¹ Тогава о Агрипа пенгяс е Павелеске: Позволинел пес туке те хоратинес за туке. Тай чука, о Павел прострингяс вас тай почнингяс те хоратинел пере защитаке: ² Считинаман за честито, тагара Агрипа, за далкеске англал туте ка защитинаман авдиес относно всичко, за колеске обвининен ман о юдея, ³ а най-вече, соскето синян вещ андо саворе обредя тай разисквания машкар о юдея; далкеске молинаман туке те шунес ман търпениеса. ⁴ Тай чука, саво сине моро животос от тернярла, давка саворе юдея жанен, понеже живинавас отначало машкар ме народосте андо Ерусалим. ⁵ Соскето пенджарен ман отначало ( ако мангенас те свидетелствувинен), кай според и най-строго секта* амаро вероизповедание живингиом фарисей. ⁶ Тай акана бешав англал о съдос ашал и надежда за о обещание, ковато о Дел диняс амаре даден, ⁷ жи ко изпълнение колеске амаре дешудуи племена надявинен пес те достигнинен, като служинен е Девлеске усърдно о диес тай ират. За далке надеждаке, тагара Агрипа, обвининен ман о юдея! ⁸ Соске те сметнинел пес машкар туменде за невероятно, кай о Дел възкръсинел е мулен? ⁹ Тай ме мислинавас манге, кай требе те вършинав бут букя против о алав е Исусеске о Назаряни; ¹⁰ ковато керавас андо Ерусалим, понеже пандавас андо тъмницес мнозина таро светиес, като снабдисалом с власт таро главна свещеникия, тай за ленгере мударибнаске давас гласос против ленде. ¹¹ Тай като мъчинавас лен бут дрома андо саворе синагогес, стараинавас ман те традав лен те хулинен; тай анди прекомерно ярост против ленде гонинавас лен даже ко чужда градовя. ¹² По която бути, като пътувинавас за Дамаск с власт тай препоръка таро главна свещеникия, ¹³ ко пладне, тагара, диклом ко дром светлина таро небес, която отнакелас е камескоро блясъки, тай осияингяс манда, тай калкен, колато пътувиненас манца. ¹⁴ Тай като пелам саворе ки пув, шунгиом гласос, ковато пенелас манге на еврейски: Савле, Савле, соске гонинес Ман? Мъчно си туке те ритинес мамуял остен. ¹⁵ Тай ме пенгиом: Кова синян Ту, Девла? А о Дел пенгяс: Ме синиом о Исус, Колес ту гонинес. ¹⁶ Но ухти тай изправине тут те пиренде, понеже далкеске явисалом туке, те назначинав тут служители тай свидетели далкесте, ковато диклан, тай ковка, ковато ка откринав туке, ¹⁷ като избавинав тут таро юдейско народос тай таро езичникия, машкар коленде бичалав тут ¹⁸ те путрес ленгере яка, за те иринен пес тари тъмнина карик и светлина, тай тари власт е Сатанаке карик о Дел, тай те приеминен опрощение пе безехенге тай наследство машкар о осветиме чрез и вяра анде Манде. ¹⁹ Далкеске, тагара Агрипа, нана улом непокорно е небесноне видениеске; ²⁰ но проповедингиом първо е юдеиенге андо Дамаск, андо Ерусалим тай ки цело Юдейско пув, а после е езичникиенге, те покайвинен пес тай те иринен пес карик о Дел, като вършинен дела съответствена пе покаибнаске. ²¹ По дайка причина о юдея уловинде ман андо храми тай опитисале те мударен ман. ²² Но е помощяса, която получингиом таро Дел, бешав жи калке диесесте, тай свидетелствинав англал скромнонесте, тай англал високопоставиме, без те хоратинав нищо авер освен давка, ковато о пророкия тай о Мойсей хоратиненас, кай ка ачол ²³ а именно, кай о Помазаники ка пострадинел тай кай Ов като възкреснинел първо таро муле, ка проповединел светлина е юдейсконе народоске тай е езичникиенге. ²⁴ Като ов чука защитинелас пес, о Фест пищингяс силноне гласоса: Денилилан, Павле; ти бари ученост анел тут жи денилипнасте. ²⁵ А о Павел пенгяс: Нана денилилом, честити Фесте, но таро зорало разуми пенав истинна думес. ²⁶ Соскето о тагар, колеске хоратинав дързостно, жанел далкеске; понеже синиом убедиме, кай нищо далкестар нанай гаравдо лестар, соскето ов нана ачило десаве кътиесте. ²⁷ Тагара Агрипа, верувинес ли андо пророкия? Жанав, кай верувинес. ²⁸ А о Агрипа пенгяс е Павелеске: Хари думенца мангес те убединес ман те ачовав християни! ²⁹ А о Павел пенгяс: Ка молинавман е Девлеске, било хари думенца, било бутенца, ма само ту, но саворе, колато шунен ман авдиес, те ачон салка, саво синиом ме, но би калке оковенгоро. ³⁰ Тогава о тагар ухтинило, е управителиеса тай Верникия, тай о бешле ленца. ³¹ Тай като оттеглисале ригате, хоратиненас машкар песте, тай пенде: Кавка мануш нана вършинел нищо достойно мерибнаске или оковенге. ³² А о Агрипа пенгяс на Фест: Кавка мануш ащине те мукел пес, ако нана отнесинелас пес жи ко црзари.