¹ Jakobo aba hali mwinkanda umo besi muba bali kuhala, mwinkanda ya Kanana. ² Izi nji zi batendahali kuamana ni Jakobo. Josefa, ya bali mulombwana wina myaka ina 17, abali kulisa mutapi ni ba mukulwe. Abena ni banaswisu ba Bilhah ni banaswisu ba Zilpah, ba mwihyabwe ubesi. Josefa cha wambila besi zintu zibi kuamana nabo. ³ Lyahanu Isilaele abali kusaka ahulu Josefa kuhita bonse ba mukulwe kakuti ibali mwanaswisu wakwe wa mubu kulukwame. Cha mupangila chizwato chilotu. ⁴ Ba mukulwe chi babona kuti ishabo abali ku musaka ahulu kuhita ba mukulwe bonse. Chiba mutoya ni ku sa wamba sinte kwali. ⁵ Josefa aba loti chiloto, imi chi ku wambila ba mukulwe zacho. Ni ba mutoya mane ku hitiliza. ⁶ Chati ku bali, ''Ni kumbila mutekeleze kwe chinu chiloto china lota. ⁷ Mubone, tubali ku sumina milumbu ya buheke muluwa imi mubone, mulumbu wangu chi wa zima ni ku woloka, imi mubone, imi milumbu yenu chiya zimbuluka ni ku sungamina mulumbu wangu. ⁸ Ba mukulwe chibati kwali, kana iwe luli mo tuyendise? Haho iwe kobe u muyendisi wetu? Chiba mutoya ni ku hitiliza cha ziloto imi ni cha ziwambo zakwe. ⁹ Chalota chimwi chiloto ni ku chi wambila ba mukulwe. Chati, ''Mulole, na lota chimwi chiloto: Izuba ni mwezi ni nkani zina ikumi ni yonke chi zani sungamina.'' ¹⁰ Cha chi wambila besi niba mukulwe bulyo, imi besi chi ba mukalimela. Chati kwali, ''Chiloto nzi ichi chi walota? Kana banyoko name ni ba mukulwako mutwize tu sungamine iwe hansi?'' ¹¹ Ba mukulwe chi ba mufwila muna, kono besi chi bika indaba mu muboko. ¹² Ba mukulwe chikuya ku kulisa mutapi we shabo mwa Shechem. ¹³ Isilaele chati kwa Josefa, ''Kana ba mukulwako kaba kwete ku lisikiza mwa Shechem? Wize, ni kutume kubali.'' Josefa chati kwali, ''Ni litukiseze.'' ¹⁴ Chati kwali, ''Yende hahanu, kalole nandi bena hande ba mukulwako imi ni mutapi, imi zo ni wambile.'' Cwale Jakobo cha mutuma kuzwa mwibala lya Hebron, imi Josefa chayenda kwa Shechem. ¹⁵ Mukwame zumwi cha wana Josefa. Bone, Josefa abali ku ka buyembana muluwa. Mukwame cha mubuza, ''Uka busaka nzi?'' ¹⁶ Josefa chati, ''Nika busaka ba mukulwangu. Ni wambile, nikumbila, njokuhi ku bakwete ku lisikiza mutapi.'' ¹⁷ Mukwame chati, ''Bazwa mwechi chibaka, kakuti nabazuwa ni bati, ''Tuyende kwa Dothan.'' Josefa che chilila ba mukulwe ni ku kabawana kwa Dothan ¹⁸ Chi bamubona na sina kule, imi naseni kusika hafuhi nabo, chi batanga ku mufumbela ku mwi haya. ¹⁹ Ba mukulwe chi batanga ku liwambila, Mulole, uzu muloti chasika. ²⁰ Mwize hahanu, lyahanu, zatu mwihaye ni ku musohela kulimwi lya malindi. Mutu kawambe, 'Chibatana cha musanona. 'Mutu lole nandi ziloto zakwe ka ziboneke.'' ²¹ Reuben cha izuwa imi cha muzwisa mu manza abo. Chati, ''Kanji tu mwihayi.'' ²² Reuben chati ku bali, ''Kanji mwitili malaha. Mu musohele mweli ilindi lina mwibala, kono kanji mubiki iyanza hali''- ili kuti za muzwise mwiyanza lyabo ni ku muboza ku besi. ²³ Ku batendahali kuti aho Josefa haka sika ku ba mukulwe, chiba muzula chizwato chakwe chilotu. ²⁴ Chiba muhinda ni ku musohela mwi ilindi. Ilindi li bazumite kana kubena menzi mwateni. ²⁵ Chibe kala ni kulya chinkwa.Chiba nyemuna menso abo ni kulola, imi, mulole, i kalabani ya maIshimaile ibali ku kazwa kwa Gilead, ni makamele abo ba hindite minunkiso ni balm ni marrh. Ba bali kuyenda ku zitwala konji kwa Egepita. ²⁶ Juda chati ku bamwakwe, ''Mutuwane nzi chi twehaya mwanchetu ni kuli wumba malaha akwe? ²⁷ Mwize, imi tumu wuze ku maIshimale imi kanji tubiki mayanza etu hali. Kakuti mwanchetu, inyama yetu.'' Bamwakwe chiba tekeleza kwali. ²⁸ Ma Midianite bawuza chi bahita. Ba mukulwe chiba kwita Josefa mwiwulu imi ni ku munyemuna ku muzwisa mwilindi. Chiba wuza Josefa ku maIshimaele cha mapeka a makumi obele e silivela. Ma Ishimaele chi bahinda Josefa mwa Egepita. ²⁹ Reuben cha bola kwi ilindi, imi, mubone, Josefa kana ba mwina mwilindi. Cha halola zizwato zakwe. ³⁰ Chabola ku bamwakwe imi chati, ''Muswisu ka mwina! Imi ime, njokuhi kuni wola kuya?'' ³¹ Chibehaya impene linu ni kuhinda chizwato cha Josefa ni ku chinika mu malaha. ³² Imi chibaka chileta kwe shabo chi bati, ''Twawana ichi. Tukumbila ubone kapa nji chizwato cha mwanaswisu wako kapa kanji chona.'' ³³ Jakobo cha chiziba imi chati, ''Nji chizwato cha mwanaswisu wangu. Chibatana cha musanona. Josefa ni wana wa pusoka muzi pisipisi. ³⁴ Jakobo chahalula zizwato ni ku lizwatika isaka mu manoka. Cha lila mwanaswisu wakwe mazuba mangi. ³⁵ Bonse banaswisu bakwe ni banakazana chi bazima ku musengasenga, kono chakana ku sengwasengwa. Chati, ''Che niti ka nifwe ni nisilila mwanaswisu wangu. ''Ishabo cha mulila. ³⁶ Ma Midianite chiku muwuza mwa Egepita kwa Potifa, mu wofisa wa Faro, mukulwana wa muganteli.