¹ Tjihin'ririyaaya elimwe wala epula wiihephaka, tjitjo'mo nlolo khanphwanela ottittimihiya. ² Phanka leeeketja tjinaattaawe mapupha ni mwaanuni phinvavaawe, tjitjo'nmo otakhalihiya woohissariya khunvareliya nteko. ³ Echikote enaatteliya ekhavalo, ehaavo enaatteliya enama, ni nkopo naatteliya nlolo. ⁴ Ohimwaakhule nlolo nootthunawaa, wala on'hala okhala phanka yenani. ⁵ Omwaakhule nlolo weenan'na tjinonphwanelaaya, wowiira yena hikhale ootjuwelatja wameethoniwaa. ⁶ Nonvahenra nuulumo nlolo nthikila enhaatjawe nvara tjootakhala. ⁷ Phanka metto tjantthu owuntakyaa, tjihirinaawe ekuru, tjitjon'mo phankhili mwaano anlolo. ⁸ Otthuka nluku, onvaha nttittimiho nlolo. ⁹ Phnaka mwiiwa onkela n'matatani mwantthu oohapaliya, phankhili antthu nlolo. ¹⁰ Phanka ntthu naarakaliha arinaawe, tjitjon'mo phuule nonrweela nlolo wala khula ntthu nvira. ¹¹ Phanka mwalapwa n'lyatho eraphyaalyaawe, phinlolo naakulela envaraawe. ¹² On'nomoona ntthu ootjuwelatja n'meethonimwaa. Ehaavotho yookhuluvela wantthu nlolo hikhanle yena. ¹³ Ntthu owoolwaa niira: Haavo kharamu nparapaarani! Haavo kharamu mapuro owoonyaatja! ¹⁴ Tjitjon'mo phunkhora ontthukuleliyaaya, tjitjon'mo phintthu owoolwaa wakoriniwawe. ¹⁵ Ntthu owoolwa naarweeha ntatanawe munkhukini massi nawoolwaana okussa eyoolya ohela mwaanomwawe. ¹⁶ Ntthu owoolwaa niitjoona otjuwela tjinene woovirikana naatthu ssaapa antjipwa ratta. ¹⁷ Phanka yoole nvarenla manharu omwalapwa, tjitjon'mo phintthu niitupheliya mwaha ohiri wawawe. ¹⁸ Phanka ntthunriha mattheere, ¹⁹ tjitjon'mo phiyoole nonthepya mwaattaman'nwaawe iiraka: Kaanaathuka! ²⁰ Woohikhuni, mooro onaattiphyaa, ni nipuro niri ntthu owuulumatja, khun'maalyaa. ²¹ Makhala tjinvareliyaaya nteko niikhuni tjinpaheriya mooro, phintthu owuuluma tjinene ntetheryaawe ewaniwani. ²² Moolumo antthu owootootha npheelessa aviriyaniyeke, tjin'mwareela mwiirutthuni. ²³ Phanka mwaapu wooloko, tjitjon'mo phimalaku owuuluma tjinene ninrima wootakhala. ²⁴ Yoole naathanha akhwaawe, nimalakwaawe, etjukutjawe tjinonkhala yena. ²⁵ Yena n'hala ovara tjomahala , massi ohinkupalii, kontha wanrimaniwawe onootjara otanhifu. ²⁶ Onookhalaru nttimanawe ninookhuneeliya niwootha, ohilokawawe on'hala othoonheriya waatthuni. ²⁷ Yoole nthipa nlikitti, naahala omorela; ni yoole n'hala okakha nluku ninaahala onrukunuwela. ²⁸ Ntthu owootha nawaathanha atthu ahinaatthunaawe, ni malaku owuuluma tjinene owaana ewaniwani.