¹ Тай чука, пралален, молинас тай увещинас тумен андо Дел о Исус, сарто сиклилен амендар сар требе те живинен тай те угодинен е Девлеске (сарто живиненда), чука те преуспеинен по бут тай по бут. ² Соскето жанен саве заръкес диням тумен таро алав е Девлеске о Исус. ³ Понеже давка си и Божие воля - амаро освещение: те въздържинен тумен таро блудство; ⁴ те жанел секой тумендар сар те лел песке ромня* анди святост тай почест, ⁵ а ма анди страстно похота, сар о езичникия, колато на пенджарен е Девлес; ⁶ тай тена престъпинел никой, тай те покваринел пе пралес анде калке варесосте; соскето са всичконаске далкеске о Дел си мъздовъздатели, сарто по-нангле пенгям туменге тай уверингям тумен. ⁷ Соскето о Дел на призовингяс амен карик и нечистота, а карик и святост. ⁸ Соскето, който отчивел давка, на отчивел е манушес, а е Девлес, Ковато дел тумен По Свято Духос. ⁹ А за е братолюбиеске нанай нужно те пишинав туменге; соскето коркоре туме синиен сикавде таро Дел те дехен тумен иек аверес, ¹⁰ понеже чука керен саворе праленца ки цело Македония. Но молинас амен туменге, пралален, те преуспеинен анде далкесте по бут тай по бут, ¹¹ тай усърдно те стараинен тумен те живинен тихо, те керен тумаре букя тай те керен бути тумаре собственоне вастенца, сарто заръчингям туменге; ¹² за те икерен тумен благоприлично англал о авруне тай тена овел тумен нужда нисостар. ¹³ Нана мангас, пралален, те ачон андо неведение колкенге, колато мерен, или па те скърбинен сарто колкенде, колато нанай лен надежда. ¹⁴ Соскето ако верувинас, кай о Исус муло тай възкресингяс, чука о муле андо Исус о Дел ка привединел заедно Леса. ¹⁵ Соскето давка пенас туменге чрез о Господно словос, кай аме, колато ачовас живде жи ко Господно пришествие, нанай те изпреваринас е мулен. ¹⁶ Понеже коркоро о Дел ка ухлел таро небес повелителноне викиеса, тай гласос на архангел тай и Божие тръба; тай първо ка възкресинен о муле андо Христа; ¹⁷ после аме, колато ачилам живде, ка овас грабната заедно ленца андо облакя те посрещнинас е Девлес андо въздухи; тай чука ка овас винаги е Девлеса. ¹⁸ Тай чука, насърчинен тумен иек аверес калке хоратенца.