¹ Mwaamwanaka, ohiliyale tjoorumatjaka ni tjinoossomihaaka tjikhale wanrimaniwaa, ² wiira mahuku mentji niiyaakha tjeekumi ninrettele, tjintjenriye. ³ Ekhweelyaaka nin'nema nowaataana khatjinookhumatho; on'hala otthukenla nssikonimwaa ni ossunke wanrimaniwaa. ⁴ Vano, onaahala ophwanha n'nema wameethoni waNluku nintthu. ⁵ Waakhuluvele Apwiya ninrimaa wooteene ni ohiikhuluvele nootjuwelatjawaa; ⁶ omuupuwele n'mittalaniwaa mooteene ni Ayena anaahala wookhavihera. ⁷ Ohiittjoone otjuwelatja, owoove Apwiya ni ohuluwe yootakhala. ⁸ Yeeyo en'hala okhala phuuvona mwiirutthunimwaa noomumula erutthwaa. ⁹ Mwaattittimihe Apwiya nimihakhutjinhu nimihokorokho tjowantjera wiima tjiruweryaleenhu, ¹⁰ nimakhupiinhu anaahala otjara. ¹¹ Mwaamwanaka, ohitanhifu tjin'himya Apwiya ni ohihanhurihe moolumwaaya, ¹² kontha Apwiya anon'himeerya nonfentaaya, phanka thumwaane tjinon'himeeryaawe mwaana nonfentaawe. ¹³ Ooreeriya phuule rina otjuwelatja, ni yena naaphwanha wiiwenla. ¹⁴ Enphwanhaa nootjuwelatja phiri yooreera ovirikana enphwanhaa nparathani niitjaira, woovirikana ewooru. ¹⁵ Otjuwelatja phiri etthu yooreeressa ni khiivo enpheelaa olikanihera. ¹⁶ Otjuwelatjan'wo ohaana mahuku mentji moonwaa woolopwana; ntatanaa noothiyana, mihakhu ninttittimiho. ¹⁷ Mittalatjaya mittala tjomaana ni tjinvaraaya tjooteene tjinkhala tjonrettele. ¹⁸ Nri weekumi wayaale anvara; yaale anttharenla anaareerihiya. ¹⁹ Nootjuweatja, Apwiya ahiissiha etthaya; nookhalela Ayena ahunpa erimu. ²⁰ Nootjuwelawaya, mwaamuro tjaahotthukuwa nimahutte yaahomoriha okamyaaya. ²¹ Mwaamwanaka, okhalane muupuwelo womun'nepani, ni ohikumihe owithowaa. ²² Tjin'hala okhala ekumi mun'nepanimwaa nin'nema nnssikonimwaa. ²³ Vano, onaahala weetta moolipa munttalanimwaa ni enhaatjaa khatjinrimeela; ²⁴ warupavale, khun'hala woona, onaahala orupa ni ekhovetjaa tjin'hala okhala tjooreera. ²⁵ Ohoove etthu, wala tjitthu tjin'hala okhumenla, ²⁶ kontha Apwiya anaahala wookhavihera ni anaahala woohulussa n'miryankhoni. ²⁷ Wakhalana ekuro yoovara, oophwanela ohaahiyere yooreera. ²⁸ Ohimwiire nkhwaa: orwee ni ohokolyee, meelo kinaahala woovaha, wakhalana nssurukhu. ²⁹ Ohinlakele nkhwaa, nkhala wakhiviru niwe ni nookhuluvela. ³⁰ Ohaattakane, woohissariya, nintthu, hiwiirihale etthu. ³¹ Ohinthanhe ntthu ootteetthyaa, wala ohithanle mittalatjaya. ³² Ntthu owootha nttehatteho waApwiya, massi Ayena anonvaha essariya nonkhuluvelaaya. ³³ Otakhaliya waApwiya onkhala etthoko yantthu oovavaryaa, massi Ayena anreeriha etthoko yaanassariya. ³⁴ Ayena anaakhaliha atirikhi atthu oohanhuriha, massi anaavaha nfentwaaya atthu owiiyeviha. ³⁵ Ootjuwelatja anaahala ohalana elapo, massi atirikhi an'hala okhala niihayatjaya.