¹ Vantu vaIsrali ava twikiri ruyendo nange ava katulira kamba yavo muliyana lya Mowabu pepi na Jeriko, musheli munya ya Jodani mukuro watundo ku shitata. ² Baraka mona Ziporo a mono navintje evi vana kuruwana va Israeli ku vaAmoli. ³ Mowabu a kara na ghoma kuvantu mukonda vakalire vangi, ntani Mowabu akara na ghoma wa unene ku vaIsraeli. ⁴ Hompa wa Mowabu a ghamba ku mbunga karelipo ya mu midiyami, ''Oyino mbunga kuyilya navintje vina karo kukwetu yira momo ntwedu ya lyanga mushoni mulifuva.'' Weno Baraka mona Ziporo ghuye hompa wa Mowabu pa ruvede ro. ⁵ Atumu ntjangwatumwa kwa Baramu mona Bowa, ''Kenga, shirongo shina kutundo kuEgipute. Vana ywida shipara sha udjuni ntani weno pano vana kara pepi name. ⁶ Nakanderere yiya weno nakuyavilitako shirongo pa pande, mukonda vavo vakara nkondo kupitakana kukwande. Pamwe kuvhura niva funde ntani tuva shinge vatunde mushirongo. Nayiva ashi ovo una shwere kuna mushwere, ntani ovo una vingi kuna va vingiliri.'' ⁷ Makura mbunga karelipo ya Mowabu ntani na mbunga karelipo ya midiyani ava vyuka, nakupitira mfuto yalifingo. Ava kwa Baramu na kughamba nkango da Baaraka. ⁸ Baramu a ghamba kukwavo, ''Karenu mpapa matiku gha namuntji. Kunimuyitira ovyo Karunga a ghamba kukwande. Makura mbunga karelipo ya Mowabu ava kara na Baramu matiku ghanya. ⁹ Karunga aya kwa Baramu a ghamba, ''Vare vanya varume vana yo kukoye?'' ¹⁰ Baramu alimburura Karunga, ''Baraka mona Ziporo, hompa wa Mowabu, ana va tumo kukwande. A ghamba, ¹¹ 'Kenga vantu vana tundiliro ku Egipute kuna kuya ywida ntunda ya livhu lya mushirongo shande. Weno yiya ghuya mvhingiliteko. Pamwe kuni vhura kurwana navo na kuvhura kuvashinga vatunde mushirongo shande.''' ¹² Karunga a limburura kwa Baramu, ''Washa vishetekera kuyenda novo vakafumu. Washa vishetekera ghu fingilire vantu va Israeli mukondashi vapwa kuvatungika.'' ¹³ Baramu a rambuka ngurangura na kughamba kumbunga karelipo ya Baraka, ''Vyukenu kushirongo shenu mukonda Karunga ana shwena kumpulitira niyende nanwe.'' ¹⁴ Ano mbunga karelipo ya Mowabu ayi vyuka kwa Baraka. Na kughamba, ''Baramu ana shwena kuya natwe.'' ¹⁵ Baraka atumu ko mbunga karelipo oyo yapitakanino shivaro sha vakuhova. ¹⁶ Ava ya kwaBaramu na kumutantera, ''Baraka mona Ziporo ana ghamba vino, ''Nakanderere washa pulitira kehe vino mu kukushayikita ghuye kukwande, ¹⁷ mukondashi ame kuni kupa mfuto yoye nalikuto lya linene, ntani kuni kuruwanena kehe vino una shana nikuruwanene. Nakanderere yiya uya mfingilire vantu vano mulidina lyande. ¹⁸ Baramu a limburura na kughamba ku mbunga kareli ya Baraka, ''Nampili Baraka ampa mbara yendi oyo yina yuro shiliveli na ngorodo, ame kapi nivhura kupitakana nkango ya Hompa Karunga wande, nampindi mukaninke ka kadidi ndipo ka kanene ovyo ana ntantere. ¹⁹ Nakanderere rarenu matiku gha namuntji makura nikoneke tanko ntjene ashi Hompa ana kara na mbudi peke ya kuntanterame.'' ²⁰ Hompa aya ngaghanya matiku a mutantere, ''Ava vantu ntjene kunaya vaya kupure ghu yende navo. Ngoli karuwane ovyo nikutantera ghu karuwane. ²¹ Baramu a rambunga ngurangura akutiri shidongi shendi a yende na mbunga karelipo yamu Mowabu. ²² Ngoli mukonda ayendire, ugara wa Karunga aghu kuwederere a garapire ngudu. Mu engeli wa Karunga a muyimanene mundjira ava kondere va Baramu, ogho arondiro shidongi shendi. Baramu na vakareli vendi. ²³ Shidongi ashimono mu engeli wa Karunga ana yimana mundjira narufuro rwendi mulighoko. Shidongi ashiyapuka mundjira shipitire mu mafuva. Baramu a toghona shidongi shivyuke mu ndjira. ²⁴ Makura mu engeli wa Hompa ayimana paruha rwa rudidi pakatji kavikunino vya mandjembere, Ano likuma kurulyo na kurumontjo. ²⁵ Shidongi apa sha monine mu engeli wa Karunga. Ashiyendi kulikuma shiteminikide Baramu makura Baramu ashitoghona. ²⁶ Mu engeli wa Karunga ashwene shimpe kumeho a kayina paruha rwa rudidi pa ndjira nakumweshi kwa kupitirukira mu maruha naghantje. ²⁷ Shidongi opo sha mona mu engeli wa Karunga a shibwakama. Baramu agarapa unene ngudu, makura ashitoghona na mpango. ²⁸ Makura Karunga apatura kanwa kashidongi shighambe kwa Baramu, ''Nke nakuruwana vya kuntoghonena vikando vitatu? ²⁹ ''Baramu a limburura, ''Mukondashi una moneke ugova kukwande. Ndi kani kara narufuro mulighoko ndi nakudipagha.'' ³⁰ Shidongi a shighamba kwa Baramu, ''Nani ame kapishi shidongi shoye warondanga kehe pano nange namuntji ndi? Navikuruwana rumwe vya weyo ndi?'' Baramu a limburura, ''Hawe.'' ³¹ Makura Hompa Karunga a mahura mantjo gha Baramu, a mono mu Engeli wa Karunga ana yimana mundjira kuna kwaterere rufuro mulighoko. Baramu a nyongeke shipara shendi a kengere mulivhu. ³² Mu engeli waKarunga a ghamba, ''Mukonda munke una pumini shidongi shoye rukando rutatu? Kenga ame kunaya nikukondere ndjira yoye kapi yina wapa. ³³ Shidongi shina nkenge mbyo shina yapuka rukando rutatu. Ndi kapishi mo shina ruwana ame ndi nakudipagha shasho shiparuke.'' ³⁴ Baramu a ghamba kwa mu engeli, ''Ame nadjoni. Kapi nina yiva ashi ghuna yimana kumeho mundjira. Kutunda pano kentje una vimono ashi ku koye, ame nakuyuvhu.'' ³⁵ Ngoli mu engeli wa Karunga a ghamba kwa Baramu, ''Kayende tupu na mbunga yoye. Ngoli una hepa kuruwana mbyevi nakukutantera.'' Makura Barmu ayendi na mbunga karelipo ya Baraka. ³⁶ Baraka apa yuvhire ashi Baramu ana ya, a yendi vakagwanekere mu nkurumbara ya Mowabu mu Anoni ya karo pa murudi wa Mowabu. ³⁷ Baraka a ghamba kwa Baramu, ''Apa nakutumine vantumi vinke wadilire kuya kwande? Ame na kuvhurashi kufuta evi vina gwano po ndi?'' ³⁸ Baramu a limburura Baraka, ''Kenga, ashi ame naya koye. Nakara na nkondo da kughamba kehe vino ndi? Ame kughamba nkango ndedi ana ntura Hompa mu kanwa.'' ³⁹ Baramu a yendi na Baraka, ava katika ku Kiriath Husoro. ⁴⁰ Ano Baraka a djamba hove, na ndjwi kumwe nakupa nyama yimwe kwa Baramu na mbunga a kalire nayo. ⁴¹ Kungurangura, Baraka a pitura Baramu kuwiru kulivango lya Bermoti- Bara. Kutunda opo Baraka a wape kumona ruha naruntje rwa vaIsraeli mu kamba yavo.