¹ Nrima wamwene nphwinko womaatji nmatatani waApwiya; Ayena an'mweettihera onpheelaaya. ² Meettelo akhula ntthu noona okhala ooreeraru n'meethoniwawe, massi Apwiya phanoona miriman'nho. ³ Opanka yooreera niissariya phinpheelessaaya Apwiya woovirikana nookuttho. ⁴ Atthu owiitjoona nimirima tjoohiloka nthuko waatthu oovavaryaa, tjooteene etanpi. ⁵ Tjowuupuela tjantthu oovara nteko tjinene, tjinaamweettihera ohoolo, massi yoole naakuvatja naakuvenla ohuva. ⁶ Ophwanha mihakhu mwaha wowootha tjinaavira ni tjinawiiva. ⁷ Tjoonhala tjaatakhali tjinaahala waakwetja, kontha anaakhotta ovara tjeekhweeli. ⁸ Ntthu oohitthuna etthu nkhala mootjikuwatja, massi yoole oophwanela nvara yooreera. ⁹ Wooreera orupa wanloothoni watjulu enupa wahikhanle ntthoko nanthiyana owuuluma tjinene. ¹⁰ Atthu oohiloka anpheela ovara yootakhala; mwaattaman'nweenhu khaanoonela othunku. ¹¹ Namathanha attarussiyaka, oohiphwanela naakhala ootjuwelatja, ni ootjuwelatja ahimeeriyaka, yena nawiiwenla. ¹² Nluku, ossariya, n'weheeha ntthoko nantthu oohiloka ni naakwanhulatja atthu oovara tjoonhala. ¹³ Yoole nttiyela maaru okhuwela wamassikhini ni yena naahala okhuwela, massi khan'hala wiiwiya. ¹⁴ Etthuvo yoovahiya nssiirini owaana ewani. ¹⁵ Tjavariyaka tjossariya, tjinantteeliha nassariya, massi n'nawaakassiriha atakhali. ¹⁶ Yoole nkhuma munttalani mootjuwela n'hala omumula mwaatthu ookhwa. ¹⁷ Nfenta tjontjivela naahala ohuva; yoole nfenta nipha ni yoonhuunha khan'hala othatjiri. ¹⁸ Ntthu oohiiwelela naattarussiya wanassariya, ni anamatankanha anaattarussiya waatthu oophwanela. ¹⁹ Yooreera okhala moothakoni wahikhanle okhala ninthiyana owuuluma ventji. ²⁰ Ohaavo n'hakhu wooreera ntthoko wantthu ootjuwelatja, massi ntthu oovavarya naakwanhula woomalela. ²¹ Yoole npanka yooreera ni nphwanela naaphwanha ekumi, essariya nittittimiho. ²² Ntthu otjuwelatja naakhala niipooma tjooreeressa ni naamoriha elipelo tjinkhuluvelaaya. ²³ Nssunka makhalelwaawe nkhala ottayi nimahuviho. ²⁴ Owiittottopa tjinene ntjinanawe namahanhuriha neetta niwiittottopawawe. ²⁵ Etthunelo yantthu owoolwaa onaamwiiva, kontha matataawe khantthuna ovara nteko. ²⁶ Nihuku nooteene, yena phinpheelessaawe tjinene, massi nassariya naavaha ni khiivo en'halanaawe. ²⁷ Okuttho wantthu oohiloka khunphwanela; tjinkhala tjoovahiya naatakhali. ²⁸ Namoona oohikhala naahala orimeela, massi niiwenla naahaka okhala owakathi wooteene. ²⁹ Ntthu ootakhala nthoonhera ekhovyaawe yoohiloka, massi nthiyana oophwanela nawaamini meettelwaawe. ³⁰ Khuuvo otjuwelatja, wala wiiwenla, wala tjoohimiya tjinpheela okhala waawanana Apwiya. ³¹ Ekhavalo entthonkomaniheriya okhottoni, massi otthema on'mwa waApwiya.