¹ А като о Аполос сине андо Коринт, о Павел,след като наклосас о упруне рига, ало андо Ефеас,кате аракляс десаве ученикен. ² Тай пенгяс ленге: Приеминген ли о Свято Духос, като повервинген? А он отговоринде леске: Даже на шунгям дали иси Свято Духос. ³ Тай пенгяс: А анде состе кръстисален? А он пенде: Андо Йоаново кръщение. ⁴ А о Павел пенгяс: О Йоан кръстинелас е кръщениеса на покаяние, като пенелас е люденге те верувинен Калкесте, Ковато ка авел палал лесте, демек, андо,Исус. ⁵ Тай като шунде давка, кръстинде пес андо алав на Господа Исуса. ⁶ Тай като положингяс о Павел васта ленде, о Свято Духос ало упрал ленде; тай хоратиненас авер чиба, тай пророкувиненас. ⁷ Тай он саворе сине около дешудуи мруша. ⁸ Тай ов диняс анди синагога, кате хоратинелас дързостно; тай андо разстояние ко трин масек разисквинелас е люденца тай увещинелас лен за е Девлескоро тагарипе. ⁹ А понеже десаве закоравиненас пес тай нана верувиненас, но злословиненас о учение англал о народос, ов оттеглисало лендар тай отделингяс е ученикиен, тай разисквинелас всеко диес анди училище ко Тиран. ¹⁰ Тай давка продължингяс дуи бреш, чука че саворе, колато живиненас анди Азия, юдея да, гърция да, шунде о Господне учение. ¹¹ Паш далкесте о Дел керелас особена велика дела чрез о васта е Павелескере; ¹² борка, кай като пиравенас ко насвале кърпес или престилкес, жи коленде докасвисало лескоро телос, о болестия махниненас пес лендар, тай о зла духовя иклонас. ¹³ А десасве таро скитаща юдея да заклинателя предприеминде те произнесинен о алав на Господа Исуса упрал калкенде, колен исине зла духовя, като пенен: Дав тумен совела андо Исус, Колес о Павел проповединел. ¹⁴ Тай машкар калкенде, колато керенас давка, сине о ефта чаве десаве юдеиескере Скева, главно свещеники. ¹⁵ Но иеквар о зло духос в отговор пенгяс ленге: е Исусес признавинав, е Павелес да жанав; но туме кола синиен? ¹⁶ Тай о мануш, анде колесте сине о зло духос, хърпингяс упрал ленде тай завладингяс лен, тай надвингяс упрал ленде, чука че нанге тай раниме нашле колке керестар. ¹⁷ Тай давка ачило известно саворе ефесконе жителенге-тай юдея тай гърция; тай дар обземингяс саворен лен, тай о алав на Господа Исуса възвеличинелас пес. ¹⁸ Тай мнозина таро повярвала авенас, тай изповединенас пес тай изкажиненас пе дела. ¹⁹ Мнозина още калкендар да, колато керенас магиес , аненас пе книгес тай таренас лен англал саворенде; тай като пресметнинде и цена ленгири, аракле, кай сине пинда хиляди сребърникия. ²⁰ Чука силно бариолас тай преобладинелас о Господно учение. ²¹ Тай като свършингяс давка, о Павел чрез о Духос решингяс те жал андо Ерусалим, след като обикалангяс и Македония тай Ахая, като пенелас: Като побешав оте, требва те дикав о Рим. ²² Тай бичалгяс анди Македония дуиен калкендар, колато помагиненас леске, о Тимотей таи о Ераст; а ов ачило още известно време анди Азия. ²³ А колке времесте ваздисало баро размирие относно о Господно дром. ²⁴ Соскето иек златари ко алав Димитри, ковато керелас сребърна моделя е Дианакере капищеске* тай анелас ма хари печалба е занятчиденге, ²⁵ като кидингяс лен да, тай колкен, колато керенас подобна букя, пенгяс: О, мрушален, туме жанен, кай калке букятар авел амаро барвалипе. ²⁶ Тай туме дикен тай шунен, кай ма само андо Ефес, но попчти анди цело Азия, кавка Павел убедингяс тай ирингяс баре множества, като пенел, кай нанай богове калка, колато си вастестар керде. ²⁷ Тай иси опасност ма само давка амаро занятие те перел андо презрение, но о капище да е великоне богиниякоро и Диана те считинел пес нисоске, тай даже те перел таро величие поро койка, колаке и цело Азия тай и вселена кланинел пес. ²⁸ Като шунде давка, он пердиле с гняв тай пищиненас, тай пенен: Велико си и Ефеско Артемида! ²⁹ Тай безредие обхванингяс е градос; тай като долде е македонциен Гай тай Аристрах, о Павлова спътникя, он мукле пес единодушно андо театъри. ³⁰ А като о Павел мангелас те дел машкар о народос, о ученикия нана мукле лес. ³¹ Чука десаве таро азийска началникия, понеже сине лескере амала, бичалде жи лесте те помолинен лес тена покажинел пес андо театъри. ³² Тай чука, иек пищиненас иек, а авер пищиненас авер; соскето и навалица сине разбъркиме тай по бут нана жаненас соске стечисале. ³³ А десаве таро народос икалде е Александрес те хоратинел, понеже о юдея посочинде лес; тай о Александър махингяс вастеса тай ка делас обяснение англал о народос. ³⁴ Но като пенджарде лес, кай си юдеи, саворе иеке гласосте пищиненас за около дуи сахакя: Велико си и Ефеско Диана! ³⁵ Тогава о градско писари, като въдворингяс тишина машкар о народос, пенгяс: Ефесяни, кова си ковка мануш, ковато нана жанел, кай о градос Ефес си пазачи е великоне Артемидаке тай о пело таро Зефс идоли? ³⁶ Тай чука, понеже давка си неоспоримо, туме требе те мирувинен тай тена керен нищо несмислено. ³⁷ А туме ангиен ате калке манушен, колато нито си светотация, нито хулинен амаре богиния. ³⁸ Ако о Димитри тай о занаятчиес, колато си леса , иси лен спори декаса, о съдилища засединен, иси съдийка чиновникия, нека съдинен пес иек авресте. ³⁹ Но ако роден варесо авер, ов ка решингиол ко редовно събрание. ⁴⁰ Соскето иси опасност те обвининен амен поради о размирие авдиес, понеже нанай нисави причина за леске; тай аме нанай те ащи оправдинас давка сборище. ⁴¹ Тай като пенгяс давка, размуклас о събрание.