¹ Ntjina nooreera ninaatjuwanyaa tjinene woovirikana mihakhu tjuulupale ni n'nema phiri nooreera woovirikana ewooru niiparatha. ² Athaatjiri naamassikhini anaalikana: Apwiya phawunpale ooteene. ³ Ntthu ootjuwelatja naatjuwela yowoopiha ni nawiipitha, massi nlolo khaneemela ni phinn'huvelaawe. ⁴ Etthuvo yantthu owiiyeviha ni woova Apwiya othatjiri, nttittimiho niikumi. ⁵ Mwiiwa tjinphwanhanyaa munttalani mwaatthu oovavaryaa; nssunka ekumyaawe nkhala ottayi wayaayo. ⁶ Mun'himeerye mwan'hima nttala onpheelaawe weettela, ni uuluvalavale, khan'hala oliyala ehimeeriyaawe. ⁷ Athaatjiri anaahoolela amassikhini ni ankopha ankhala epottha wayaale anaakophelaaya. ⁸ Nvara tjoohiloka n'hala ohepha epokoho ni orussiyawinhu onaahala orimeela. ⁹ Yoole rina othunku naahala oreerihiya, kontha nawaavaha ahirina. ¹⁰ On'huluwe namahanhuriha niikhotto enaahala omala, onhakulihana nooruwanana onaahala omala. ¹¹ Yoole rina nrima wooreera ni avaraka yooreera naahala okhalana mwene phanka npwanaawe. ¹² Meetho aApwiya ankhikitjera otjuwelatja, massi moolumo antakhali, Ayena anaakwanhula. ¹³ Ntthu owoolwaa niira: Haavo kharamu ninttalooyo! Karwaavale, kinaahala okhwa. ¹⁴ Malaku anthiyana ooluvaluva ehime yowinssa; yoole n'hala orussiya naApwiya naahala omorela mon'mo. ¹⁵ Ololo ori wamotja ninrima wamwaana, massi ohimeeriyawawe onaahala on'huluwa niikopo. ¹⁶ Yoole naahuviha amassikhini wiira intjenre nhakhwaawe wala aavahaka athaatjiri, naahala ossikhinyaa. ¹⁷ Otteke maaru ni wiiweehe moolumo aatjuweli ni ohele wanrimaniwaa wowiiwawaa, ¹⁸ kontha onaahala oreerela okhalana mwiirutthuniwaa ni okhalana mwaanomwaa. ¹⁹ Wowiira nkhuluvelwaa okhala naApwiya, elelo kinoohimeerya, omwaneene. ²⁰ Akiwantikhelale tjoohimiya talaathiini tjonlakihero nootjuwelatja, ²¹ wiira koohimeerye ekhweeli womoolumo okhuluvelo, wiira waatjipwee tjookhuluvelyaa yoorumale. ²² Ohimwin'nhere massikhini, kontha yena massikhini, wala ohimoonihe oweryaa oohuva wankhora, ²³ kontha Apwiya anaahala waakiha mwahaaya ni anaahala wiiva an'hala owin'nhera. ²⁴ Ohikhale npatthani antthu ooviruwatja ni ohimweettane ntthu ootuphelatja, ²⁵ wowiira ohifuntte elamalelotjawe, wala nrimooyo ohitakanihere munryankhoni. ²⁶ Ohikhale phanka yoole nkhuluveliha, wala yoole nkhuluveliha milattu. ²⁷ Weehoone tjooliva, en'hala omwinkittha essiyani ntthu okussa nkoryaa. ²⁸ Ohikumihe mwiinano nonluku nkhalayi athumwanaa neessalyaaya. ²⁹ Ohomooneeha ntthu wehessessale ntekwaawe. Yena n'hala okhala ohoolo womamwene, woohikhala eriyari waatthu entji.