¹ Ohikutakuthyee ninihuku nomeelo, kontha khuntjuwela yomeelo. ² Wuulumiye naatthu wahikhanle malakwaa, ntthu nkhwaawe, wahikhanle malakwaa. ³ Owehe elemelelo yonluku ninpuussu; opatjapatja wanlolo onaalemela ovikana tjooteene. ⁴ Ohaavo otakhala wowuuluma tjinene noorussiya, massi tupani nphwanela ovilela ehatje. ⁵ Yooreera ohimeeriya ekhweli wahikhanle nfento woovithiya. ⁶ Oreera makhwatta aphwanhalyaa ninpatthani, massi n'wanani nawoovaha etjwaatjwaa mahuku mentji. ⁷ Ntthu lyale phurupala nakhotta oravo, massi, ntthu envolale etala, etthweene yoowaawa noona onaa. ⁸ Mwaanuni nvava, ottayi wopuurwaawe, phintthu n'huluwa nipuro ninkhalaawe. ⁹ Eperfume niilunpani tjinatjiveliha nrima, massi enpheelesseehu wanpwaneehu ohimeeriya. ¹⁰ Ohintthawe npwanaa ninpwanaaya athumwanaa, ni ohirwee ntthoko namwaamun'naa nihuku nopokoho. Yoorera mwaattaman'nwaa woohikhala mwaamun'na ryuuttayi. ¹¹ Okhale ootjuwelatja, mwaamwanaka, ni otteelihe nrimaaka; vano, kinaahala omwaakhula yoole nkithanha. ¹² Ntthu oophwanela namoona yootakhala ni nawiipitha, massi atthu oohiloka phinttharaaya ni phin'hawelaaya. ¹³ Okusse ekuwaawe yoole khuluvelihale yowaatjima. ¹⁴ Yoole n'hala onreeriha mwattaman'nwaawe, oreerihiyan'wo onaahala otakhalihiya! ¹⁵ Nthiyana owuuluma tjinene nkhala phanka maatji opula; ¹⁶ opheela on'hiiha ori phanka ohiiha ephyoo, wala opheela okussa makhura nintata noolopwana. ¹⁷ Eyuuma enaathonkola eyuuma; weenan'na yeeyo, ntthu nanthonkola npwanaawe. ¹⁸ Nkhikitjera nri naahala olya n'hokorokhwaaya, ni naattittimiha apwiiyaawe naahala ottittimihiya. ¹⁹ Tjitjon'mo maatji tjinreerihaaya ekhove yantthu, phinrima wantthu tjinuupuwelaaaya. ²⁰ Phanka ekhapure tjihintossiyaaya, tjitjon'mo meetho antthu khantossiya. ²¹ Crisol nipuro nintulussiya eparatha ni eforumu ewooru; ni ntthu nttehattehiya tjinuupuwelaawe. ²² Hata onttarusse nlolo niiryawe, niitthaka, hata tjitjon'mo ololwaawe khan'hiya. ²³ Okupaleeleke otjuwela makhalelo anamatjaa, ni okutakuthyeeke niinamatjaa tjintji, ²⁴ kontha n'hakhu onaamala. Vano etthuvo enaakhala makhoto ooteene. ²⁵ Ohaana otjuwela yophiyaaru yeekumihiyaka ni yophyaaru yiiwaaniyaka, ni owakathi on'hephiyaayan'mamyaakoni. ²⁶ Tjen'nho enaman'nho tjinaahala opankeliya ekuwo, ni tjootumihiya tjinaahala okhalana ehissapu n'mwiini. ²⁷ Enaahala okhala eleeti tjomope watthokoniwaa, nitjoolya tjaanantekwaa.