¹ Vantu vaIsraeli, nkarapamwe nayintje, ava yendi mumburundu yaSini mumwedi wakuhova, ava kakara muKadeshi. Oko Miriyamu adohoroka na kumuvhumbika. ² Kapi ghakalire mema gha vantu navantje, makura ava divyuka Mosesa naArona. ³ Vantu ava shivanene Mosesa. Ava ghamba ashi, ''Hasha tupu natwe ndi twa fire po vafire vaIsraeli vaunyetu kumeho yaKarunga! ⁴ Vinke ghuna yitire mbunga yaKarunga muno mumburundu vayaferemo, natwe navimuna vyetu? ⁵ Vinke kaghuturenkere tutunde muEgipute ghutuyite kuno kulivango lyalidona? Kwato mbuto, ghukuyu, mandjembere ntani nka mwato mema gha kunwa.'' ⁶ VaMosesa naArona ava tundu kumeho yambunga. Ava yendi kulikeverero lyatende yavigongi makura ava kunyongamene. Mpopo Karunga ava mahura. ⁷ Karunga aghamba kwaMosesa ashi, ⁸ ''Ghupampango ghupongore vantu navantje, nove naArona mukuroye. Ghambera liwe kumeho yavo, makura ghulipongore lipite mema. Kughuvapira mema momo muliwe, makura ugha tape kumbunga nakuvimuna vyavo vanwe.'' ⁹ Mosesa aghupu mpango kumeho yaKarunga, yira momo amurawilire Karunga omo akaviruwana. ¹⁰ Makura Mosesa naArona ava pongeke mbunga kumeho yaliwe. Mosesa aghamba, ''Teghererenu, anwe vakandjorongani. Tumughupire mema muno muliwe ndi?'' ¹¹ Makura Mosesa aghorora lighoko lyendi kumwe nakutoghona ruviri nampango, makura mema ghamangi agha rupukamo. Mbunga ayinu, navimuna vyavo avi nu. ¹² Makura Karunga aghamba kwaMosesa naArona, ''Mukondashi kapi muna huguvare me ndi kupura ashi ame napongoka kumantjo ghavaIsraeli, kapi ngamu yita yino mbunga mulivango olyo navapa.'' ¹³ Elino livango kavalitwenyanga mema gha Meliba mukondashi vantu vaIsraeli kwatangulire naKarunga, makura ghuye akunegheda mwene kukwavo ashi apongoka. ¹⁴ Mosesa atumu ntumi ditunde kuKadeshi nange kwa hompa waEdomu: Muunyoye Israeli ana ghamba ashi: ''Wayuvha maudito naghantje ogho atu wano. ¹⁵ Wayiva ashi vakurona veta vaghurumukire kuEgipute nakukatunga muEgipute shirugho shashire. VaEgipute kwaturughanitanga mwamudona kumwe navakurona vetu. ¹⁶ Opo twa kuwire kwaKarunga, ayuvhu maywi ghetu ano atumu vaEngeli ava tughupu muEgipute. Kenga, mpotuli muKadeshi, nkurumbara yina karo murudi namushirongo shoye. ¹⁷ Ame kuna kukuromba ve ghutupulitire ruvindakane mulivhu lyoye. Kapi tupita mumafuva ndipo muvipata, ndipo tunwe mumatope ghoye. Kutupita ndjira yakuvyukilira. Kapi tupirukira kurulyo ndipo kurumontjo nange tukarundakane murudi ghoye. ¹⁸ Ngoli hompa waEdomu amulimburura, ''Kapi muvhura kuvindakanamo muno. Ntjene muviruwana, kuniya navirwita niyamurwite.'' ¹⁹ Makura vantu vaIsraeli ava ghamba kukwendi, ''Kutupira kuntere yandjira. Ntjene atwe ndi vimuna vyetu vinwe mema ghoye, ngatu gha futira. Tupulitire tupu tuyende, twahana kuruwana kehe vino vyakuhupako.'' ²⁰ Ngoli hompa waEdomu alimburura, ''Kapi muvhura kuvindakana mo muno.'' Hompa waEdomu aya mukudivyuka vaIsraeli nalighoko lyakupama navakavita va vangi. ²¹ Hompa waEdomu ashwena mukupulitira vaUsraeli va vindakane murudi rwavo. Mukonda yavino, Israeli avyukiri palivhu lya Edomu. ²² Vantu ava tundu kukadeshi. Vantu vaIsraeli, mbunga nayintje ayikatika kundundu yaHoro. ²³ Karunga aghamba kwaMosesa naArona kundundu yaHoro, pamurudi waEdomu. Aghamba, ²⁴ ''Arona vamuture kuvantu vendi, mbyevishi ghuye kapi ngakangena mulivhu olyo natapa kuvantu vamuIsraeli. Evino mukondashi anwe muvaviri mwarwanitire nkango yande pamangeneno gha Meliba. ²⁵ Ghupa Arona naEliyasara monendi, nakuvayita kuwiru yandundu yaHoro. ²⁶ Ghupa vyuma vyaArona vyaghuruti makura ghu vidwateke monendi Eliyasara. Arona ana kona kufa ntani kumukuwederera kuvantu vendi mpopo.'' ²⁷ Mosesa aruwana yira momo Karunga amurawilire. Ava rondo kundundu yaHoro mumantjo gha mbunga mudima. ²⁸ Mosesa aghupu vyuma vya Arona vya ghuruti makura avi dwateke monendi Eliyasara. Arona afere mpopo pawiru yandundu. Makura Mosesa naEliyasara ava dumpuka. ²⁹ Opo yamonine mbunga nayintje ashi Arona ana kafa, mbunga nayintje ayilili Arona mayuva rontatu.