¹ Assaanaaka, mwiiwe tjin'himya athumwaninhu, ni mwiiweehe ratta; tjitjon'mo n'naahala otjuwela oviriyana essiyani. ² Kinoovahani ekeno tjooreera; n'hihiye tjin'himyaaka. ³ Waaryaaka nanttonpe waathumwanaka, mwaana ootteethyaa aanumwanaka, ⁴ yaanokihimeerya yiiraka: nrimaa okhale nimoolumwaaka; ossunke tjoorumatjaka ni okhale. ⁵ Okhalane otjuwelatja niwiiweeha; ohiliyale moolumo on'mwaanomwaka; ⁶ ohihiye otjuwelatja, ni enaahala wookhavihera; ofente. ⁷ Otjuwelatja etthu yuulupale. Phimaana, okhalane otjuwelatja ni ovarele nteko tjooteene tjirinaa wiira okhalane otjuwela. ⁸ Ovaressesse otjuwelatja onaahala owoopola; onaahala woottittimiha wafentavale. ⁹ Onaahala woovaha ettthuvo n'murumwaa; onaahala woovaha waarya. ¹⁰ Wiiweehe mwaamwanaka moolumwaaka, ni onaahala okhalana eyaakha tjintji mwiikuminiwaa. ¹¹ Kihoweettihera munttalani mootjuwelatja; kihoweettihera n'mittalani tjossariya. ¹² Weettakavale, khaavo n'hala owinkittha, ni watthawavale khun'hala omora. ¹³ Ovaresesse en'himyaaka ohihiye; ossunke, kontha phiikumyaa. ¹⁴ Ohaattharatthare atthu oohiloka ni oheete munttalani mwaatthu anvara tjoonhala. ¹⁵ Ohuluwe, ovire nttala nkhwaawe. ¹⁶ Kontha yaayo khanrupa ahipankale yootakhala, ni ekhvetjaya tjin'mwa anapankale yootakhala. ¹⁷ Kontha ayena olyawaya wala owuryawaya onkhala woovara tjitthu tjootakhala. ¹⁸ Massi nttala wanassariya ori nthuko wonihuku nowantjera, onoonyaa ventji; onawoonya tjinene npakha othana. ¹⁹ Nttala waatthu oovavarya ori phanka epiphi; ayena khantjuwela tjin'moraaya. ²⁰ Mwaamwanaka, wiiweehe moolumwaaka; otteke maarwaayo oviriyane en'himyaaka. ²¹ Tjihikhume n'meethonimwaa ossunke wanrimaniwaa. ²² Kontha moolumwaaka ekumi wayaale anphwanha ni ekumi weerutthu yooteene. ²³ Nrimaa okhalihe woolipa ni ossunke niikhalelwaa yooteene, kontha watjen'nho phinkhumenlaaya ekumi. ²⁴ Ohuulumatje moolumo oohikhala. ²⁵ Meethwaa aweheke ohoolo ni oweheeheke eri ohoolowaa. ²⁶ Weeteke mittala tjowookwaa; tjinaahala okhala tjoolipa. ²⁷ Ohihapuwele moono woolopwana wala moono woothiyana; enhaatjaan'nho ohulusse mootakhala.