¹ Kuma ku mayiba ngamana lyanja indili xiki Jeso aku yisa Pitorosi, Jakowo, indi Johani muzata kye, mi akuba twara pu lyurundu lyelire. ² Aku chicha pu maso awo. Shifateho shakye sharu ku kabera tandi lyiba, ziraro zakye zaru ku mwenika. ³ Ni mwene, kwaku mwanahara Mushe indi Elija baru ku hweta nakye. ⁴ Pitorosi akwi taba Jeso aku tikya, ''Shikati, kuqa atikya tibe kuni. Ati mati shaka, Mbondi pange kuni zitara zi tatu - shixiki inchwe, shixiki i nchanga mi shixiki incha Elija.'' ⁵ Pukaru ku shu hweta, ni mwene, lidzunzho lyakuba cheka, mi ni mwene, kwaru kuzwa lyiyi mu lyudzuzho, atikya, ''Yopani i mwananga indati shaka, indati rumbuwa shakye. Ni mwi kyekye.'' ⁶ Pu barutiwa baru ku yuvwa akyo, baru wulya peshi mi bata ywapa nanyina. ⁷ Jeso akuya kuba pata aku tikya, ⁸ ''Ni yime nisiye ku ywapa.'' Baku lyaya kwi lyiiro kono kuku yibaru ku mwana tana Jeso ngaho. ⁹ Pubaru ku suka pu lyurundu, Jeso akuba zira atikya, ''Nisiye kazira shina tana pushi Mwana Muyeyi ishaku tambuka kubafu.'' ¹⁰ Barutiwa bakye baku muwuza, shikya, ''Shikya pu bañoli bata tikya Elija ndamati swanera kuya itanzi?'' ¹¹ Jeso akwi taba atikya, ''Elija nanyina shaye indi kuya ku shusiza izuto kozo. ¹² Kono ndatni zira, Elija kali mataya, kono kuku yamuyiba. Nanga ndipakyo, batisi kozo zubati shaka kukye. Mwinjira yati fwana, Mwana Muyeyi shashiswe mumanja awo.'' ¹³ Mi barutiwa bakye baku yuvusisa atikya karu ku hweta za Johani Mukorobezi. ¹⁴ Pu baru kuya kwi lyinji, muyeyi akuya kukye, akuya ku kubama, aku tikya, ¹⁵ ''Shikaka, fwera mwananga zuxuma, mati mashira indi ku shanda ahuru. Mata wulya mwami kapa munduro. ¹⁶ Ndamu lyeta ku barutiwa wee, kono amaba mupwelise.'' ¹⁷ Jesoakwi taba atikya, ''Shicaba shahati tishira sheshi fosahara, kalyare ndaku sikama nanwe? Kalyare ndakuba nanwe? Mulyeta kuni kumyee.'' ¹⁸ Jeso aku kalimera ma Dimona, mi zakuzwa kukye, karwa kaku pwara papa ngaho. ¹⁹ Mi barutiwa ba kuya ku Jeso kurupati baku tikya, ''Shikya putahara kunga hindika?'' ²⁰ Jeso aku tikya kuwo, ''Ishi tumero enu yiche. Injahamu ndatikya kunwe, nanga ndinina tu tumero totuche tandi zishe zama sitete, nati kwana ku tikya ku lirundu, 'nzwapa ukwenda kuna,' mi mboli yendye, mi kuku shati para kunwe.'' ²¹ Ma dimona ngangahopani amanga kwenda tana shuku rapera indi kuli yimina zulyuwa ²² Pubahara shisise mo Galilea, Jeso aku tikya ku barutiwa bakye, ''Mwana Muyeyi mbwapewe mu manja abayeyi, ²³ mi Mbuba mubbure, mi mulyiba liwu tatu sha tambuke.'' Barutiwa bakye baku hakamara nanyina. ²⁴ Pubaru kuya ko Kapenauna, muyeyi yumu tyerisi akuya ku Pitorosi aku tikya, ''Muruti enu tanikati shara mutyero?'' ²⁵ Aku tikya, ''Eye.'' Pitorosi pukaru kuya kwi njuwo, Jeso aku hweta kukye itanzi atikya, ''Shikya mati yanakana, Simone? Ikure ma shikati ulyuvu bayisa zi shira? kwa bana bawo kapa kuba bamwe?'' ²⁶ ''Kuba bamwe,'' Akwi taba Pitorosi. ''Cware abana bali kyeta,'' Jeso aku tikya. ²⁷ Kono amata ku panga bashalyisi kupanga shibe, nakwenda ku liwate, ni karakyi tushuto, mi nika patye zushwi zakuya itanzi. Punaka chekura mi romo azo, mboni shangane ushereñi. Ni muyise nika mupe bati sharisa atikya ijwanga nanwe.''