¹ Injendiso ilyiiro yati fwana muyeyi yana muvu ya mati tambuka shichacha ku ka shaka ba bberiki ba mwi fuba akye. ² Mulyiqo lyuku yuvana in ba bberiki ku ba shara usherenyi muxiki shilyiba, nduku batuma kwi fuba. ³ Mukakanda ka shupi aka kitako mi aka shangana ba bberiki babamwe bali yimine ngaho muma wulyisizo. ⁴ Aku tikya kuwo, 'Indinwe, ni njene mwi fuba, kokyo shashiqa shindi nipe.' Baka kyita kuku bberika. ⁵ Nangweza yuwu 6 indi yuwu 9, aku panga zati fwana hape. ⁶ Nangweza muka kanda ku lyi kumi indi kaxiki aka shangana babamwe bayiminwe, aku tikya kuwo, 'Shikya puni yimine ngaho wuqholyi wulyiba?; ⁷ Ba ku tikya ku kye, kali kunjemwa yama tipe musebezi, akuba tyeya atikya, indinwe yendye mi fuba.' ⁸ Maxuhumu pungaru kuya,umunu i fuba aku tikya ku muyendisi mwi fuba, 'Bera ba bberiki yuba shara marwapa nguba bberi shiri, kudzwa kuywa ma menisizi ku lyata kuya makalyero. ⁹ Ba bberiki bata njena mushikati, uyumwe nu yumwe aku shangana isherenyi ixiki. ¹⁰ Wi thanzi pubaru kuya baru ku yanakana atikya mboba shangene pakuru, kono indi wo baku pewa ixiki ixiki. ¹¹ Pubaru ku shangana marwapa, baku bbiraera ku munu ifuba. ¹² Ba ku tikya, 'ba bberiki bama menisizi bayisa ngaho kakanda ka xiki, kono mabapi izati fwana natswe, tafu mizilyo ulyiba indi ku piya kashe.' ¹³ Kono umunu ifuba aku zwara yuyumwe aku tikya, 'Mbiya, ama ndiku pange wubbi. Amu tishi zanwe namyee shu shereni muxiki? ¹⁴ Yisa shicho ukwenda. Ndali kyetiri kupa indi banjeni mushika shuku fwana nanwee. ¹⁵ Ama ndaku swanera kwisi mundati shashira ku shi changa? kapa ilyisho lywe lyina wubbi shuku tikya ndu mushiyama? ¹⁶ Cware bama menisizi indi wi thanzi, wi thanzi nduwu mamenisizi.'' ¹⁷ Pu Jeso karu kwenda ku Jerusalema, aku yisa barutiwa kuru pati, mwi njira aku tikya kuwo, ¹⁸ ''Ni mwene, ta tyenda ko Jerusalema,mwana muyeyi mati ka pewa kama pirisita ba bakuru indi ba noli wu mirawo. Shaba ku mu twere ku rufu. ¹⁹ Mboba ka mupe kuwu lyuvu atikya baka mwinwaa, baka muzipe mi shaba ka mubamba. Konomu lyiba lyuwu tatu shata mbukye.'' ²⁰ Nyina abana ba Zebedia akuya ku Jeso nabana bakye. Akuya kuwa peshi pu wuso wa Jeso aku murungira. ²¹ Jeso aku tikya ku kye. ''Shikya mati shaka?'' Aku tikya ku kye, ''Ndati ku zira atikya abana banga bani ba biri baka sikame, uyumwe ku lyanja lywe lyikhamu, uyumwe kwi mosho, mu muwuso wee.'' ²² Jeso aku barataba atikya, ''Kani yi zire shinati rwamba. Nati kwana kunwa ukompi indina shufupi nuku munwa?'' Ba ku tikya kukye, ''Tati kwana.'' ²³ Aku tikya kuwo, ''Ukompi anga nati swanera injahamu ku nwaa. Kono ku sikama ku lyanja lyi khamu kapa kwi mosho kamyee ndati pa, kono ikubapa ibata raqawu-qawu ma sha Tatye.'' ²⁴ Pu barutiwa ba bamwe wulyi kumi baru ku yuvwa zopa, baku menjira baba biri. ²⁵ Jesoakuba bera aku tikya, ''Ni yizire atikya bayendisi wu lyuvu bati bakyi tira, wutokwa wawo batyendisa shiqumu awo. ²⁶ Ku siye kuba akyopa kouk nwe. Nanga ndipa kyo, yamati yanakana kuba yo mukuru enu abe muvuya enu, ²⁷ mi yamati shaka kuba kuwuso wenu abe muvuya enu, ²⁸ tandi shi mwana muyeyi amaye kuku yakuwa kono kuku yaka, kuya kupa wuparo wa kye ku shara mirandu abayeyi kowo.'' ²⁹ Pubaru kudzwa ko Jeriko, lyi ywaba lya kubara qama. ³⁰ Kwarana barwa ba biri bara sise ku rupati ru mugwaga. Pu baru yuvwa atikya Jeso mati tsura, baku shupura, ''Shikati, mwana Davida, tixuma.'' ³¹ Lyiywaba lyaku ba kalyimera, kuba zira atikya bati qamwi, kono baku shupura nanyina, ''Shikati, Mwana Daivda, tuyuvura zuxuma.'' ³² Jeso aku yima akuba bera aku tikya, ''Shikya nati shaka atikya atikya ndini sama?'' ³³ Ba kutikya kukye, ''Shikati, amesho etu kamwene.'' ³⁴ Cware Jeso, aku xhitika kwenda shuku bara xuma, aku pata amesho awo. papa ngaho baku shangana ku mwana ba kumwi qama.