¹ Mukakanda kapa barutiwa bakuya ku Jeso baku tikya, Yo mukuru ku menina mu muwuso i lyiiro iyani?'' ² Jeso aku bera ka pundi kakadana, aku mubika takati lyawo, ³ aku tikya, ''Zi njahamu ndatikya kunwe, nakana naku yaru muka tandi kapundi kaka dana, kuku mushani njena mu muwuso ulyiiro. ⁴ Cware, kwekye yamatili qhokawo tandi mupundi yo mudana nduyo mukuru mu muwuso i lyiiro. ⁵ Kwekye yamati chenjira mupundi yo mudana akyopani imye ama tambura. ⁶ Kwekye yamati lyetisa atikya yuyumwe aba pundi bati tishira kumyee apange shibe, mbokube wuqa atikya ashiminwe lyuwe lyelyi kuru mwi sungu, mi ara kyiwa mu lyuwate azyime. ⁷ Wu shwamana wuna mu lyuvu shizi kanga! Ku tikya zi kanga zopa ziye, wu shwamana ingu muyeyi izatiya shakye! ⁸ Ati lyanja kapa lyikondo lye lyati lyeta akyo, lyitsura ulyikyi shire nawe. Wu shiyama ko kuwe ku njena wuparo ni lyinja kapa lyi kondo lyelyi hwere ku bbara kwi kyiwa mulyi bbibbiro lyahati mana ni manja abiri ni makondo abiri. ⁹ Ati ilyisho lywe lyatiku lyetiza zikanga, lyikusa ulyikyi shire nawe. Wu shiyama kuwe kanjena mu wuparo ni lyisho lyi xiki kakwi kyama mubbibbiro na mesho aye kongo. ¹⁰ Ni mwenee atikya ni siye kwixi uyumwe aba pundi bapa. Ndatikya kunwe manyiroi awo nga lyayi lyira puwuso wa ya namwi lyiiro. ¹¹ shuku tikya mwana muyeyi mataya ku palisa lyuvu ¹² Shikya nati yanakana? Ati muyeyi ana zungu zilyi 100, i xiki ndiku zimina, kuku kusiya zopa pwi kambamo aka lyaye yahati mwana? ¹³ Ashi kayi shangana, Injahamu ndatikya kunwe, mbo ara dze ku bbara indi zizinji izahara zi mina. ¹⁴ Shi njira yati fwana, kaku shaka kwa Shikati enu yakwi lyiiro atikya yuyumwe aba pundi shinyehe. ¹⁵ Ati mukwe ashi kwisi wubbi, yenda uka muzire wubbi wa marasi, yenwe ngaho nwekye. Ati mati kakwi kyekye, kalyi mayaka mukwe. ¹⁶ Kono ati ama kakwi kyekye, yisa muxiki kapa ba biri shimi romo ibiri itatu zi tanduro zi lyiyi ni lyiyi zu yuvwahare. ¹⁷ Ati mati kashita kabara kyekye, zira itaba kwi kereke. Ati indi papa ashishita musiya abe kunwe atikya muhedeni kapa musharisi. ¹⁸ Injahamu ndatikya kunwe, ichuto ni chuto shinati shimina papeshi indi kwi lyiiro bashi shimini, kocho shinati chutura peshi indi ku lyiiro bashi chutura. ¹⁹ Nangweza ndatikya kunwe, ati ba biri batishi zana kwi chuto kocho shubati rungira, mboshi pewe kuwo sha Tatye ya kwi lyiiro. ²⁰ Puba biri kapa batatu bashengeni mu lyina lyanga, indi myee ndina mwi kyo lyawo.'' ²¹ Cware Pitorosi akuya ku tikya ku Jeso, ''Shikati, kalyare mukwanga katindi panga wubbi kanditi mupatira? ku twara ka 7?'' ²² Jeso akumu yaru muna atikya, ''Amandi hwetye ka 7, kono 70 kuyi twara ka7. ²³ Cware muwuso akwi lyiiro wati fwana tandi shikati yuyumwe yamati shaka ku shara bavuya bakye. ²⁴ Ashi xhitika ku shara, yuyumwe aku lyetuwa kukye yamati korota zi tareta zilyi 10 000. ²⁵ Kono shuku tikya muku injira yiyimwe yuku shara, shikatya akye akutikya awulyu suwe indi bamukaza kye, abana indi zi zutsuwa za kye kozo za sitye, atikya share. ²⁶ Apa muvuya akye akuwa peshi pumaso akye, aku tikya, Shikati, bani kaxumakawo ku mye, ishandi ku share kozo zopa.' ²⁷ Mi shikati umuvuya, shuku kyitirwa ni kaxumakawo, aku mukusa indi kumu patira shikoroti shakye. ²⁸ Kono muvuya aka kyita aka shangana yuyumwe ya bavuya, ikaru ku mukorota 100. Aku mupata, ku mupatira mu mulyuwo, atikya, 'Ndi shara zumandi korota.' ²⁹ ''Kono muvuya aku wulya peshi shuku lyishusa peshi kukye, atkya, 'ndifwera zu xuma, shandi ku share.' ³⁰ Kono muvuya ywi nthanzi aku shita. Nanga ndipa kyo, aku munjenisa i torongo tana pusha ku mushara za mati mukorota. ³¹ Ba vuya babamwe pubaru ku mwana zatara sisini, bata bbiraera. Bakuya ku zira shikati awo kozo zatara sisini. ³² Mi shikati akye aku mubera akuya kutikya ku kye, 'Wee muvuya yo mubbi, ndata ku patira shi koroti shwe shuku lyixuma kawo kwe ku myee. ³³ Amukwi xuma mu vuya ngawe, tandi shindi shindata kwi xuma?' ³⁴ Shikati akye aku menga nanyina aku mupa kwibati shandisa tana pusha shera za mati korota. ³⁵ Ehe Tatye ya kwi lyiiro kasha nisi ati amana ku patira ba kwenu shi mitima enu.''