¹ После пристигнингяс анди Дервия да, тай анди Листра; тай аке, оте исине иек ученики, ко алав Тимотей, чаво иеке повярвалоне еврейкакоро, тай о дад гръкос. ² Калке ученикиес исине характери, одобриме таро прала анди Листра тай Икония. ³ Лес о Павел манглас те лел песа, далкеске лилас, тай обрежингяс лес поради о юдея, колато сине колке таненде; понеже саворе жаненас, кай лескоро дад сине гръкос. ⁴ Тай като пиренас ко градовя, преденас ленге о наредбес, определиме таро апостола тай о презвитеря андо Ерусалим, за те пазинен лен. ⁵ Чука о кангеря утвърдиненас пес анди вяра тай таро диес андо диес умножиненас пес числено. ⁶ Тай о апостола пренакле и Фригийско тай и Галатийско пув, като забранисало ленге таро Свято Духос те проповединен о словос анди Азия; ⁷ тай като але жи ки Мизия, опитисале те жан анди Витания, но о Исусово духос нана позволингяс ленге. ⁸ Тай чука, като накле и Мизия, ухлиле анди Троада. ⁹ Тай явисало е Павелеске машкар и рат видение: Иек македонцос бешелас тай молинелас пес леске, тай пенелас: Ела анди Македония тай помагине аменге. ¹⁰ Тай като диклас о видение, веднага родингям случай те жас анди Македония, като алам до заключение, кай о Дел призовинел амен те проповединас о благовестие оте. ¹¹ Тай чука, като отплувингям тари Троада, отправингям амен право карик о Самотраки, ко следващо диес андо Неапол, ¹² тай отар андо Филипи, ковато си о главно гради койка част тари Македония, тай римско колония. Анде калке градосте бешлам няколко диеса. ¹³ А събота иклилам аври тари порта иеке танесте край иеке рекате, кате предположинасас кай ачол молитва; тай бешлам, тай хоратингям е ромниенге кате уле кидиме. ¹⁴ Тай десави си богоязливо жувли ко алав Лидия, таро градос Тиатир, продавачка моравоне платовиенге, шунелас; тай о Дел путергяс лакоро сърцес те внимавинел далкеске, ковато о Павел хоратинелас. ¹⁵ Тай като кръстисали ой тай лакоро кер, помолингяс амен, тай пенгяс: Ако признавинен ман верно е Девлеске, ден ан ме кересте тай бешен. Тай принудингяс амен. ¹⁶ Тай иек диес, като жасас ко молитвено тан, ресли амен иек слугиния, която сине ла предсказвателно духос тай чрез пе врачувимнасте анелас бари печалба пе господариенге. ¹⁷ Ой пирелас палал о Павел тай палал аменде тай пищинелас, тай пенелас: Калка мануша си слуги е Всевишноне Девлеске, колато проповединен туменге дром за спасение. ¹⁸ Давка ой керелас бут диеса нангле. А понеже бут дотегнингяс е Павелеске, ов ирисало тай пенгяс е духоске: Заповединав туке андо алав на Исуса Христа те иклос латар. Тай иклило ко също сахати. ¹⁹ А о господария лакере, като дикле, кай иклили ленгири надежда печалбаке да, долде е Павелес тай Сила тай ингалде лен ко пазари англал о началникя. ²⁰ Тай като ингалде лен ко градска съдиес, пенде: Калка мануша си юдея тай бут смутинен амаро гради, ²¹ като проповединен обичаи, колато нанай позволиме аменге, сар римляния, те приеминас или е пазинас. ²² Тогава и талпа вкупом ваздисале против ленде тай о градска съдиес разкъсинде ленгере шехя, тай заповединде те марен лен тоягенца. ²³ Тай като марде лен бут, чивте лен анди тъмница тай заповединде е тъмничнияне началникиеске те пазинел лен здраво; ²⁴ а ов като получингяс сайка заповед, чивгяс лен ки по-андруни тъмница тай стегингяс лачес ленгере пире андо клади. ²⁵ Но машкар и рат, като о Павел тай Сила молиненас пес тай гилябенас химня е Девлеске, а о затворникя шуненас лен, ²⁶ внезапно ачило баро труси, чука че о основес е тъмницакере поклатисале; тай веднага саворе вудара путердиле, тай о оковес саворенгере развържисале. ²⁷ Тай о началники, като ухтинило тай диклас о тъмнична вудара путерде, измъкнингяс по мечи тай ка мударелас пес, като мислинелас кай о затворникя нашле. ²⁸ Но о Павел пищингяс силноне гласоса: Ма кер нисаво зло туке, соскето саворе синям ате. ²⁹ Тогава о началники манглас светилос, хърпингяс андре тай като издралас пело англал о Павел тай Сила; ³⁰ тай ингалгяс лен аври, тай пенгяс: Господа, со требе те керав, за те спасинав ман? ³¹ А он пенде: Повервине андо Дел Исуса Христа, тай ка спасинестут-ту тай то кер. ³² Тай хоратиненас е Девлескоро учение леске тай саворенге, колато сине андо кер леске. ³³ Тай ов лилас лен ко също сахати машкар и рат, тай истогяс ленгере ранес; тай без забава кръстингяс пес, ов тай саворе лескере. ³⁴ Тай като ингалгяс лен пе кересте, товгяс ленге софра; тай повярвало андо Дел, лошангяс пе целоне кереса. ³⁵ А като разсъмнисало, о градска съдиес бичалде е палачиен те пенен: Мук колке манушен. ³⁶ Тай о началники съобщингяс о думес е Павелеске, тай пенел: О градска съдиес бичалде те мукас тумен; акана иклон тай жан туменге мириеса. ³⁷ Но о Павел пенгяс ленге Марде амен публично, без те овас осъдиме, амен, колато синям римляния, тай чивте амен анди тъмница; тай акана тайно ли икален амен? Чука нана ачол; но он нека авен те икален амен. ³⁸ Тай о палачия съобщинде далка думес е градсконе съдиенге; а он, като шунде, кай уле римляния, дараниле; ³⁹ тай але, тай помолинде лен те овен снизходителна, тай като икалде лен, поканинде лен те жан песке таро гради. ⁴⁰ А он, като иклиле тари тъмница, дине андо Лидиини, тай като дикле е прален, увещинде лен, тай занакле песке.