¹ Ni chi kwa tendahala kuti mwinako ya Juda ni chasiya bamukulwe ni kukekala ni zumwi uzo wa mwa Adaluni, we zina lya Hira. ² Kwateni cha kakopana ni mwana wo mukazana wa Mukanana we zina lya Shua. Cha muhinda ni kukekala naye. ³ Ni cha lihinda ni kuzala mwanaswisu. Cha mubika izina lya Eri. ⁴ Ni cha lihinda hape ni kuzala mwanaswisu. Cha musumpisa izina lya Onani. ⁵ Ni chaba hape ni mwanaswisu cha musumpisa izina lya Shela. Kubali nji kwa Kezibi uko kwa ba kamuzalili. ⁶ Juda cha wanina Eri mwanakazi, mwanakwe we ntanzi. Izina lyakwe abali nji Tama. ⁷ Eri, mwana we ntanzi wa Juda, abali mubi mumenso Ireeza. Ireeza cha mwihaya. ⁸ Jada chati kwa Onani, ''Yende kwa mwihyabwe wa mukulwako. Utende mutendo wo bulamu kwali, imi ulele muhwile wa mukulwako.'' ⁹ Onani abezi kuti muhwile kasabe wakwe. Monse mwabali kuyendela kwa mwihyabwe wa mukulwe, aba kuzalila hansi, mukuti kanzi azalili mukulwe muhwile. ¹⁰ Cha bali kutenda ibali chivi mumenso a Ireeza. Ireeza cha mwihaya naye. ¹¹ Linu, Juda chati kwa Tama, mukwenyanana kwe, ''Kale noli ukafwilwa mwi nzubo ibeso konji kukasika Shela, mwanangu we chiswisu cha kakula.'' Mukuti aba kutite, ''Pona chofwa hape, ubu nji ba mukulwakwe. ''Tama chayenda ni ku kahala mwinzubo ibesi. ¹² Ha kuhita inako inde, mwana Shua we chikazana, mwihyabwe wa Juda, cha fwa. Juda ni cha sengwa sengwa ni kuyenda kuba gunki be mbelele zakwe kwa Timina, iye ni mulikanakwe Hira wa Adulami. ¹³ Tama cha wambilwa, ''Lole, beso bechikwame ba yenda kwa Timina kuka gunka imbelele zabo.'' ¹⁴ Ni chazula zizabalo zakwe zo bukanfwila ni kuliwumba chisila kuliwumbiliza iye mwine. Chekala ha mulyango wa Enainu, chi wanika mwinzila ikaya kwa Tamina. Sina ha ba bwene kuti Shea cha ba kulite kono kana beni kuhewa kwali kuba mwihyabwe. ¹⁵ Linu Juda hamubona aba kuzeza kuti abali muliyendezi mukuti abali bwikite impata yakwe. ¹⁶ Cha yenda kwali kumbali ni nzila ni chati, ''Wize, ni kumbila ni saka ku kopana nawe''- mukuti kana bezi kutiabali mukwenyanakwe we chikazana-imi ni chati, ''Mo nihenzi kuti ukopane na me? ¹⁷ Ni chati, ''Muni kutumine kapenezana kazwa mumulaka. ''Ni chati, ''Nji kuti mo nihe insepiso hesi chi wa itumina? ¹⁸ Ni chati, ''Insepiso inzi yete ni kuhe? Ni chetaba, Iswayo lyako ni muhala.'' Ni cha ziha kwali ni kukopana naye, mi ni cha lihinda ¹⁹ Chabuka ni kuyenda. Cha zwisa isila lya ba libwikilize ni kuzwata zizabalo za bu kanfwilwa. ²⁰ Juda cha tumina impenezana ku mulikani wakwe wa kwa Adulami ili kuti akahinde insepiso kuzwilila mwiyanza lyo mwanakazi, kono kana ba ka muwani. ²¹ Linu Madulami chi ba buza bantu be chibaka icho, ''Ihule libekele kumbali ni nzila ya Enaimi lina kuhi?'' Chi bati, kana kuba bi ni hule mwateni munu.'' ²² Ni chabola kwa Juda ni kuti, kana na kamuwana. Mi, bantu bamwateni bati, ''Kana kubena ihule mwateni.'' ²³ Juda chati, ''Musiye abike zintu, mukuti kanzi tu nyaswa. Initi, ni bakutumini impenezana, mukuti kana uba kamuwani.'' ²⁴ Mumasule a miyezi yo tatwe kuti ni kwezwa ku wambilwa Juda buti, ''Mukwenyanako we chanakazi Tama aba pangi buhule, imi bu sakusima, uli hindite ibumo lyakwe. ''Juda nati, ''Mumulete kunu imi mu musiye aka hiswe.'' ²⁵ Ha bamutwala hanze aho, na tumina inusa ku mukwenyanakwe we chikwame. ''Mukwame yo luwite izi zintu nja bani misi.'' Ni chati, ''Mutondele ni kumbila, kuti nji zani, iswayo ilyo ni muhala ni iyo.'' ²⁶ Juda ni chazi lemuha ni kucho, ''Ushiyeme kuhita ime, mukuti kana ni bamuhi ku mwanangu Shela kuba mwihyabwe.'' Kana ba boleli kulala naye hape. ²⁷ Inako yakwe ya kuzala chi yasika kuti, ubone, mukube ni mambile mwibumo lyakwe. ²⁸ Kuba bi bulyo mwinako ya kuzala, zumwi chazwisa iyanza, muzalisi chahinda bwanda ni kuli lisumina kwi yanza lyakwe ni kucho, ''Uzo nja zalwa lwe tanzi.'' ²⁹ Kono ni cha bozekeza iyanza lyakwe, mi, mubone, mwakwe wa zalwa itanzi. Muzalisi ni chati, ''Inzila iwa wola kuzwa chayo!'' Imi cha wulikwa Perezi. ³⁰ Lyahanu mwakwe cha zalwa, abena bwanda kwiyanza lyakwe, mi iye cha wulikwa Zera.