пак меринде тай аракле, кай си дешупанч разтегя. ²⁹ Далкеске, даранас тена овен чивте ко тана е баренца, мукле штар котвес кари задница тай жаренас те дислол. ³⁰ Тай понеже о морякия възнамериненас те нашен таро кораби, тай ухлавдесас и ладия андо морес телал о предлоги, кай ка мукенас котвес карик и предница, ³¹ о Павел пенгяс е стотникиеске тай е войникиенге: Ако калка нана ачон андо кораби, туме нанащи избавинен тумен. ³² Тогава о войникия чинде о шеле е ладиякере тай мукле ла те носинел пес таро морес. ³³ А ко разсъмване о Павел канинелас саворен те хан, тай пенел: Авдиес си о дешуштар диес сар жарен тай бешен бокале, без те вкъсингиен варесо. ³⁴ Далкеске молинав тумен те хан, соскето давка ка помагинел умаре избавлениеске; понеже никаске тумендар бал таро шеро нанай те перел. ³⁵ Тай като пенгяс давка, лилас маро, благодарингяс е Девлеске англал саворенде, пагляс лес тай почнингяс те хал. ³⁶ Далкестар саворе ободрисале тай хале онда. ³⁷ Тай андо кораби улам всичко дуи шел ефтадеш тай шов жене. ³⁸ Тай като нахранисале, облекчинде о кораби, като чивте о житос андо морес. ³⁹ Тай като дислило, он нана пенджарде и пув; обаче забележинде иек заливи песъчивоне брегоса, анде колесте възнамериненас те тласнинен о корабои, ако сине възможно. ⁴⁰ Тай като откачинде о котвес, мукле лен андо морес, развържинде още о връзкес е кормилонгере, развинде о цикно платно ки посока е балвалакири тай отправисале карик о брегос. ⁴¹ Но попаднинде иеке танесте, кате о морес марелас дуие ригендар, тай оте о кораби заседнингяс; и предница забисали тай нана мърдинелас, а и задница лилас те разглобинел пес таро напори е вълненге. ⁴² Тай о войникия съветвиненас те избинен пес о запреня, тена изплувинел декой тай те нашел. ⁴³ Но о стотники, като мангелас те избавинел е Павелес, спирингяс лен далке намерениестар тай заповедингяс те хърпинен андо морес първо колка, колато жаненас те плувинен, тай те иклон ко шукипе, ⁴⁴ а окола те спасинен пес кой ко дъски, кой па варесосте таро кораби. Тай чука ачило, кай саворе иклиле безопасно ки суша.