¹ N'nha miruku tja Salomao, tjitakiheriye naatthu aEzequias, mwene oJuda. ² Waarya waNluku okhuneela tjitthu massi waarya womamwene okohakoha. ³ Phanka erimu tjiryaaya ottayi niitthaya tjiryaaya yowinssa, tjitjon'mo mirima tjomamwene khatjinlikanihiya. ⁴ Okumihe nreerelo woparatha ni namateka naahaa otekela enupaa. ⁵ Tjitjon'mo, waakuhe atakhali ohoolo wamwene ni ehitjyaawe enaahala okumihiya apankaka yooreera. ⁶ Ohiittittimihe ohoolo wamwene ni ohiitakanihere nipuro naatthu oolupale. ⁷ Yooreera yena owiirela: Oweleke, wahikhanle owoonihatja ehaaya ohoolowawe. ⁸ Ekhalelalyaa ossaahiti ohiwaane, wowaakuvyaatja, oparassa! On'hala opankani woomaleloni, mwaattaman'nwaa awooniha ehaaya. ⁹ Ntwaalitji ooyeelitjimhu ni n'hihimyatje essiiri yantthu, ¹⁰ wala yoole niiwa naahala owooniha ehaaya ni woohihissima khun'halatho omaalyaa. ¹¹ Nuulumo nowuulumiya owakathi woophwanela, ori phanka massa owooru wala tjoophwanela tjoparatha. ¹² Phanka epirinku yowooru wala nkhova woopankiya niiwooru, tjitjon'mo phuuhimeeriya wootjuwelatja wantthu owiiwa. ¹³ Phanka oririya owakathi woohephiya, tjitjon'mo phinrumeyi owaamini wayaale anonveleeliha, yena naakuha ekumi tjaafuntyaawe. ¹⁴ Phanka mahutte niiphyoo woohipula, tjitjon'mo phiyoole nkussa etthuvwaawe hivahale. ¹⁵ Noovilela, nkhulupale naahissimwiya, ni malaku owuulumatja anaahon'na nikhuva. ¹⁶ Waphwana oravo, olye vakaani, wintjera onkooraphyaa. ¹⁷ Ohinhakelihe n'nhaanaa emaara tjintji wamwaattaman'nwaa, yena naahala owootjyaa niwoothanha. ¹⁸ Ntthu nonvahera namoona owootha mwaattaman'nwaawe nkhala phanka ekatana yookhottoni, wala nttheere noothonkoliya. ¹⁹ Ntthu oohiphwanela ononkhuluvela owakathi womahuviho niri phanka niino nootten'mwa wala n'nhaa nootherekuwa. ²⁰ Phanka ntthu nrula ekuwo owakathi wooririya, wala phanka evinagre yooheliya n'yoolyani, tjitjon'mo phiyoole niipela etjipo nrima woolemela. ²¹ N'wananyaa akhala niitala, onvahe yoolya, ni akhala nintthona onvahe maatji awurye, ²² kontha on'hala wiitjeessenra yooviha wanruwaa ni Apwiya anaahaa wootthuva. ²³ Yooreera phanka ephyoo en'niwiihera epula, tjitjon'mo malaku anttonka essiri anruwerya ekhove tjoorussiya. ²⁴ Yooreera okhala wanloothoni watjulo enupa wahikhanle ntthoko nanthiyana owuuluma tjinene. ²⁵ Phnaka maatji ooririya nintthu rina ntthona, tjitjon'mo phimoolumo ooreera ankhuma elapo ekhwaawe. ²⁶ Tjin'hiiryaaya maatji anvira, tjitjon'mo nassariya phin'moraawe mwaatakhali. ²⁷ Khunphwanela olya oravo mwintji, ori phanka orweela nttittimiho ninttittimiho. ²⁸ Ntthu nkhala woohilamalelwaawe nkhala phanka epooma yomirikariko wala yoohitekenliya.