¹ Палал далкесте о Павел цидингяс тари Атина тай ало андо Коринт, ² кате араклас иеке юдеиес, ко алав Акила, бияндо андо Понт, тай ма отдавна пристигнингяс тари Италия пе ромняса и Прискила, соскето о Клавдий заповедингясас те махнинен пес саворе юдея таро Рим; тай о Павел ало паш ленде. ³ Тай понеже исине лес о също занятие, бешелас ленде тай керенас бути; соскето о занятие ленгоро сине те керен шатрес. ⁴ Тай всеко събота разисквинелас анди синагога юдеиенца тай гърциенца, тай стараинелас пес те убединел лен. ⁵ А като о Сила тай о Тимотей ухлиле тари Македония, о Павел усетинелас подтики те хоратинел о словос тай заявинелас е юдеиенге, кай о Исус си о Помазаники. ⁶ Но понеже он противиненас пес тай хулиненас, ов треингяс пе шехя тай пенгяс: О рат тумаро те овел тумаре шеренде; ме синиом чисто лестар; от акана ка жав машкар о езичникия. ⁷ Тай като преместисало отар, ало андо кер десавеске, ко алав Тит Юст, ковато кланинелас пес е Девлеске тай колескоро кер сине жи ки синагога. ⁸ А о Крисп, о началники е синагогакоро, повервингяс андо Дел пе целоне кереса; тай мнозина таро коринтияния, като шуненас, верувиненас тай кръстиненас пес. ⁹ Тай о Дел пенгяс е Павелеске машкар и рат андо видение: Ма дара, а хоратине тай ма трание; ¹⁰ соскето Ме синиом туса тай никои нанай те нападнинел тут те керел туке зло; соскето иси ман бут люде калке градосте. ¹¹ Тай ов бешло оте иек бреш тай шов масек, като поучинелас лен андо Божие словос. ¹² А като о Галион сине управители анди Ахая, о юдея ваздисале единодушно против о Павел, анде лес англал о съдилище тай пенде: ¹³ Кавка убединел е манушен те кланинен пес е Девлеске, несъгласно е закониеса. ¹⁴ Но като о Павел ка путрелас муи, о Галион пенгя е юдеиенге: Ако сине въпроси десаве неправдаке или грозноне злодеяниеске, о, юдеи, разбирасе, требе те търпинав тумен; ¹⁵ но ако о въпросия си за учение, за алавенге тай за тумаре закониеске, дикен туменге коркоре, ме нана мангав те овав съдия салке букиенге. ¹⁶ Тай изпъдингяс лен таро съдилище. ¹⁷ Тогава он саворе* долде е началникиес е синагогакоро Состен, тай марде лес англал о съдилище; но о Галион нана мангелас те жанел далкеске. ¹⁸ А о Павел като бешло оте още доста време, простингяс пес е праленца тай отплувингяс за Сирия ( тай леса и Прискила тай Акила), като острижингяс по шеро андо Кенхрея, соскето динясас оброки. ¹⁹ Като ресле андо Ефес, ов муклас лен оте, а коркоро диняс анди синагога тай разисквинелас е юдеиенца. ²⁰ А като замолинде лес те бешел по бут време, ов нана склонингяс; ²¹ но простисало ленца, тай пенгяс: Но ако о Дел мангел, пак ка иринав ман паш туменде. Тай отплувингяс таро Ефес. ²² Тай като ухлило анди Цезарея, диняс андо Ерусалим, тай поздравингяс е кангеря тай после ухлило анди Антиохия. ²³ Тай като побешло оте известно времес, иклило тай обикалянелас наред и Галатийско тай и Фригийско пув, тай утвърдинелас саворе ученикиен. ²⁴ Тай десаво юдеи, ко алав Аполос, бияндо анди Александрия, мануш учено тай силно андо писания, ало андо Ефес. ²⁵ Ов сине наставиме ко Господно дром тай като сине ко духос усърдно, хоратинелас тай поучинелас прилежно е Исусеске, а пенджарелас само о Йоаново кръщение. ²⁶ Тай почнингяс те хоратинел дързостно анди синагога; но и Прискила тай Акила, като шунде лес, прибиринде лес тай изложинде леске по-точно е Девлескоро дром. ²⁷ Тай като канинела пес ов те занакел андо Ахая, о прала насърчинде лес тай пишинде жи ко ученикия те приеминен лес; тай ов, като ало, помагингяс бут е повярвалоненге чрез и благодат; ²⁸ соскето силно опровергинелас е юдеиен, и то публично, като докажинелас таро писания, кай о Исус си о Христос.