¹ Ntthu oohapaliya namahanhuriha ni nipha nokuru ohapala; n'hala ottharatthara khan'hala okhala ootjuwelatja. ² Orussiya wa mwene onkhala phanka nrunkulu nakharamu; nonpatjapatja naahala okhwa. ³ Ooreeriya phuule n'huluwatja ewaniwani, massi alolo antuphela n'hina wokhotto. ⁴ Ntthu owoolwaa khanlima nipuro noopheela oruweriya; yena nrwaa mapuro an'hephiya, massi khan'hala ophwanha etthu. ⁵ Tjoolakela tjiri amuupuweleloni mwaatthu onkhala phanka maatji owinssera, massi ntthu nootjuwelatja naahala okumihera vate. ⁶ Atthu entji ankhuwela wiira phon'nema, massi tupani aahala wiikhuwela ontthu saana. ⁷ Nassariya nkhala nin'nemanawe, assaanaawe anaahala okhala ootteeliya yantthara. ⁸ Mwene ookoma weehitjeni wiira alamule naakawaniha yootakhala yooteene eri n'meethoniwawe. ⁹ Tupani n'hala wiira: Nrimaaka phiwooreera; akinatanpi. ¹⁰ Yaayo nkaatthwaayo Apwiya khaanaatjivela. ¹¹ Hata nanttonpe naatjuweliya tjinvaraawe, meettelwaa yakhala ooreera ni oophwanela. ¹² Maaru aniiwa i meetho anoona, Apwiya ahunpa tjooteene. ¹³ Ohifente orupa, onaahala okhala massikhini; otthukule meethwaayo ni onaahala okhalana eyoolya yintji. ¹⁴ Orika! Niira namathuma, massi, akhumavale, nootjuwelessa evaralyaawe. ¹⁵ Tjihaavo ewooru nimaluku owaarya mentji, massi malaku ootjuwelatja phanthatjiri. ¹⁶ Okusse ekuwo wayoole iivahenrale onkophela ntthu oottayi; iitjeemessere mwaha wookhuluveliha onkophela ntthu hinontjuwelaa. ¹⁷ Ephaawu ephwanhiye mwaha wowootha otjiva, massi, ohoolowaya, mwaanomwaa an'hala otjara maluku ooyevatja. ¹⁸ Tjoolakela tjinvariya mwaha woohimeeriya ni, mwaha woohimeeryatjiya nootjuwelatja, onaawaniya. ¹⁹ N'hankawaani nttonkatja essiiri; phimaana, n'hitakaneele naatthu owuuluma ventji. ²⁰ Ntthu aatakhaliha athumwanaa wala anumwanaa, nthukwaa onaahala ottiphyaa mwiipiphini. ²¹ N'hakhu wookhalaniya nihuku nihinaphiya khun'hala okhala oreerihiya woomaleloni. ²² Ohiire: Wakipanka yootakhala nimiivani kinaahala woopanka yootakhala! Wanriihe Apwiya, anaahala owoopola. ²³ Apwiya waarussa atthu tjon'mo; Ayena khaanaatjivela atthu owiihimyawimya. ²⁴ Meettelo antthu an'malela waApwiya; vano yena n'hala otjuwela tjani nttalaawe. ²⁵ Wuulumatja woohilokaloka nryankho: Ehotthapeliya waNluku, ni wuupuwela etthu en'himyaaya yuulumatjalyeeyo onapankale yoothanla. ²⁶ Mwene ootjuwelatja nawaakawaniha atthu ovavaryaa, vano ohoolowaya phwaakhaviheraka. ²⁷ N'nepa wapinaatamu nthuko waApwiya, onrweela eri wanrimani. ²⁸ Nkhuluvelo ninrettele onankhuluveliha mwene; ehitjyaawe envarenliya ninfento. ²⁹ Waarya wananttonpe ori nkurunimwawe, niihissima yomitje, nikhararitjaya tjootteela. ³⁰ Orakala onaamaliha yootakhala, ni ohuva onaareeriha erutthu.