¹ Mu wuso aku lyiiro wati fwana tandi bakana wu lyikumi ibata yisa marambi kuka mwana yamati rowura. ² Bamana lyanja kuwo kalyi gigi indi bamana lyanja kuwo kalyi ba sauka. ³ Mi baba gigi pubaru kuyisa ma rambi awo, ama bayise amazi mu marampi awo. ⁴ Kono baba sauka bata yisa amazi ngangamwe nga ma rampi awo. ⁵ Papa puyi karuku rowura kalyi kalyi yeha, kowo bakwenda kuku rangara mi baka kwama. ⁶ Kono pakati lya masuku baku yuvwa mushupu, 'Ni lyaye, yamati riwura! Nakwenda nikalyi shangane nakye.' ⁷ Kowo bakana batambuka baku mwenika ma rampi awo. ⁸ Baba gigi baku tikya ku baba sauka, 'Ni tipeko amezi shuku tikya ma rampi etu nduku zima kango.' ⁹ ''Kono baba sauka baku bara taba, 'Ngutina nango mache ngaku kuti kwana kwetu, na kwenda kubati wu lyisa ni ka lyiwire nga ngenu.' ¹⁰ Pu baru kwenda kuku wura, ikaru kurowura akuya, ibata lyi tukiseza baka kyita nakye kwi shangano ama rowura, mi mumbero waku ya zuyiwa. ¹¹ ''Kowo bakana bakuya baku tikya, 'yo mukuru, yo mukuru, tiya zwira.' ¹² ''Kono aku tikya kuwo, 'Injahamu ndatikya kunwe, Kandini yi zire.' ¹³ Ni lyindire cware, shuku tikya kani yi zire lyiba indi nako. ¹⁴ Kwati fwana tandi muyeyi mati yimina kwenda lyuvu ilyimwe. Aku bera ba vuya bakye akubapa shutsuwa shekye. ¹⁵ Ku yuyumwe aku mupa zi tareta zati mana lyanja, ku yumwe akupa zi mbiri, ku yumwe akupa ixiki. Kwekye mata pewa kwenda mama ti kwena, muyeyi aka kyita mu musipiri akye. ¹⁶ Yamata pewa zati mana lyanja aka kyita akazi bikasa aka shangana izimwe zati mana lyanja pwi lyiro. ¹⁷ Kwati fwana niyamata pewa zi mbiri aka yekyezapo zi mbiri nangweza. ¹⁸ Kono yamata shangana ixiki aka kyita, akasa lyuqo akayi zika. ¹⁹ Papa shika kanda kakare aka shika kuru awo mi akuya kuti shizana nawo. ²⁰ Muvuya yamata pewa zati mana lyanja akulyeta zati mana lyanja pwilyiro. Aku tikya, 'shikati, matandipa zati mana lyanja ndalyeta zatimana lyanja pwilyiro.' ²¹ ''Aku tikya kukye, 'Mapanga naqa, muvuya yomuqa yamati sepahara! Mata sepahara muzeziche. Mbondi kubikye kwendasa izuto kozo. Njena niradze ni shikati aye.' ²² ''Shata yisa zi mbiri shakuya ku tikya, 'shikati, matandipa zi mbiri. Mwena, Ndaka panga zi mbiri pulyiro.' ²³ ''Aku tikya kukye, 'mapanga naqa, muvuya yomuqa yati sepahara! Mbondi ku bike kwendisa zi zinnji. Njena niradze ni shikati aye.' ²⁴ ''Muvuya yamata pewa ixiki akuya ku tikya, 'shikati, ndara yi zire atikya, shikati ndara yizire atikya muyeyi yomu zuwo. Yamati matishanganisa muhara kuna, mati vuna muhara lyima. ²⁵ Ndata ywapa, ndata yenda ndaka yizika mu muvu. mwana, yisa shalyi ichwe.' ²⁶ Kono shikati akye akumwi taba atikya kukye, 'Yewe muvuya yomu tolyi indi ku kwesa, uyi zire atikya ndati kunga nisa mundahara kuna indi kuvuna mundahara lyima. ²⁷ Kambe matayipa kwi paka, kambe ndaya ku shangana ichanga indi chimwe pu lyiro. ²⁸ Cware akuyi yisa kukye akuyipa yana zu lyi kumi. ²⁹ Koku kye yana , shapewe zizimwe- indiku bbara nanyina. Kono kukukye yomuku, nangaishalyi muku shashi yanguwe. ³⁰ Akukyi mu vuya yomuku ituso muka rama. Kubati shupura indi ku rwara ameeno.' ³¹ ''PushiMwana muyeyi isha kuya muku besa indi manyiroi akye, mi shasikame pu shuro shakye sheshiqa. ³² Puwuso wakye shaku nganise lyuvu koyo, shakuse muyeyi nu muyeyi kuyumwe, tandi mulisani yamati kyeta zungu kuzi penwe. ³³ Shabikye zungu ku lyanja lyi khamu indi zu penwe kulyanja lyi mosho. ³⁴ Shikati shati kya ku ibana ku lyanja lyi khamu, 'Nakuya, yenwe inata tonorofazwa ku Tatye, nira swana mu wuso iwata ni bishirwa kudzwa kwi thanzyi ulyuvu. ³⁵ Shuku tikya nata ndipa zu lyuwa pundata fwa injara; ndatafwa lyinata nakundipa ami ndaku nwaa; kali ndimuyeni naku ndiyisa mwikyo; ³⁶ Kalyi ndi muku ziraro nakundi rarika; Ndaru ku mashi natandi qawu-qawu; Ndarana mwi torongo nataya ku ndimwana.' ³⁷ ''Baba chena bakwi taba atikya,' Shikati, Indini tata ku mwana mafu injara mi takupa zu lyuwa? kapa lyinata takupa ami? ³⁸ Indini tata ku mwana umuyeni mi takuyisa mwikyo? kapa ku tsushira taku rarika? ³⁹ Indini tata ku mwana mwi torongo indi ku mashira takuya kuwe?' ⁴⁰ Cware Shikati ndisha kwita atikya kuwo, 'Injahamu nda tikya, shinatarasi kubapana wakwenu, ikumye natazisi.' ⁴¹ Cware ndisha kutikya ku ibana kulyi khamu, 'Nidzwa kumye, yenwe ina kutuwa, nakwenda mulyi mbimbiro lyata kwezirwa Kamuhema (satani) indi manyiroi akye, ⁴² Shuku tikya ndata fwa injara, kono amani ndipa zulyuwa; ⁴³ Kalyi ndumu yeñi, ama nindi yise; Ndata tsushira ama nindipe zi raro; Ku mashira, mwi torngo, ama nindi petiyre.' ⁴⁴ ''Cware ndishaba ku mwi taba atikya, 'Shikati, Indini tata kumwana mafu injara, kapa lyinata, muyeñi, matsushira, ku mashira indi mwi torongo amati kwi nasamina?' ⁴⁵ ''Mi shara taba atikya, 'Injahamu nda tikya kunwe, shinahata rasamina bapa imye nahata rasama.' ⁴⁶ Bapa shabayendye ku rufu, baba chena mu wuparo wa hamana.''