¹ Pu Jeso indi barutiwa bakye baru shera shufupi ni Jerusalema kuya Betefege, kwi kaku muko a Olive, mi Jeso aku tuma barutiwa ba biri, ² aku tikya kuwo, ''Nakwenda ku munzi washi fupi, mi mboni shangane ka uhashi yomu shimina, indi mwana hashi. Nikazi chuture nizi lyetye kumyee. ³ Ati kuna ikaku hweta kocho kunwe, ni tikya, 'Shikati matiba shaka; mi muyeyi yopa papa ngaho mbwaka tu tumine nanwe.'' ⁴ Zopani ziya ati zata hwetuwa shaba porofita zi yizirizwe. Aku tikya, ⁵ ''Zira abana wushi sizani ba Zayona, 'Mwana, Shikati enu matiya ku nwe, shukulyi xumakawo mi maranda pu Hashi- mwana hashi.'' ⁶ Cware barutiwa ba kwenda bakarasi shi Jeso ama taba tyeya. ⁷ Baka lyeta uhashi indi mwana kye baku bika ziraro zawo pwi lyiro, mi Jeso aku sikama pwi lyiro lya ziraro. ⁸ Uwonji wu lyiywaba baku rara ziraro zawo mwi njira, ba bamwe baku xhaka zu tobye zimiti indi ku ziyara mwi njira. ⁹ Cware lyi ywaba ilyaru kwenda pu wuso wa Jeso indi barana mu lyiqo lykye baru ku shupura, ''Hosana ku mwana Davida! Ku rumbuwe imatiya mu lyina lya Shikati! Hosana mwi lyiiro!'' ¹⁰ Pu Jeso karu kuya mo Jerusalema, Murenenyi kowo wata yima kana baru ku tikya, ''I yani yoo?'' ¹¹ Lyi ywaba lyakwi taba, ''Yoo i Jeso muporofita ku dzwarira ko Nazareta indi Galileya.'' ¹² Cware Jeso aku njena mwi kereki. Aku hindi shira penje ibaru ku wulyisa indi ku wura moo, kereki, ndukuyi yaru muna zi tafure zaba tichicha marwapa, indi zu puna ku sikama ibati wulisa makiri. ¹³ Aku tikya kokuwo, ''Kunwara injuwo anga ikya iberuwe atikya injuwo uzi tapero; kono kali nayizoru malyi zuko aba bezi.'' ¹⁴ Cware baba pofo indi baba hwere ba kuya kukye mwi kereki, akuba pwelisa. ¹⁵ Kono ba purisita ba bakuru indi ba noli pubaru ku mwana izuto izati hakamaza iza mata rasi, indi pu baru ku yuvwa ba pundi bati shupura mwi kereki atikya, ''Hosana ku mwana Davida,'' Baku menga nanyina. ¹⁶ Baru ku tikya kukye, ''Tamati yuvwa zubati hweta? ''Jeso aku tikya, ''Eyee! Kono kani chire kubara, 'muzu toroza bapundi indi i bashi nxhamwa ma marukisa mi rumbeko'?'' ¹⁷ Cware Jeso akuba siya akwenda kwinje lyi murenenyi, kwenda ko Betenia aka ramgara ko. ¹⁸ Cware maxhehumu, pukaru ka shuka mu murenenyi, matafwa injara. ¹⁹ Pu karu ku mwana wu kuyu ku muguru injira, akwenda kuwo aka shangana atikya muqu tana mapapa. Aku tikya kawo, ''Shu siye ku bika zipata nangweza,'' papa ngaho wuku kukuta. ²⁰ Barutiwa pubaru ku wu mwana, baruku hakamara baku tikya, ''Ingahare muti wa pweri kuku kuta akyopa?'' ²¹ Jeso aakubara taba, aku tikya kuwo, injahamu nanyina ndani zira, ati nati tishira nahati gooroza, kani muni shani rasi ishara sisini ku muti ngaho, kono shani tikya ku lyiqhiri, zomuka papa uka wulye mu lyuwate; shashi rasisini. ²² Kono shinati rungira shi tapero, niti shire, shani shipewe.'' ²³ Jeso pukarukuya mwi kereki, ma pirisita kuru indi baba kuru mu minzi ba kuya kukye pu karu ku kutaza, bak uya ku tikya, ''Iqumu kya mati bberikisa mi i yani maku piyo?'' ²⁴ Jeso akubara taba atikya, ''Indimye ndati ni wuze shihweta shixiki, ati nandi zira indimye mbondini zire atikya ishi qumu ayani ndatisi zopani shayo. ²⁵ I korobezo a Johani ikuyani yata dzwa? Ikwi lyiiro hali ku muyeyi?' Baru ku hwetizana mwikyo lyawo, ''atikya, 'iku lyiiro, 'kuti atikya ikutswe, 'Tashikya nahata mutishira?' ²⁶ Hape puta ku tikya, 'ku bayeyi, 'tati ywapa lyi ywaba, shuku tikya lyaya Johani akya muporofita.'' ²⁷ Bakwi taba Jeso akya, ''kati yi zire.'' Indimyee ka muni ndini zire i qumu indati sikawo zopani shayo. ²⁸ Cware shikya nati yanakana? Muyeyi ana abana ba biri. Akwenda kwi ywi tanzyi ndika tikya, mwananga ukwenda uka bberike namushi mwi fuba yi waine! ²⁹ Mwanakye ndu mwi taba atikya, 'yemwa ndakwenda; kono ku dzwapo aku yaru muna amano akye akwenda. ³⁰ ''Cware muyeyi ndu kwendira yuyumwe mwanakye ndika muzira izati fwana. Akwi taba atikya, Ndatyenda, kono ama yendye. ³¹ I yire kwa bana baba biri yamata rasi za mati shaka shawo? Baku tikya, ''Uywi tandzi'' Jeso aku tikya kuwo, ''injahamu nanyina ndani zira, mushalyisi indiba bashashi shaba njene mu muwuso ilyiiro kuni siya. ³² Shuku tikya Johani mataya kunwe shi njira yi shiyama, kono yemwa ni muti shire. Cware mushalisi indi baba shashi bata muti shira. Kono yenwe, indi puna monu zini, yemwa ni bake ku dzwapo atikya numu ti shire. ³³ ''Nira kyekye kwi nguli yi yimwe. Kwarana muyeyi, yana muvu. Aku kuna i fuba yi waine, akuya kuzhabira mapara, akusa shurubiro, akwi qhini mo katara kuku bika mo balimi. Akwenda ku lyuvu lyi lyimwe. ³⁴ Kakanda ku kuvuna pukaru ku shera, aku tuma bavuya bakye ka kunganisa zi pata. ³⁵ Kono balimi baku yisa bauvya bakye, baka zipa muxiki, baku bbura yuyumwe, yuyumwe baku muxapara sha mawee. ³⁶ Ku dzwapo, umuni i fuba aku tuma babamwe nangweza, babenji ku bbara iwi tanzyi, balyimi bakuya kubarasi tandi shubata rasi wi tanzyi. ³⁷ Ku dzwapo aku tuma mwanakye kuwo, akya, tama mboka yope umwana.' ³⁸ ''Kono balyimi pubaru ku mwana mwanakye, bakuli zira mwikyo lyawo atikya, 'swana yoo. Nakuya, tumu bbureti yore'. ³⁹ Cware baku mu yisa, baku mwi kyamina penje, lyi fuba indi ku mu bbura. ⁴⁰ Papani umunu i fuba pusha kuya, shaye ku tyera malyimi? '' ⁴¹ Ba ku tikya kukye, 'shaye ku shinya bayeyi ibana kansa mwi njira i bbi nanyina. Indi kupa i fuba akye kuba rwezi, ishaba mupa iza kye mu kakanda kuku vuna.'' ⁴² Jeso aku tkya kuwo, ''Amani bare manoro, 'Lyiwee lyu muxhinikawo uma yuwo amata shita, ndi lyataba ndima qhipiro. zopa zata dzwa ku Shikati, zati hakamaza mwa mesho etu'? ⁴³ Cware ndata tikya kuwo, muwuso Urezya shawu gisuwe kunwe indi ku pewa ku rusinga irwati bika zipata. ⁴⁴ Kwekye imati wulya pu lyiwe lyopani, inkya xanakye xanakye kono isha wulywa kulyo inkya nxapukye. ⁴⁵ Ba pirisita bakuru indi ba Farisi pubaru ku yuvwa zinguli za kyee, baku yuvwa atikya izawo ka ru ku hweta. ⁴⁶ Baku shaka ku mupata, baru ku ywapa lyi ywaba, shuku tikya bayeyi baru ku muyisa atikya muporofita.