¹ Vahoreera okhala massikhini neetta nimakhalelwaawe hikhanle nlolo nuuluma woohilokaloka. ² Khunreera olakela etthu woohitjuwelayja, ni nttawa tjinene naarimeela. ³ Ohiiwananyaa wantthu phunkwanhula ekumyaawe, massi wanrimaniwawe naarussiya naApwiya. ⁴ N'hakhu onaawaana onpwana mwintji; massi massikhini naahin'nha naassinpwanaawe. ⁵ Anaavaha anamoona owootha anaahala ottarussiya, ni yoole nuuluma tjowootha khan'hala. ⁶ Entji anaahala onlepela essontte ntthu on'nema, ni ooteene mipatthani wayoole nvaha tjoovaha. ⁷ Hata assihimaawe massikhini ananthanha, hata assinpwanaawe anaahala on'huluwa! Yena naawiihana, massi ahorwaatja. ⁸ Yoole nkhala nootjuwelatja nfenta ekumyaawe; yoole nssunka otjuwelatja naahala ophwanha yooreera. ⁹ Anonpanka namoona owootha anaahla ottarussiya; yoole nuuluma tjowootha naahala orimeela. ¹⁰ Kawanphwanela wiira nlolo akhale nipuro nooreerela; ventji ventji epottha ehaamirye erunku akhulupale. ¹¹ Makhalelo antthu anankhaliha ohihaleela ovilela, ni waaryawawe ohuluwa maveho. ¹² Orussiya wamwene ori phanka nrunkulu nokharamu, massi n'nemanawe ninkhala phanka okame nimalassi oowitjissu. ¹³ Mwaana anlolo okwanhuwatja waathumwaane, ni nthiyana oovaanhiha nkhala phanka maatji anttonha. ¹⁴ Enupa nimihakhu tjoohalana tjomitjee, massi Apwiya phanaavaha athiyana oophwanela. ¹⁵ Woolwaa onan'hiya ntthu orupa tjinene, massi yoole hintthuna ovara nteko enanvola etala. ¹⁶ Yoole niiwenla tjooruma nssunka ekumyaawe, massi ntthu hinuupuwela munviraawe naahala okhwa. ¹⁷ Naakhaihera amassikhini naatjimiha Apwiya, ni Ayena anaahla onvaha yeele evaralyaawe. ¹⁸ Mun'himeerye mwaamwaninhu nen'nava, n'hinrwaane wookhwani. ¹⁹ Ntthu owaakuva orrussiya haana alivaka nlattwaawe; wamoopolavale, onpanketho tjitjon'mo emaara yonayeeli. ²⁰ Oviriyane ni otthune yoohimeeriya, wowiira okhale otjuwelatja mookuminiwaa. ²¹ Atthu entji tjiri tjitthu tjintthunaaya wanrimaniwaya, massi etthunelo yaApwiya phin'hala okhala. ²² Ntthu npheelessa n'nema, ni massikhini phiri oophwanela woovirikana ntthu owootha. ²³ Owoova Apwiya athu anawaavaha ekumi; yoole n'hala okhalana naahala okhala saawa ni khin'hala onphwanha yowoopiha. ²⁴ Ntthu owoolwaa naweessa ntatanawe munkhukini, massi khankhwitiri ohokolossera mwaano. ²⁵ Onttarussa ntthu ookukuryaa, oohitjuwela etthu naahala okhala nassariya; mun'vaanhihe rina wuupuwela, naahala ophwanha otjuwelatja. ²⁶ Yoole nowin'nhera athumwaane aatthawihaka anumwaane mwaana oopatthihana ehaaya. ²⁷ Wahiyenra wiiwenla tjin'himiya, mwaamwanaka, onaahiya moolumo ootjuwelatja. ²⁸ Namoona oohiloka naahanhuriha essariya, ni malaku aatakhali anuuluma tjoonhala. ²⁹ Otthukeliya atthonkomaniheriye atthu oohanhuriha, nimahuviho aalolo.