¹ А андо Икония он дине заедно анди юдейско синагога тай чука хоратиненас, кай повервингяс баро множествос юдея тай гърция. ² А о непокорна е Девлеске ко учение юдея подбудинде тай раздразнинде о души е езичникиенгере против о прала. ³ Но он пак бешле оте доста време тай дързостно хоратиненас е Девлеске, Ковато свидетелствинелас е словоске за Пере благодатаке, като делас те керен пес знамения тай чудеса чрез ленгере вастенде. ⁴ Тай о множествос андо градос раздвоисало; иек сине е юдеенца, а авер е апостоленца. ⁵ Тай като породисало стремежи андо езичникия тай о юдея, ленгере началникиенца, те опозоринен лен тай те мударен лен баренца, ⁶ он ахалиле тай нашле андо ликаонска градовя Листра тай Дервия тай ленгере околноне таненде, ⁷ тай оте проповединенас о благовестие. ⁸ А анди Листра бешелас десаво мануш, немощно ан пе пиренде, куцо от таро бяниба, ковато нисар нана пиргяс. ⁹ Ов шунелас е Павелес, като хоратинелас; а о Павел, като задиклас пес анде лесте тай диклас, кай иси лес вяра те овел изцелиме, ¹⁰ пенгяс силноне гласоса: Ухти право те пиренде! Тай ов хърпингяс тай пирелас. ¹¹ А о народос, като диклас со кергяс о Павел, пищингяс силноне гласоса, тай пенгяс по ликаонски: О Богове, оприличиме манушенде, ухлиле паш аменде. ¹² Тай наречиненас о Варнава Зевс, а е Павелес Хермес, понеже ов сине о главно говорители. ¹³ Тай о жреци ко Зевсово капище, ковато сине англал о градос, тай ангяс теловя тай ангяс венци ко портес, тай заедно е народоса канинелас пес те принесинел жертва. ¹⁴ Като шунде давка о апостола о Варнава тай о Павел, раздеринде пе шехя, хърпинде машкар о народос тай пищинде, тай пенде: ¹⁵ О, мрушален, соске керен давка? Амеда синям мануша същоне естествостар сар туменде, тай благовестинас туменге те иринен тумен калке суетендар карик о живдо Дел, Ковато създиняс о небес, и пув, о морес, тай всичко, ковато иси анде ленде; ¹⁶ Ковато презал о минала поколения мукелас саворе народос те пирен пере дроменде, ¹⁷ ако тена да престанинелас те свидетелствинел за Песке, като керелас лачипе тай делас тумен таро небес бришимда тай родовита времена, тай перелас тумаре сърца хабнаса тай веселбаса. ¹⁸ Тай като пененас давка, он едвам спиринде о множествос тена принесинел ленге жертва. ¹⁹ Машкар далкесте, але юдея тари Антиохия тай Икония, колато убединде е народос; тай он марде е Павелес баренца, тай извлечинде лес наври таро градос, като мислиненас, кай муло. ²⁰ А като о ученикия още бешенас около лесте, ов ухтинило тай диняс андо градос; тай ки андиавин гело е Варнаваса андо Дервия. ²¹ Тай след като проповединенас о благовестие анде калке градосте тай придобинде бут ученикия, иринде пес андо Листра, Икония тай Антиохия, ²² тай утвърдиненас о души е ученикиенгере, като увещиненас лен те постоянствинен анди вяра, тай учиненас лен, кай презал буте скърбенде требе те дас андо Божие тагарипе. ²³ Тай след като ръкоположинде ленге презвитерия всеконе кангеряте тай помолинде пес постиеса, препоръчинде лен е Девлеске, анде Колесте повервинде. ²⁴ Тай като накле презал и Писидия, але анди Памфилия; ²⁵ тай възвестинде о учение анди Перга, тай ухлиле анди Аталия. ²⁶ Отар отплувинде карик и Антиохия, катар уле препоръчиме е Девлескере благодатаке за е делоске, ковато акана кердесас. ²⁷ Тай като пристигнинде тай кидинде и кангери, он разкажинде всичко, ковато кергяс о Дел чрез ленде, тай сар путергяс е езичникиенге вудар, за те повервинен. ²⁸ Тай оте бешле доста време е ученикиенца.