¹ Pu Jeso karu mana ku hweta ku lyi ywaba indi barutiwa bakye. ² Aku tikya, ''Ba noli indi ma Farisi bati sikama mushi puna sha Mushe. ³ Nanga ndipakyo kocho shiba kuni zira nishisi shubabbara, kono nisiye ku cheriza zu batisi, shuku tikya bati hweta izuto zubahatisi. ⁴ Eyee, baruku shimina mi zuyo yemi remu hape yemiremu pukuyi kambika, mi bakuyibika puma qaba abayeyi. Kono shawowo halinwe baru kushitira nanga tu ngara kuzu kotura. ⁵ Baru kwisi izuto za wo atikya bayeyi babamwene. Baruku panga zi kwezira zawo mafirakateri ni minganja, baru kulyisa kumamenisizi uziraro zawo. ⁶ Bati shaka zuturo izina kuwuso mu zi shangano indi zi turo za baba kuru muma sinagogee. ⁷ indi kwi wayiwa naqa mo zi baka zama wulyisizo, indi ku beruwa 'Rabbi' ku bayeyi. ⁸ Kono yenwe ama na ku swanera ku beruba 'Rabbi; shuku tikya muruti enu muxiki, yeye Keresite. ⁹ Mi yenwe kwenu nabana wu muyeyi muxiki. Mi hape nisiye kubera bera muyeyi ngaho atikya i Shenu, shi libaka lyuku tikya ninangaho Shenu muxiki, yana kwi lyiiro. ¹⁰ Hape nisiye kuberuwa atikya' nibaruti; shuku tikya ninangaho muruti muxiki, yeye Keresite. ¹¹ Yo mukuru kunwe abe muvuya enu. ¹² Kwekye yamatili kakura shali bike peshi, kwekye yamati lyishusa peshi shakoturuwe. ¹³ Kono wushwamana ungenu, yenwe banoli indi ba Farisi, ibatilyi mwana! Shuku tikya nati yazira bayeyi mu wuso i lyiiro. Shuku tikya yenwe yemwa naka njenamo, mi ibati shaka ku njena yemwa naku bati shira. ^{14 15} Wu shwamana ungwenu, banoli indi ba Farisi inalipa shuku tikya, nati mina mayuwo aba rwakazi baba fwera, shuku ba pangira zi tapero zezinde, shazopa shani ya turwe shuku bbara. ¹⁶ ''Wushwamana, ungwenu yenwe bayendisi ba bapofo, yenwe inatikya, 'Kwekye yamati kwaka shi kereki, kunjemwa ichumwa. Kono kwekye yamati kwaka shi gauda iyi kereki, mati shimi nuwa shuku lyi shimina kwakye.' ¹⁷ Nwe bapofo baba gigi! Sheshi kuru ichire, i gauda kapa i kereki iya ti chenisa? ¹⁸ Muyeyi kwekye yamati kwaka shi alutare, kuku ichumwe. Kono yimati kwaka shimpo iyina payo, matishiminwe shuku lyishimina kwakye.' ¹⁹ Yenwe baba pofo sheshi kuru shikya, i mpo, kapa i altare iya ti chenisa i mpo? ²⁰ Cware, nanga ndipa kyo muyeyi ashi kwaka shi alutare ku kwaka shayoyo indi zinapo kozo. ²¹ Imati kwaka shi kereki mati kwaka shayoyo ngaho indi shayeye yamati para mwayo. ²² Indi yeye yamati kwaka shilyiiro mati kwaka shishi puna shu Rezya yeye yusikama moo. ²³ Wushwamana, ungwenu banoli indi ba Farisi, ibalyipa! shuku tikya bati shara ichuto shixiki ku zilyikumi. Kono nasiyi izuto zezi remu izi murawo- muxumakawo indi tumero. Kono zopa ndizi naruku swanera kwisi indi kwahasiya zizimwe zaharara sisini. ²⁴ Yenwe bayendisi babfu amesho, nwe inati yimba kamburu mburu hape nati mina i kamele! ²⁵ Wushwamana ungwenu, banoli indi ba Farisi, ibalyipa! Yenwe nati ywesa kwinje lyu kompi indi kwinje lyu mbenga, kono mwikyo muyire fufurerwa indi kulyi pata. ²⁶ Yenwe mu Farisi yo mupofo! ywesa amana mwikyo lyu kompi indi umbenga, nduku tikya pange pachene. ²⁷ ''Wushwamana ungwenu, ba noli ni ba farisi, yenwe inalyipa! shuku tikya nati fwana imbazi, yara tsuwa wuhwe ingatu mwanahara wuqa popenje, zini mwikyo muyire zu shupa za bayeyi uwunji wazo kazi chena. ²⁸ Mwi njira yati fwana, hape kunje nati mwanahara wuchena ku bayeyi kono mwikyo muyire kulipa indi murawo womuku ituso. ²⁹ ''Wushwamana ungwenu, ba noli indi ba Farisi, ibalyipa! Yenwe inati panga zi mbazi za ba porofita indi ku ziqasa zi mbazi za baba chena. ³⁰ Natikya, 'Kambe tata para mumbayiba aba shebetu, nita hata patizana nawo kuta marwapa aba porofita.' ³¹ Ndipopa hee niyi zirize mwikyo lyenu atikya enwe nda bana ibata bbura ba porofita. ³² Ni popahe ni yizirize kwandi lyira niba shebenu. ³³ Yenwe zinywaka, abana wuzu bbobbuma, ingahare ishani pima i katuro yu munduro? ³⁴ Cwrae he, ni mwene, ndati ni tumisiza ba porofita indi baba sauka, banoli. Babamwe shani ba bbure indi kuba bamba, babamwe shani bara kyamu mu zikereki indi kuba hindi shira kwinje lyi minzi. ³⁵ Yatikya marwapa kongo ingababa shiyama ingata tyeshira peshi, kudzwa kumarwapa Abere, ku twara kunga Zakaria mwana Barakia, inata bbura pakati lyi kereki indi alutare. ³⁶ Shinjahamu nanyina ndani zira, kozo izuto zopa ishaziye pwi lyiro rurusinga ropa. ³⁷ ''Jerusalema , Jerusalema, yewe yumati bbura ba porofita, indi ku hwabara wundati tumina kuwe! Kashiche shinda shaka kwiqawu-qawu bana wee paxiki, tandi ukhukhu shashanganisa tutsuyo-tsuyo, kono, amuku shaka. ³⁸ Ni mwene, injuwo aye yati kara nali limbo. ³⁹ Shuku tikya ndani zira, ndatikya kudzwa papani, kamuni shenindi mwene nakana shina ku tikya, Imbuyoti injakye yamatiya shilyina lya Shikati.'''