¹ Mukafumu ghumwe kava twenya nga ashi Ananiyasi, namukamali wendi Safira, kwaghulitire ruha rwalivu, ² ntani a horeke ko ruha rwamaliva ogho vakawanine mo (mukamali wendi naye a vi yivire), makura a yita ruha rumweya a ru yara kumpadi davapostoli. ³ Ngoli Petrus a Ghamba, ''Ananiasi, morwa nke ana ywidiri Satana mutjima ghoye ghukonge Mpepo Mupongoki ntani ghuhoreke ko ruha rwandando yalivu? ⁴ Lyalyo panya kapi ghuna lighulita shimpe, kapi lya kalire lyanaghumoye? Makura weni-weni ghukaghayara vininke vyaweno mumutjima ghoye? Kapi ghuna kongo vantu, ngoli Karunga. ⁵ Pakuyuva nkango dino, Ananiyasi gha were palivu nakushetera rwakuhulilira, ntani woma waghunene ghaghuwana navantje ava vaviyuviro. ⁶ Mukafumughona mpo gha yire kumeho ghamu dingiri pashikeshe, nakumushimba mo va ka mu vumbika. ⁷ kuruku yahambara viri ntantu, mukamali wendi gha ya ngene, ghuye nkara dendi kovyo vinashoroko. ⁸ Petrus a ghamba kwendi, ''Ntantere nange kunaghulita livu vyavingi. ''Ghaghamba, ''Nhii, vyavingi,'' ⁹ Makura Petrus a ghamba kukwendi, ''Weni omu muna kuyuvu kumwe mukusheteka Mpepo yaHompa? Kenga, mpadi davakafumu ovo vanakahoreko mukafumu ghoye mpodili palivero, ntani mbo vakushimbomo.'' ¹⁰ Mpopo gha kugandere kumpadi dendi nakushetera rwakuhulilira. Opo vayire mo vakafumughona, ghva ya muwana ghuye ghana dohoroka, nakumutwara pandje vakamuvumbike kwara vyendi. ¹¹ Woma waghunene aghuwana ngereka mudima nanavantje vayuviro vininke vino. ¹² Vineghedito navitetu kwashorokire muvantu kupitira mumawoko ghavapostoli. Navantje kumwe vakalire mumbaraka yaSaromo. ¹³ Ano ngoli kwato wavo a kaliro nankondo dakukupakerera navo; nampindi ngoli, vavo kwava tulire mulifumadeko lyalinene lyavantu. ¹⁴ Shimpe nka vapuli vavangi kwa kuwedilire kwaHompa, mbunga yavakafumu navakamali, ¹⁵ mpo ngoli vashimbire vaveli va tware mundjira vavo kuna va rangeke pamaghuro napacegca, mpo ngoli ashi moomu a yire ko Petrus, wawo mundunduma wendi walye kuvhura ghuwere pavamwe vavo. ¹⁶ Kwa ka pongire ko nka mbunga yavantu vakutunda kumbongi dakundurukido Jerusalema, kava yita nga vaveli navanya vakaliro nampepo danyata, ntani navantje vava verulire. ¹⁷ Ngoli mupristeli wamukurona gha shapuka, ntani navanya navantje vakaliro naye (mbunga yavaSadusi); ntani vavo kwa kalire vana yura mfudu ¹⁸ nakukambeka mawoko pavapostoli, nakuva tura munda mudorongo yimwe. ¹⁹ Ano ngoli kumatiku muEngeli waHompa a gharura mavero ghakudorongo nakuvarupwita mo, nakughamba, ²⁰ ''Kayendenu, mukayimane muntembeli mukaghambe kuvavantu nkango nadintje daliparu.'' ²¹ Apa va yuvire vino, ava ngene muntembeli ngura-ngura yayinene nakushonga. Ene ngoli mupristeli wamunene a ya, ntani nava va kalire naye, nakuyita matimbi kumwe, vakurona navantje vavaka Israeli, nakuvatuma kudorongo mukukayita vapolstoili. ²² Ngoli vaporosi ovo vayendiro kapi vaka va wanine mo mudorongo, mpo va ka vyukire vayatante, ²³ ''Tuna ka wana dorongo yakupata nawa-nawa ntani vakungi vana yimana palivero, ene ngoli opo tuna li paturura, kundereko oghu tuna kawana mo munda.'' ²⁴ Mukurona wantembeli navapristeli vavanene opo va yuvire nkango dino, ava kara naghutjirwe waghunene kukwavo kuhamena ovi vikwamoko. ²⁵ Makura mpwali ogho a yiro aya va tantere, ''Vakafumu kamu tura mudorongo vana yimana muntembeli kuna ku shonga vantu.'' ²⁶ Mukurona mpo gha yendire namuporosi, naku ka va vyuta, ano ngoli pwa hana ndjorongani, morwa vava kwatjilire ashi kuvura vavatoone namawe. ²⁷ Apa vaka va yitire, avava shungiki kumeho yamatimbi. Mupristeli wamunene ava puraghere mwamunene, ²⁸ a ghamba, ''Katumu futita unene atwe ndi nakushonga shi mulidina lino, ngoli anwe muna yuda Jerusalema nalishongo lyenu nashihoro shakuyita honde yomukafumu ghuno papwetu.'' ²⁹ Ano ngoli Petrus navapostoli ghava limburura, ''twa kona kulimburukwa Karunga mulivango lyavantu. ³⁰ Karunga wavashetu a vumbwiro Jesus, oghu mwa dipayire muku mu tulika kushitondo. ³¹ Karunga gha mu yerwire kuliwoko lyendi lyarulyo a kare mona Hompa ntani muyowoli, aya tape likushighuro kuvaIsraeli, nalighupiro po lya ndjo. ³² Atwe vangambi vavininke vino, Mpepo Mupongoki naye ngoli, oghu a tapire Karunga kovo va mu limburukango,'' ³³ Vahamenimo mumbunga yamatimbi opo vaviyuvire vino, vavo kwagarapire unene ntani kwashanine kudipagha vapostoli. ³⁴ Ngoli muFarisayi walidina Gamaliyel, mushongi waveta oghu vafumadeka vantu navantje, a yimana nakurawira vapostoli vava rupwite pandje kadidi. ³⁵ Makura a ghamba kwavo, ''Vakafumu vaIsreli, kengururenu po nawa kovi muna kushana kurughana nava vantu. ³⁶ Ruvede rumwe rwakapito, Teudas kwashapukire mukukutwenya muntu, shivaro shavakafumu, vakutika kumafere mane, ava kupakerere naye. Kwa mu dipagha, ntani navantjeya vanya kava mu limburuka ngo kwa kuhana ava pili po. ³⁷ Kuruku yamukafumu ghuno, Juda wakuGalireya a shapuka mumayuva gha livarurovantu nakushimba vantu vamwe vamukwame. Naye kwa ya kombanine, ntani navantje kava mu limburukango kwa kuhana. ³⁸ Kuna kumu tantera ngoli, kupore nu ko kuvakafumu vano naku va shuva pantjavo, ntjene ashi lino lighano ndi virughana vyavakafumu, ngavi shaya po. ³⁹ Ano ngoli ntjene vyaKarunga, kapi mu vura kuvi shayikita po; kuvura nga mu vi mone nka ashi anwe kuna kurwanita Karunga.'' Ava ya kara vana vi pura. ⁴⁰ Makura ava yita vapostoli munda nakuvatoona nakuvapangera ashi vashaghamba mulidina lyaJesus, nakuva shuva vakayende. ⁴¹ Ava shuvu matimbi ghana hafa ashi va va kengire mulyo mukuhepera konda yakupira kufumadeka Lidina. ⁴² Kutunda po kehe liyuva, muntembeli ntani tunda mundi yenda mundi, vavo kwa kwashongire kutwikida nakughamba mbudi yayiwa ashi Jesus ndje Kristus.