¹ Opo Hompa waKanani warudi rumwe rwa vaAradi, ogho atungiro muNegevi, ayuvhire ashi vaIsraeli vayendilire yashitaghura kuAtharimu, arwanita vaIsraeli nakukwatako vamwe. ² VaIsraeli ava ghana kwaKarunga nakughamba ashi, ''Nange ghutupa twe lifundo kuvantu vano, ano atwe ngatu vidjonaurapo vitata vyavo.'' ³ Karunga ategherere kuliywi lyavaIsraeli nakuvapa lifundo kuvaKanani. Ava va mana kuvadjonaura na vitata vyavo. Olyo livango kavalitwenyanga Horama. ⁴ Ava yendi vatundu kuHoro yashitaghura kulifuta lyambu vakunduruke shirongo shaEdomu. Vantu ava dompo dimutjia mundjira yavo. ⁵ Vantu ava ghamba vavyuke Karunga naMosesa: ''Vinke ghuna tuyitiri tu tunde muEgipute tuyafere mumburundu? Kwadiro mboroto, kwadiro mema, ntani tuna dinyengaghuka dino ndya.'' ⁶ Makura Karunga atumu mayoka gha ushungu mukatji kavantu. Mayoka agha shumu vantu, vantu vayingi vafiro. ⁷ Vantu avaya kwaMosesa nakughamba, ''Tuna djono mukonda katughamba tuvyuke Karunga ntani ve. Raperera kwaKarunga aghupeko mayoka atunde ko kwetu.'' Makura Mosesa araperere po vantu. ⁸ Karunga aghamba kwa Mosesa, ''Tenda liyoka ntani ghuliture kungundi. Kuvishoroka ashi kehe uno lishuma kwaparuka, nange akenga ko.'' ⁹ Makura Mosesa atende liyoka liyoka lya ngoporo nakulitura kushitondo. Opo liyoka lishuma kehe muntu, nange akenga kuliyoka lya ngoporo, kwa paruka. ¹⁰ Makura vantu vaIsraeli ava twikiri kuyenda kumwe na kukadika kamba pa Obath. ¹¹ Ava yendi vatunde kuObathi ntani ava kadika kamba paIye Abiramu mumburundu oyo yatambo Mowabu kuviha vya upumeyuva. ¹² Kutunda opo ava twikiri kuyenda ntani ava kadika kamba mu muramba waZeredi. ¹³ Kutunda opo ava twikiri ntani ava kadika kamba kuviha vya mukuro waArunoni, ogho wakaro mu mburundu ogho watwikiro utunde kumurudi waAmori. Mukuro waArunoni watendo murudi waMowabu, pakatji kaMowabu ntani naAmori. ¹⁴ Ashi mbyo vya tanta mumbapira yavakavita vaKarunga, ''...Wahebu mu Sufa, ntani mu muramba wa Arunoni, ¹⁵ vidamenena vya mumuramba vyapititiro kuviha vya doropa ya Ara ntani wademenena kutwara murudi wa Mowaba.'' ¹⁶ Kutunda opo ava yendi kuBeri, Kulitope oko Karunga kaghambanga na Mosesa, ''Pongayika vantu kumwe kukwande mukuvapako mema.'' ¹⁷ Makura vaIsraeli ava yimbi rushumo runo: ''Moneka na kukarerera litope, yimbenu kuhamena kwalyo, ¹⁸ kuhamena kulitope olyo vatimine vampititi vetu, litope olyo vatima va hompa ghona, na mpango davo da shinauhompa.'' Makura kutunda mumburundu ava yendi kuMatana. ¹⁹ Kutunda kuMatana ava yendi kuNahaliyeli, kutunda kuNahaliyeli ava yendi kuBamoti, ²⁰ ntani kutunda kuBamoti kumuramba mu shirongo sha Mowabu. Opo mpo ngoli ndunda yaPisiga yaKenga kuntji ya mburundu. ²¹ Makura vaIsraeli ava tumu vana mbudi kwa Sihoni hompa wavaAmori yina kutanto, ²² ''Tupulitire turundakane mushirongo shoye. Kapi tuya pirukira mu kehe lifuva ndipo shikunino sha mandjembere. Kapi tunwa mema gha mulitope lyoye. Kupita ndjira yaHompa dogoro tuka rundakane murudi woye.'' ²³ Ngoli hompa Sihoni kapi apulitilire vaIsraeli vapite mo mu murudi wavo. Makura Sihoni apongayiki vakavita vendi navantje kumwe ntani nakurwita vaIsraeli mu mburundu. Aya kwa Johasi, oko aka rwanitire va Israeli. ²⁴ VaIsraeli ava homokere vakavita va Sihoni na marufuro ntani ava ghupu shirongo shavo kutunda kuArunoni vaye kumukuro wa Jaboko, na shirongo sha vantu va Amoni kwa ghuvukitire. ²⁵ VaIsraeli ava ghupu doropa nayintje ya Amoli ntani nakutunda napantje, rambangako Hesiboni ntani nadimukunda nadintje. ²⁶ Heshiboni kwakalire nkurumbara yaSihoni va Amoli, ogho a rwanitiro hompa waMowabu wakare. Sihoni a ghupu shirongo shendi nashintje kutunda shirongo shendi dogoro kumukuro waArunoni. ²⁷ Ovyo mbyo va ghamba muvishewe ashi, ''Yiya ku Heshiboni. Renka nkurumbara yaSihoni vayidikurure ntani nakuyitamununa waro. ²⁸ Mundiro aghu twerere kuHashiboni, ghupyu wa kunkurumbara ya Sihoni ogho wa djonawiro Ari ya Mowabu, ntani va venya livango lya kuwiru lya Arunoni. ²⁹ Ruhepo kwenu, va Mowabu! Muna djonauka po, vantu vaKemosi. Arenkitire vana vendi va vakafumu vatjayuke ntani va vakamali vakare vankwati va hompa waSihoni waAmoli. ³⁰ Makura tuna fundu Sihoni. Heshiboni yina hanauka nayintje napantje dogoro kuDiboni. Tuna va fundu navantje dogoro kuNofa, ovyo vyakatikiro ku Medeba.'' ³¹ VaIsraeli ava twikiri kutunga mushirongo sha Amoli. ³² Ano Mosesa atumu vakafumu vakenge kwa Jaseli. Ava ghupu mukunda wapo ntani nakutjida mo va Amoli ovo vakaliro mo. ³³ Makura ava piruka nakuyenda shitaghura sha Basani. Hompa wa vaBashani ava rupuki mukuvavyuka, ghuye ntani na vakavita vendi mu kurwanita kuEdereyi. ³⁴ Makura Karunga aghamba kwa Mosesa, ''Washa mutjira ogho, mukonda namupa lifundo kukwendi, vakavita vendi, ntani na shirongo shendi. Ruwanenu yira momo mwaruwanine kwa hompa sihoni waAmoli, ogho atungiro mu Hesiboni.'' ³⁵ Ano ava mudipagha, vana vendi va vakafumu, ntani vakavita vendi navantje, dogoro kwato umwe wa vantu vendi vashuvire wamuyumi. Makura ava mughupu shirongo shendi.