¹ Mpopo vaPetrus naJohanes va ghambitire vantu, vapristeli ntani mukurona wantembeli navaSadusi ava ya pwavo. ² Vavo kwa kalire mughudito mukonda ashi Petrus naJohanes vavo kwashongire vantu nakuyawira mwaJesus livumbuko kughufe. ³ Gha va va kwata nakuvatura mudorongo dogoro ngura ngura yakwamino ko, kwa kalire ashi lyalyo ngurova kare. ⁴ Ngoli vantu vavangi ava va yuvire mbudi va pulire; ntani shivaro shavantu ovo va puliro hambara kutika kumayovi matano. ⁵ Avi ya kara muliyuva lya kukwamako aashi vapangeli vavo, vakurona navatjangi matjangwa ava pongo pamwe muJerusalema. ⁶ Anasi mupristeli wamukurona mpo a kalire, naSayiyafasi, naJohanes, ntani Aleksanderi, ntani ovo va tundakaninonmupristeli wamukurona. ⁷ Apa va tulire Petrus ntani Johanes mukatji kavo, ava va pura, ''Nankondo munke, ndi mulidina munke, muna rughana vino?'' ⁸ Makura Petrus ghuye ana yura Mpepo Mupongoki, gha ghamba kwavo, ''Anwe vapangeli vantu, navakurona, ⁹ nange ashi kuna ku tu kona kona namuntji kuhamena shirughana shashiwa shina shorokero mukafumu wamuveli, nanke ngoli ghana veruka mukafumu ghuno, ¹⁰ Vikare vina yuvika kwenu namuvantje nava Israyel navantje ashi mukafumu ghuno ana yimano kumeho yenu naghukanguki mulidina lyaJesus Kristus wakuNazaret, oghu mwa pampalire, ngoli ndjeghu a vumbwire Karunga kuufe. ¹¹ Jesus ndje liwe olyo mwancenwine ngoli ndyo vana tura mutwe waliwelyamukakovhu. ¹² Mwato liyowoko mwa kehe ghuno muntu, morwa kwato nka lidina kuntji yaliwiru oli va pa vantu ashi tuvure kuyowokera mo." ¹⁵ Ngoli kuruku ya kupangera vaApostoli va tunde po pashigongi shandango, vavo ava ghamba mwavene na vavene. ¹⁶ A va ghamba, ''Vinke tu va rughana vano vakafumu? Mbyevi shitetu eshi vana rughana kupitira mwavo shina yuvika kwa kehe ghuno gha tungo muJerusalema; kapi tu vura kuvi hapa. ¹⁷ Mukurenka ashi vi pire kukuhanena ghunene nka muvantu, tuva rondorenu vapire kughamba nka kwakehehe ghuno mulidina lino. ¹⁸ ''Makura ava va yita nakuvarondora vapire kughamba ndi kushonga mpindi kadidi mulidina lyaJesus. ¹⁹ Ngoli Petrus naJohanes ghava ghamba nakuvalimburura, ''Nange vina kara mumantjo ghaKarunga tu kuvulike mulivango lyendi, ove pangura. ²⁰ Kapi tu vhura kushayeka kughamba kuhamena vininke evi twa mona nakuyuva.'' ²¹ Kuruku ya lirondoro Petrus naJohanes, a va vashuvu va ka yende. Kapi va vulire kuwana konda yakuvatengeka, mukonda ashi vantu navantje kwaTangire Karunga kovi a rughanine. ²² Mukafumu oghu a monine shitetu shino shaliveruko mwaka dendi kwa pitakanine dimurongo ne. ²³ Kuruku rwakuvamangurura, Petrus naJohanes ghava ya kuvantu vavo nakuya tanta navintje evi vavatantilire vapristeli vanene navakurona. ²⁴ Opo vaviyuvire, ava yerura maywi ghavo nashitambo shimwe kwaKarunga nakughamba, ''Hompa, ove washitiro liwiru nalivu nalifuta, nanavintje vyakaro mwavyo. ²⁵ Waghambire naMpepo Mupongoki kupitira mukanwa kamukareli woye, shetu Dafita, 'Morwa vinke vagarapilire vadimuhoko davaPagani, navantu kughayara vininke vyahana mulyo?' ²⁶ Waghamba, 'vahompa vapalivu ghava kupongayiki pamwe,, ntani vapangeli ghava pongo kumwe mukukananita Hompa, ntani mukukananita Kristus wendi.' ²⁷ Ghushiri, navantje Herodes naPontiyusi Piratu, kumwe navaPagani navantu vaIsrayeli, ghava pongo pamwe mushitata mukukanananita mukareli wakupongoka Jesus, oghu wawavikire. ²⁸ Vapongire kumwe mukurughana navintje ovyo liwoko nalighano lyoye watokolire kumeho likashoroke. ²⁹ Weno, Hompa,kenga kumarondoro ghavo nakutapa kuvakareli voye vaghambe nkango yoye va hana utjirwe. ³⁰ Ghonona liwoko lyoye ghu verure nakutapa vineghedito navitetu kupitira mulidina lyamukereli ghoye wakupongoka Jesus. ³¹ ''Kuruku, yakuraperera, mulivango omo vapongire kumwe ghalikankama, ntani navantje kwa kalire vana yura Mpepo Mupongoki ntani ghava ghamba nkango yaKarunga va hana utjirwe. ³² shivaro shashinene shovo vapuliro kwakalire sha va vamutjima namonyo ghumwe. Kundere ko ogho a ghambiro ashi kehe vino gha kalire navyo vyanaghumwendi, ngoli va kalire navimwe vyakukufana. ³³ Nankondo dadinene vapostoli kwa ghambire ghumbangi wavo kuhamena livumbuko lyaHompa Jesus, ntani ghufenkenda waghunene kwa kalire pwanavantje. ³⁴ Naghumwe shi a kaliro mukatji kavo a dilire vintu. Kwanavantje vakaliro nalivu ndi ndjugho vavighulitire ntani ghavaka yita maliva ghaka tundiro kuvininke ovyo vakaghulitire ³⁵ nakuvi yara kumpadi davapostoli, ntani vavi tapilire kwakeheghuno kutwara kuvihepwa vyavo. ³⁶ Josefa, oghu kava yita nga vapostoli ashi Baranabasi (kutanta ashi Mona Likorangedo), muLevi, Mukafumu wakuSayipurusi, gha ³⁷ ghulita lifuva gholi a wekire nakuyita maliva a gha yare kumpadi davapostoli.