¹ Baramu aghamba kwa Karaka, ''Ntungire vidjambero ntambiri pano ntani wapayika ntwedu ntambiri na vikungwe vya vindjwi ntambiri.'' ² Ano Baraka a ruwana shika momo Baramu avi shungingidire. Makura Baraka na Baramu ava djamba ntwedu na vikungwe pa kehe shidjambero. ³ Makura Baramu a ghamba Baraka, ''Yimana pashidjambero shoye sha kushwakereraano ame kuni yenda. Walye kuvhura Karunga aye a gwanekere name. Kehe vino a negheda kuniya kutantera.'' Ghuye a kauyenda kulivango lya tuntuko kwa piro vitondo. ⁴ Makura Karunga a gwanekere na Baramu, ano Baramu a ghamba kukwendi, ''Ame natungu vidjambero ntambiri, mpo nadjambere me ntwedu na shikungwe pa kehe shidjambero.'' ⁵ Karunga a tura mbudi mu kanwe kaBaramu na kughamba, ''Vyuka kwa Baraka ghu kamutantere.'' ⁶ Ano Baramu a vyuka kwa Baraka, ogho a yimanino pashidjambero shendi sha kushwakerera, kumwe na vampititi navantje va Mowabu ovo vakaliro naye. ⁷ Ano Baramu a tameke mukughamba ghuporofete wendi nakutanta, ''Baraka kuna ndjita me kutunda kuAramu, hompa wa Mowabu kutundilira kumandundu gha kuupumeyuva. 'Yiya, mfingilire Jakopo,' mo ana tanta. 'Yiya, ghu yadivyuke Israeli.' ⁸ Weni omo nifingilira vantu ovo Karunga a pira kufinga? Weni omo nivhura kudivyuka vantu ovo Karunga kapi adivavyuka? ⁹ Kutundilira kundjumungu ya mawe ame kuna kumumona, kutundilira kumadamenena ame kuna kukenga kakwedi. Kenga, kuna kara vantu vakaro pantjavo ntani kapi vakupaka vene yira rudi rwa kutungikwa. ¹⁰ Are wakuvhura kuvharura mbunga ya Jakopo ndipo shivaro nampiri ndi shighune sha Israeli? Nife mfa da muntu wa muhungami, ntani ghuhura wa liparu lyande ghukare yira wendi!'' ¹¹ Baraka atantere Baramu, ''Vinke evi una nduwanena ove? Ame kwakuyita uya mfingire vana nkore vande, ngoli kenga, ove mbyo una vatungiki.'' ¹² Baramu a limburura na kughamba, ''Ame nani nakughambashi evi ana tura Karunga mukanwa kande ndi?'' ¹³ Baraka mpo a ghambire kukwendi, ''Nakanderere yiya kumwe name kulivango limwe peke oko ove uka vhura kuvamona. Ove kughukamona tupu vamwe vavo va papepi, kapishi navantje. Kunya nko uka va mfingilira ame.'' ¹⁴ Mpo atwalire Baramu mu mushandjara kundjumbungu ya ndundu ya Pisiga, na kukatungirako waro vidjambero ntambiri. Ghuye aka djamberako ntwedu nashikungwe pa kehe shidjambero. ¹⁵ Makura Baramu a ghamba kwa Baraka, ''Yimana mpapa pa shidjambero shoye sha kushwakerera, shirugho nakugwanekera na Karunga okunya.'' ¹⁷ Karunga a gwanekere na Baramu nakumutura mbudi mukanwa kendi. Ghuye a ghamba, ''Vyuka kwa Baraka nakukamupa mbudi yande.'' ¹⁶ Baramu a vyuka kukwendi, a mumono, ghuye ana yimana kushidjambero shendi sha mashwakerero, na vampititi va Mowabu ovo vakaliro kumwe naye. Makura Baraka a ghamba kukwendi, ''Vinke ana katanta Karunga?'' ¹⁸ Baramu atameke na ghuporofete wendi. A ghamba, ''Shapuka, Baraka, ntani yuvha. Tegherera kukwande, ove mona Siporo. ¹⁹ Karunga kapishi muntu, wakuvhura kukonga, ndipo muntu, ashi a vhure kutjindja lighano lyendi. Ashi osho atwenyidira adire kushitikitamo? Kovyo a tanta ghuye kuruwanako shintu pahana likunduruko lyavyo? ²⁰ Kenga, ame kandawiri nitungike. Karunga ana tapa litungiko, ntani ame nakuvivyutashi kuruku. ²¹ Ghuye kapi ana mono mo shipo mwa Jakopo, ntani kapi ana mono mo shiponga muvaIsraeli. Hompa Karunga wavo kumwe navo ana kara, ntani lifuno kwa Hompa mumwavo lina kara. ²² Karunga kwavayita kutunda kuEgipute na unankondo shika nyashi. ²³ Kapi kwa kara viruwana kehe vino vya kudivyuka Jakopo, ntani kwato katemba kakughamba masha muIsraeli. Mulivango, lya kughamba kuhamena Jakopo na Israeli, 'Kenga evi ana ruwana Karunga!' ²⁴ Kenga, vantu kuna kushapuka yira vanyime, shika momo nyime akuwapayikanga na kuhomona. Ghuye kapi a rara nange nkoko kulya lirambo lyendi na kunwa honde yosho ana dipagha.'' ²⁵ Makura Baraka a tantere Baramu, ''Nakuvhurashi kuvafingilira nakutungika nakuvatungikashi.'' ²⁶ Ngoli Baramu a limburura nakughamba kwa Baraka, ''Nani kapi nakutantere ashi ame nakona kughamba navintje ovyo Karunga ana kuntantera ashi mbyo nighamba?'' ²⁷ Ano Baraka a tantere Baramu, ''Yiya weno, ame kuni kutwara kulivango peke, walye kuvihafita Karunga makura ove ghukavamfingilire.'' ²⁸ Mpo Baraka atwalire Baramu kundungu ya ndundu ya Peyoro, oyo yakengero munyongi mumburundu. ²⁹ Baramu a ghamba kwa Baraka, ''Ntungire vidjambero ntambiri pano ntani wapayika ntwedu ntambiri na vikungwe ntambiri.'' ³⁰ Makura Baraka a ruwana shika momo Baramu avitantire, ghuye adjambireko ntwedu yimwe na shikungwe shimwe pa kehe shidjambero.