¹ Mwaamwanaka, oviriyaneehe otjuwelatawaka; otteke maaru wiiweehe, ² wiira otjuwele tjinviriyanaa, nimatteryaa ankhavihera otjuwela. ³ Kontha mattere anthiyana nluvi ari phanka oravo, nimalakwaawe phoovevyaala phanka makhura, ⁴ massi, woomaleloni, anaawaawa, niweetha phanka ekatana. ⁵ Enhaatjaya tjinkhuruwela mookhwani, meettelwaaya onaarweehela nkhapure. ⁶ Ayena khankutakuthyaa nimakhalelo; weettawaya onawaapaphara, khantjuwela onrwaaya. ⁷ Vano, assaanaaka, nkiviriyane; n'hinhanhale moolumwaaka. ⁸ N'hiwaattamatje yaayo, ni n'hiphiye watthokoniwaya. ⁹ Npanke yeeyo enan'neeyo wiira ehiiranyee mwaavahaka etthuvweenhu atthu akhwaawe, eyaakhatjinhu tjintji tjeekumi munvahaka ntthu oohiphwanela; ¹⁰ oohiphwanela akussaka n'hakwaa; tjitjon'mo ovarale nteko womahala ntthoko naatthu oohitjuwanyaa; ¹¹ ni, woomaleloni weekumyaa, erutthwaa enamalale; ¹² wiiraka: Phanka tjahaapheelaaka ohimeeriya ni nrimaaka ohitthunaka ovaanhihiya! ¹³ Akiiwelenle yaakissomiha, wala maarwaaka akaattekelale yaakihimeerya. ¹⁴ Kaahomorihiya eriyari wonthukumano, waatthuni. ¹⁵ Ovurye maatji owahimeniwaa. ¹⁶ Tjen'nho mwaamuron'nho tjaanaamwareela miphantte tjooteene, ni arwaaka mapuro aatthu entji. ¹⁷ Akhale awinhu paassi, woohikhala atthu ahinaatjuweleenhu. ¹⁸ Emurweeyo ereerihiye, ni otteeliyeke naamwaaraa eenanttonpyaa; ¹⁹ ayena nphantte wonfento, phomahala. Makhalelwaaya anawoohiyani ootteeliya ni onkhala oohapaliya ninfentwaaya. ²⁰ Vano, mwaamwanaka, essiyani waahalaa okhala ootthukeliya ninthiyanaooraruwa. Waahala onpatthan'nelani yoola nthiyanoola. ²¹ Apwiya anaaweha tjooteene ntthu tjinvaraawe ni anamoona n'neettaawe. ²² Ntakhali n'hala ovarihatjiya nitjoonhalatjawe; mikhoyi tjotanpitjawe tjinaahala ontthuka. ²³ Yena naahala okhwa mwaha woohitthunawaawe ohimeeriya, ni, naahala orimeela.