¹ Kwa kuya atikya pu Jeso karu ku mana mayi ngapa, aka kyita ko Galilea akuya ku shikiriti sha Judeya kokyo lyi murwanga Jodani. ² I lyinji lyaku mwi qama, aka ba pwelisiza koo. ³ Ba Farisi bakuya ku kye, bakumwi kaba, atikya ku kye, ''Kana shu murawo murwa mati tishwirwa ku shita murwakazi akye shi chuto kocho?'' ⁴ Jeso aku bayaru muna atikya, ''Ama ni bare atikya yamata ba wumba kwitanzi mata ba wumba murwa indi murwa kazi? ⁵ Mata ba wumba aku tikya, 'Shilyibaka lyini murwa sha siye bashumuzi bakye aka shangane ni murwa kazi akye, mi wubiri wawo shababe inyama ixiki,' ⁶ Kaba shiberuwa babiri, kono inyama i xiki. Cware shu Rezya ama shanganisa, kusiye ku shanganeha yamatishi qapura.'' ⁷ Baku tikya ku kye, ''Shikya pu Mushe amata tikya takupa linoro lyuku shita indi ku muhindika?'' ⁸ Aku tikya kuwo, ''Shuwu kukutu wi mitima enu, Mushe aku niti shira ku shita bakazi benu, kudzwa itanzi kali kangahopa. ⁹ Ndatikya kunwe, yamati shita murwakazi akye, yahali ishu wuhure, ndika rowura uyumwe, mati panga wuhure; murwa yamata ka rowura murwakazi yo mushutuwa mati panga wuhure.'' ¹⁰ Barutiwa baku tikya ku Jeso, ''Ati yopa nditaba umurwa indi murwakazi akye, kuqa kwaha rowura zini.'' ¹¹ Kono Jeso aku tikya kuwo, ka kwekye mati tishira muru turo wa pani, kono tana baba tishira kuzi tishira. ¹² Kuna baha muni sheba kyopa kabata pakuwa mu mara aba nyina bawo, babamwe bata rasuwa akyopa ku bayeyi, babamwe imbo balyi kyopa shuku shaka mu wuso i lyiiro. Yeye yamati kwana ku tishira zu tuto zini, ni musiye ati shire.'' ¹³ Hape bapundi bbamwe baru ku lyetuwa kukyee atikya aba bikye banja indi kuba raperera, barutiwa kyee bakuba kalimera. ¹⁴ Kono Jeso aku tikya, ''Ni tishire bapundi, ni siye kuba chikisa kuya kumwee, mu wuso ulyiiro wati fwana tandiwo.'' ¹⁵ Yamati bika lyanja lyakye pu bapundi, mi ndi kuzwa kuwo. ¹⁶ Ni mwene, muyeyi akuya ku Jeso aku tikya, ''Muruti, shikya sheshiqa shinda ku kwisi atikya ndishangane wuparo wa hamana?'' ¹⁷ Jeso aku tikya kukye, ''Shikya pumandi wuza atikya shikya sheshiqa? Shixiki sheshiqa, kono ati mati shaka kunjena ku wuparo wa hamana, patisa murawo.'' ¹⁸ Aku tikya kukye, ''Mirawo yire?'' Jesoaku tikya, ''Siya ku bbura, siya ku panga wushashi, siya ku yiba, siya ku yuvwa wupaki wi mbuzi, ¹⁹ Kutyeka basho indi ba nyoko, shaka yuyumwe tandi shumatili shaka.'' ²⁰ Munyana yomudana aku tikya kukye, ''Kozo zopa izuto ndazi mamera. Shikya ndishi shaka?'' ²¹ Jeso aku tikya kukye, Ati mati shaka kuba naqa, ukwenda, uka wulise zusitye, mi aka zipe baba hungwe, mi shuka shangane zutsuwa mu lyiiro; mi ukuya, ndiqama.'' ²² Kono murumbwana pukaru kuyuvwa zi Jeso karu ku hweta, aka kyita matsuka mutima, shuku tikya ana zu tsuwa zizinji. ²³ Jeso aku tikya ku barutiwa bakyee, ''Nanyina ndatikya kunwe, ku zowo mufumu ku njena mu muwuso wi lyiiro. ²⁴ Nangweza ndatikya kunwe, ati kutwere i Mbongolo ku njena mwi lisho lindwanga cware mufumi ndisha ku njena mu muwuso Urezya.'' ²⁵ Pubarutiwa baru kuyuvwa akyo, baru ku hakamara baku tikya, ''I yani he yushu yakuwa?'' ²⁶ Jeso aku ba lya aku tikya, ''Sha bayeyi zopani amaza ku kwanahara, kono shu Rezya izuto kozo zati kwanahara.'' ²⁷ Mi Pitorosi akwi taba atikya kukye, ''Lyaya, tasiyi izuto kozo indi ku kwiqama. Cware shikya shishati shangana?'' ²⁸ Jeso aku tikya kuwo, ''Injahamu ndatikya kunwe, mu lyuvu lyeli piya pu shumwana Muyeyi shaka sikama pushuro shati kabera, yenwe nata mwi qama shani kasikame pu zuro zati kabera zulyu kumi ni zibiri, kuya tura mishowo yi lyukumi ni biri ya bana ba Isiraere. ²⁹ Kwekye yama siyi injuwo, bazatu bakye indi bakuru bakye wushi nyana indi wushi kazi, bashe indi ba nyina indi bapundi, indi lyuvu shi liina lyanga mbwa shangane zi mashumi nga mana lyanja indi yora wuparo waha mana. ³⁰ Kono bata kyelira shababe witanzi, witanzi shababe bama menisizi.