¹ А десаве ухлиле тари Юдея тай учиненас е прален, тай пененас: Ако нана обрежинен тумен според о Мойсеево обреди, нанащи те спасинен тумен. ² Тай чука като ачили ма хари препирня тай разискване машкар ленде тай о Павел тай Варнава, о прала нарединде о Павел тай о Варнава, тай десаве авер лендар те ден далке въпросиеске андо Ерусалим жи ко апостола тай о презвитеря. ³ Тай он, бичалде тари кангери, накенас презал и Финикия да тай презал и Самария, като разкажиненас за е ирибнаске е езичникиенгоро тай породиненас бари лошали андо саворе прала. ⁴ А като ресле андо Ерусалим, уле приемиме тари кангери тай таро апостола тай о презвитеря, тай разкажиненас всичко, ковато о Дел керелас чрез ленде. ⁵ Но, пенде он, десаве таро повярвала машкар и фарисейско секта ухтиниле тай пенде: Нужно си те обрежинен пес о езичникия тай те заръчинел пес ленге те пазинен о Мойсеево закони. ⁶ Тогава о апостола тай о презвитеря кидисале те разисквинен давка въпроси. ⁷ Тай след бут разискваня о Петрес ухтинило тай пенгяс ленге: Пралален, туме жанен сар ко ранна диеса о Дел избирингяс машкар туменде ман, соскето о езичникия чрез мере мосте те шунен о евангелско учение тай те повервинен. ⁸ Тай о сърцевидцос о Дел засвидетелствингяс ленге пери милост, като диняс ленда о Свято Духос, сарто амен; ⁹ тай нана кергяс нисави разлика машкар аменде тай ленде, като очистингяс ленгере сърца чрез и вяра. ¹⁰ Тай акана соске изпитвинен е Девлес, тай те налагинен ки шия е ученикинге хомоти ковато нито амаре дада, нито аме ащине пиравас? ¹¹ Но верувинас, кай аме ка спасинас амен чрез и благодат е Девлескири е Исусескири, също сарто он да. ¹² Тогава о цело множествос млъкнингяс тай шунелас Варнава тай Павел те разкажинен саве знамения тай чудеса о Дел кергясас чрез ленде машкар о езичникия. ¹³ Тай след като свършинде те хоратинен, о Яков лилас и дума тай пенгяс: Пралален, шунен ман. ¹⁴ О Симон обяснингяс по саво начини о Дел по нангле посетингяс е езичникиен, за те лел машкар ленде люде за Пере алавеске. ¹⁵ Далкеса си съгласна о пророческа думес, сарто си пишиме: ¹⁶ " След далкесте ка иринав ман тай пак ка въздигнинав и паднало Давидово скиния, тай пак ка издигнинав лакере развалини, тай ка изправинав ла; ¹⁷ за те роден е Девлес о останала мануша тай саворе народос, колато пенен пес мере Алавеса, ¹⁸ пенел о Дел, Ковато керел те овел известно давка таро векос." ¹⁹ Далкеске ме синиом ко мнение тена създас трудностия далкенге машкар о езичникия, колато иринен пес карик о Дел; ²⁰ Но те пишинас ленге те въздържинен пес таро осквернение чрез о идола, чрез о блудство тай чрез о удавиме хабе* тай о рат. ²¹ Соскето още таро пурано време ко саворе градовя сине салка, колато проповединде е Мойсеескоро закони, ковато четинел пес всеко събота андо синагогес. ²² Тогава о апостола тай о презвитеря е целоне кангеряса аракле лачес те избиринен машкар песте манушен тай те бичален лен анди Антиохия е Павелеса тай е Варнаваса, а именно: о Юда, наречиме Варсава, тай Сила, водителя машкар о прала. ²³ Тай пишинде ленге лендар о следно: Таро апостола тай таро по-пуре прала поздрави жи ко прала, колато си таро езичникия анди Антиохия, Сирия тай Киликия. ²⁴ Понеже шунгям, кай десаве, колато иклиле амендар, разтревожинде тумен пе думенца, тай смутинде тумаре души, сарто пенен туменге те обрежинен тумен тай те пазинен и закони, без те приеминде заповед амендар, ²⁵ то аме, като алам жи ко единодушие, араклам за лачес те избиринас мрушен тай те бичалас лен жи туменде заедно амаре любимциенца о Варнава тай о Павел, ²⁶ мануша, колато рискувинде по животос за е алавеске амаре Девлескоро Исус Христос ²⁷ Тай чука, бичалас Юда тай Сила те съобщинен туменге он да устно о съща букя. ²⁸ Соскето диклас пес лачес е Святоне Духоске тай аменге тена налагинас туменге десави авер тегота, освен о следна необходима букя: ²⁹ Те въздържинен тумен таро хабе на идоложертвено, рат тай удавено*, също таро блудство; колендар, ако пазинен тумен, лачес ка овел туменге. Здравейте! ³⁰ Тай чука, о бичалде ухлиле анди Антиохия тай като кидинде саворе вярващонен, дине лен о послание. ³¹ Тай он, като четинде лес, лошанде е успокоимнаске, ковато делас лен. ³² А о Юда тай Сила, колато сине пророкия да, увещиненас е прален буте хоратенца тай утвърдинде лен. ³³ Тай след като бешле оте известно време, о прала мукле лен мириеса те иринен пес колкенде, колато бичалдесас лен. ³⁴ Но о Сила араклас за лачес те бешел още оте. ³⁵ А о Павел тай о Варнава ачиле анди Антиохия тай заедно авере мнозинствоса поучиненас тай проповединенас о Господно учение. ³⁶ А след няколко диесенде о Павел пенгяс на Варнава: Те иринас амен акана ко саворе градовя, кате проповедингям о Господно учение, тай те дикас о прала сар си. ³⁷ Тай о Варнава сине ко мнение те лен песа е Йоанес, наречиме Марк; ³⁸ а о Павел нана аракелас за лачес те лен песа калкес, ковато отделисалосас лендар още тари Памфилия, тай нана гело ленца ко делос. ³⁹ Тай чука, възникнингяс разпра машкар ленде, чука че он разделисале иек аврестар; тай о Варнава лилас Марк тай отплувингяс андо Кипър, ⁴⁰ а о Павел избирингяс песке Сила тай тръгнингяс, препоръчиме таро прала е Девлескири благодат. ⁴¹ Тай накелас презал и Сирия тай Киликия тай утвърдинелас о кангеря.