¹ Jeso akudzwa mwi kereki baka kyita mwi njira. Barutiwa ba kyee kuqe miyaho wu wumwe ywi kereki. ² Kono aku bara taba atikya, kuwo, ''Ama naku mwana izuto zopani kozo? Injahamu ndatikya kunwe, kuqu lyiwe lyishali kara pwi lyiro lyalyi lyimwe kongo shanga waru mukye.'' ³ Pukara sise pwi kaku muko a Olive, barutiwa bakuya kukye kuru pati baku tikya, ''Tizira, indi zopani izuto shazi pangahara? Ziqe zire zishazi raqe zuku yakwee indi mameni sizi ulyuvu?'' ⁴ Jeso akubara taba aku tikya, ''Ni mamere atikya kunjemwa yamani dzisa mwi njira. ⁵ Ba benji shaye molyina lyanga. Shaba tikya, Myendi Keresite,' mi shaba rakyi bayeyi ba benji. ⁶ Shani yuvwe zu ndwa indi zi piho zizindwa. Ni mwene atikya imeyo enu isiye ku lyangana, izuto zopa zitama hera kisisini; kono mameni sizi kanga chire kuya. ⁷ Lyuvu shalyi rwenisa lyuvu lyilyimwe, muwuso ni muwuso. Shakube nizati ywasa indi indi zizi kinyeho muzi baka zati chichana chichana. ⁸ Kono kozo zopa maka lyero uwu tuku. ⁹ Cware shabani patye bani shandise indi kuni bbura. Shani toyiwe ku lyuvu kolyo shi lyibaka lyi lyina lyanga. ¹⁰ Shakube nizi kakanga zi zinji, indi kuli twaya. ¹¹ Ba porofita ba benji shabaye ndukuya ku dzisa ba benji mwi njira. ¹² Kakuli wubbi shawu yinjipe, rushunu rwa bayeyi sharu mane. ¹³ Kono yeye yushulyi gisa ku twara mamenisizi nduya kuwa. ¹⁴ Imbuzi yiqa yu muwuso shayi hwetuwe lyuvu kolyo kuba wupaki kulyuvu kolyo. Kudzwapo mameni sizi ndisha ngakuya. ¹⁵ Cware, pushe na ku mwana wubbi womuku iwati qapara, iwata hwetuwa ku muporofita Daniele, ku yima mushibaka sheshi chena'' (ni siye baye ndisi bayuvwe), ¹⁶ ''Siye bapa ibana mo Judeya batire ku marundu, ¹⁷ ni siye yana kushi tiwo shinjuwo asiye ku suka kuya kuyisa ichuto mwi njuwo, ¹⁸ yana kuruwa asiye kashuka kuya kuyisa inguwo. ¹⁹ Kono ba shwamana barwakazi ibati xamisa kapa ba tyere mu lyiba yopa! ²⁰ Ni rapere nanyina atikya ku ywapa kwenu ku siye kuba pu shipepo kapa rwi Sabata. ²¹ Shuku tikya ni mashando ngama kuru, ingaha chire ku mwanahara kudzwa makarero ulyuvu ku lyeta apani. ²² Nakana mayiba ngapa shanga ku shupipa, nakuku, yushu ya kuwa. Kono shi lyibaka lyabata shararwa shanga shupipe. ²³ Ati kuna isha tikya kunwe, 'Lyaya, Keresite yini!' kapa,' Keresite yoo!' ni siye ku tishira. ²⁴ Ba Keresite wi mbuzi indi ba porofita wimbuzi shabaye kuya kwiqe ziqe indi zi makazo zezi kuru, kuni kusa ngaho mwi njira, ati shaku kwanahare, tananga ibata ketuwa. ²⁵ Ni mwene, ndani ziri shinako. ²⁶ Cware, ati batikya kunwe, 'Ni lyaye, ana kuni kwishumwe,' kapa, Ni mwene, ana mwinjuwo yamwi kyo,' ni siye ku shira. ²⁷ Pusha ku besa shaka ku mwenika kudzwa kuwu dzero taku wuzima, kopa ndukuya kwa Mwana muyeyi. ²⁸ Koko ikuna unya uya yo mufu, mboku kungene mayini. ²⁹ Papa ngaho kudzwa ku mashando umayiba ngapa lyiba shali zime, umwezi kamuni shaumwe nikye, zinyata shazuwa ku lyiiro, indi qumu ulyiiro shayi nyangase. ³⁰ Cware siqe za Mwana muyeyi shazi mwanahare mu lyiiro, mi showo koyo mu lyuvu shyi lyire. shaba mwene Mwana muyeyi shama tiya muma dzudzo u lyiiro indi qumu yi kuru. ³¹ Shatume manyiroi akye ni mushupu wa mukuru wu torombita, shaba kunga nise bata shararwa muziqha zine, kuma menisizi taku mamenisizi. ³² ''Lituta ituto ku wukuyu. Papa ngaho ushu mwana zutobe zateni zata kuku muka kali ngati gutura, uyibe atikya invura yina shufupi. ³³ Akyopa, pushana ku mwana zopa kozo, ana shufupi, puru pati rumu mbero. ³⁴ Injahamu ndatikya kunwe, rusinga ropani ka muni sharu mane izuto zopani kazi chire kwisisini. ³⁵ Pushi lyuvu indi lyiro shalya ku tsura, kono mayi anga ka muni shaka tsure. ³⁶ Kono zu lyiba indi nako kuku yuzi yizire, nanga manyiroi ulyiiro, nanga u Mwana, kono tana Shee. ³⁷ Tandi mayiba a Nuwe, shakube tandi kuya kwa Mwana muyeyi. ³⁸ Tandi mu mayiba ngapa baru kunwa indi ku lya munda ka wuchire kuya, kurowura indi ku rowuza ku twara liba lyu Nuwe amata njena mwi areka, ³⁹ kuku shubara yi zire tana pu munda waruya wakuya kuba gura- mi shakube akyo indi kuya kwa Mwana muyeyi. ⁴⁰ Ba biri ishana mwi fuba- uyumwe shayu suwe, uyumwe shakare. ⁴¹ Barwakazi ba biri batitwa- uyumwe ayu suwe, uyumwe akare. ⁴² Cware nindi lyindire, kani yizire lyiba lyishi Shikati enu ishaya. ⁴³ Kono niyibe chini, kambe umunu injuwo ayi zire inako yamatiya, nisha sikame kwi qawu qawu atikya injuwo akye isiye ku bburuwa. ⁴⁴ Cware nati swanera ku lyindira, Mwana muyeyi shaye mukakanda ku nahati yanakana. ⁴⁵ ''I yani yamati sepahara indi muvuya yo mu sauka yamata bikuwa mwinjuwo a shikati akye atikya uku mupa zu lyuwa shaka kanda kaka shiyama.? ⁴⁶ Ana imbuyoti muvuya yushu shanganuwa matisi pushi shikati akye akuya. ⁴⁷ Injahamu ndatikya kunwe shikati akye shaya mupe zu tsuwa zakye kozo za sitye. ⁴⁸ Kono ati muvuya yo mubbi aku tikya mu moyo akye, 'Yo mukuru anga maka lyiyeha,' ⁴⁹ Nduku xitika nukwi kyamu ba vuya ngakye, ku lya indi kunwa nizi ndakwa, ⁵⁰ Yo mukuru akye shaye mwi nako yama lyi yibara yaha yi zire. ⁵¹ Yo mukuru akye shamu xanare xanare indi kumukyi kuba balyipa, kopa kuba kulyira indi ku rwara ameeno.